რაგბი. ლეგიონი: საფრანგეთის ელიტა 2 მომდევნო კვირას დაიწყება

საფრანგეთის სარაგბო ჩემპიონატის ელიტურ, მეორე დივიზიონში ახალი სეზონი მომდევნო კვირის უქმეებზე დაიწყება.

სატრანსფერო სეზონი უკვე დახურულია, მაგრამ გუნდები დაშავებული მორაგბეების ნაცვლად სამედიცინო ჯოკრების ძიებაში არიან. მომავალ გათამაშებაში 19 ქართველი მორაგბე 7 კლუბის ღირსებას დაიცავს...

ახლახან ცნობილი გახდა, რომ მეორე დივიზიონში მოასპარეზე "ორიაკმა" სამედიცინო ჯოკრის სტატუსით საქართველოს ნაკრების მესამეხაზელი ლაშა ლომიძე დაიმატა.

ამ გუნდში წლეულს ყველაზე მეტი (8) ქართველი მორაგბე იასპარეზებს. აქედან ხუთი - მერაბ შარიქაძე, გიორგი ვეფხვაძე, გიორგი ჯავახია, გიორგი ცუცქირიძე და იგივე ლომიძე ძირითად გუნდში ითამაშებენ.

გიორგი გოგოლაძე, ბექა კარკაძე და ბექა საღინაძე კი, ესპუარების, ანუ სათადარიგო გუნდის ღირსებას დაიცავენ. თუმცა, ეს სულაც არ ნიშნავს, რომ ძირითად გუნდში თამაშის შანსი არ ექნებათ, ოღონდ, ეგ არის, საამისოდ, ბეჯითი გარჯა მართებთ...

ლომიძესთან დაკავშირებით ერთი პრობლემაა. მას ვიზის აღება უგვიანდება და პირველ ტურში, სავარაუდოდ, ვერ ითამაშებს. არადა, მის პოზიციაზე გუნდს ერთობ გაუჭირდა. ტრავმას იშუშებს და ჯერაც ვერაფრით დაეხმარება გუნდს "ბორჯღალოსანთა" კაპიტანი მერაბ შარიქაძე.

"ორიაკს" წლეულს სერიოზული ამბიციები აქვს და გამორიცხული არ არის, ეს გუნდი პლეი ოფშიც ვიხილოთ.

კიდევ ერთი კლუბი, რომელშიც მრავლად არიან ქართველი მორაგბეები, ელიტური პირველი დივიზიონიდან მეორეში დაქვეითებული "ბრივია". ამ გუნდში კარლენ ასეიშვილი, სოსო ბეკოშვილი და ვასილ ლობჟანიძე გასულ სეზონშიც თამაშობდნენ. ახალი სეზონის წინ კი მათ მესამეხაზელი ოთარ გიორგაძე ("კლერმონი") და შერკინების ბურჯი ლუკა გოგინავა ("მეტრო რასინგი") დაემატათ.

ბრიველთა მიზანი პირველ დივიზიონში დაბრუნება იქნება. მიუხედავად იმისა, რომ გუნდი ბევრმა ძლიერმა მოთამაშემ დატოვა, "ბრივს" საამისო პოტენციალი ნამდვილად გააჩნია.

"ნევერი" გასულ სეზონში დებიუტანტი იყო, თუმცა დივიზიონში ადგილის შენარჩუნება მოახერხა. ეს გუნდი სეზონის წინ ორი ახალგაზრდა შერკინების ბურჯით - თორნიკე მატარაძითა და გურამ პაპიძით გაძლიერდა. შარშანწინ, ორივე ახალგაზრდული ნაკრების წევრი იყო მსოფლიოს 20-წლამდელთა ჩემპიონატზე. მეტიც - მატარაძემ ეროვნულ ნაკრებშიც მოასწრო რამდენიმე მატჩის გამართვა.

აქამდე, ორივე პირველი დივიზიონის გუნდებში ირიცხებოდა, მაგრამ სათამაშო დრო არასაკმარისი ჰქონდათ და ამიტომაც არჩიეს რანგით დაბალ დივიზიონში ასპარეზობა, სადაც მეტი სათამაშო პრაქტიკა ექნებათ. ასეთ ხერხს არაერთმა ქართველმა მორაგბემ მიმართა და დღეს ისევ პირველი დივიზიონის გუნდებში ასპარეზობენ.

ელიტაში აღზევების სავარაუდო კანდიდატია "კოლომიე", რომლის ღირსებასაც შერკინების ბურჯი ბექა შეყლაშვილი დაიცავს. ამ გუნდს სერიოზული ტრადიციები აქვს და იყო დრო, პირველ დივიზიონში ანგარიშგასაწევ ძალადაც ითვლებოდა.

ირაკლი მირცხულავას "ოინაქსი" მეორე დივიზიონში წლეულს დაქვეითდა. ერთი ხანობა, გავრცელდა ინფორმაცია, თითქოს, მან გუნდი დატოვა და "კოლომიეში" გადავიდა. თუმცა მირცხულავამ ისევ "ოინაქსში" დარჩენა ამჯობინა. სავარაუდოდ, ეს გუნდი ისევ უძლიერესთა შორის დაბრუნებას ეცდება.
შალვა სუთიაშვილის "ანგულემმა" შარშანდელი სეზონი კარგად დაიწყო. გუნდს პლეი ოფში გასვლის ამბიციაც გაუჩნდა, მაგრამ ჩემპიონატის მიწურულს უკან დაიხია. სუთიაშვილმა ამ გუნდს არაერთხელ უკაპიტნა და დღესაც ერთ-ერთი წამყვანი მოთამაშეა.

პარიზის გარეუბნის პატარა გუნდი "მასი", რომელიც ერთ დროს ყველაზე "ქართული" ფრანგული გუნდი იყო, მეორე დივიზიონში გაშინაურდა. მან ორჯერ მოახერხა ფედერალ 1-დან დაწინაურება და ისევ გავარდნა, მაგრამ ახლა უკვე მყარად დგას პროფესიულ ლიგაში. აქ ერთადერთი ქართველია - შერკინების ბურჯი ილია კაიკაციშვილი.

ყოველდღიური სპორტული გაზეთი "ლელო"
138
მკითხველის კომენტარები / 0 /
მსგავსი ამბები
რუბრიკის სხვა სიახლეები