რაგბი. ლეგიონი. საფრანგეთის სარაგბო ჩემპიონატს ქართული ტრიო ლიდერობს

საფრანგეთის სარაგბო ჩემპიონატის ელიტურ, პირველ დივიზიონში მეექვსე ტურის შემდეგ ქართველ მორაგბეთა სამი გუნდი დაწინაურდა. ესენია: "კლერმონი", "სტად ფრანსე" და "რასინგი".

დავით ზირაქაშვილის, ვიქტორ კოლელიშვილისა და ბექა კაკაბაძის "კლერმონი" შინ ეთამაშა მამუკა გორგოძისა და ბადრი ალხაზაშვილის "ტულონს". "ვულკანებმა", რომლებსაც შარშან მძიმე სეზონი ჰქონდათ, მეტოქე ყველა კომპონენტში დაჯაბნეს და 28:8 დაამარცხეს.

ზირაქაშვილი სათადარიგოთა შორის იყო და მოედანზე 50-ე წუთიდან გამოჩნდა, გორგოძე ტრავმირებულია, კოლელიშვილი, კაკაბაძე და ალხაზაშვილი განაცხადში არ იყვნენ.

"კლერმონს" კვალში უდგას გიორგი მელიქიძის "სტად ფრანსე", რომელსაც წლეულს ფინანსური პრობლემები აღარ აწუხებს და შესანიშნავ ფორმაშია. პარიზულ დერბიში "სტად ფრანსემ" დაძაბულ ბრძოლაში წააგო ვასილ კაკოვინისა და გურამ გოგიჩაშვილის "რასინგთან" - 16:17. შედეგად, "რასინგი" ახლა "სტად ფრანსეს" მხოლოდ ერთი ქულით ჩამორჩება.

საქართველოს ახალგაზრდული ნაკრების წევრი გურამ გოგიჩაშვილი ისევ ძირითად შემადგენლობაში იყო და 51-ე წუთზე ის კაკოვინმა შეცვალა, მელიქიძე თამაშში 77-ე წუთიდან ჩაერთო.

მორიგი გამარჯვება მოიპოვა და ლიდერებს მიუახლოვდა მიხეილ ნარიაშვილის, კონსტანტინე მიქაუტაძის, ლევან ჩილაჩავასა და გელა აფრასიძის "მონპელიე". ჩვენებურთა ამ გუნდმა სტუმრად დაამარცხა აუტსაიდერი "პერპინიანი" - 23:20.

ნარიაშვილი ძირითად შემადგენლობაში იყო და 57-ე წუთზე შეცვალეს, მიქაუტაძე და ჩილაჩავა ტრავმირებულნი არიან.

ასევე საგრძნობლად გამოიკეთა მდგომარეობა ლექსო ყაულაშვილის, ბექა გორგაძისა და ლაშა ტაბიძის "ბორდომ", რომელმაც შინ დაამარცხა "ლა როშელი" - 34:22. ყაულაშვილი 65-ე წუთზე შეცვალეს, გორგაძე მოედანზე ერთი წუთის შემდეგ გამოჩნდა, ტაბიძე განაცხადში არ იყო.

აუტსაიდერთა შორის არიან ქართველ მორაგბეთა გუნდები - "აჟენი" და "გრენობლი". "ალპელებმა", რომლის ღირსებასაც დავით ქუბრიაშვილი და ბექა გიგაშვილი იცავენ, სტუმრად წააგეს "ლიონთან" - 6:34. ქუბრიაშვილი ძირითად შემადგენლობაში იყო და 50-ე წუთზე გიგაშვილმა შეცვალა.

გიორგი თეთრაშვილისა და თამაზ მჭედლიძის "აჟენი" კი შინ დამარცხდა "პოსთან" - 25:28. მჭედლიძე განაცხადში ისევ არ იყო. თეთრაშვილი თამაშში 42-ე წუთიდან ჩაერთო.

ტოპ-14. VI ტური

ტულუზი-კასტრი 22:26
აჟენი-პო 25:28
ბორდო-ლა როშელი 34:22
ლიონი-გრენობლი 34:6
პერპინიანი-მონპელიე 20:23
კლერმონი-ტულონი 28:8
სტად ფრანსე-რასინგი 16:17

სატურნირო მდგომარეობა
1. კლერმონი - 24 ქულა, 2. სტად ფრანსე - 19, 3. რასინგი - 18, 4. კასტრი - 18, 5. ლიონი - 17, 6. მონპელიე - 16, 7. ბორდო - 16, 8. ტულუზი - 15, 9. ლა როშელი - 13, 10. პო - 13, 11. ტულონი - 9, 12. აჟენი - 9, 13. გრენობლი - 6. 14. პერპინიანი - 2.

მეორე დივიზიონში ქართველ მორაგბეთა გუნდებიდან საუკეთესო მაჩვენებელი ჯერჯერობით "ნევერსა" და "ბრივს" აქვს. იქვეა "ანგულემი" და "ბიარიცი".
თორნიკე მატარაძისა და ლევან პაპიძის "ნევერმა" შინ დაამარცხა "ექსი" - 39:17. მატარაძეს დებიუტი ჰქონდა. ის სათადარიგოთა შორის იყო და თამაშში 55-ე წუთიდან ჩაერთო. პაპიძეს არ უთამაშია.

ვასილ ლობჟანიძის, სოსო ბეკოშვილის, ოთარ გიორგაძის, კარლენ ასიეშვილისა და ლუკა გოგინავას "ბრივმა" შინ მიიღო მერაბ შარიქაძის, გიორგი ჯავახიას, ლაშა ლომიძის, გიორგი ცუცქირიძისა და გიორგი ვეფხვაძის "ორიაკი". მასპინძლებმა მატჩის ბედი პირველივე ტაიმში გადაწყვიტეს, რომელიც 29:0 მოიგეს. საბოლოოდ კი "ბრივმა" 36:14 გაიმარჯვა.

ლომიძე 48-ე წუთზე შეცვალეს, ცუცქირიძემ მოედანი 10 წუთის შემდეგ დატოვა, ლობჟანიძე თამაშში 52-ე წუთიდან ჩაერთო, ოთხ წუთში მოედანზე ბეკოშვილიც გამოჩნდა, გიორგაძე კი შეცვლაზე 62-ე წუთზე შევიდა. სხვა ქართველ მორაგბეებს არ უთამაშიათ.

შალვა სუთიაშვილის "ანგულემმა" შინ პირველი მარცხი აგემა გათამაშების ლიდერ "მონ დე მარსანს" - 20:16. სუთიაშვილი თადარიგში იყო და 48-ე წუთზე შეცვალეს.

ბასკურ დერბიში ვახტანგ ახობაძის, თორნიკე ჯალაღონიასა და გიორგი ნუცუბიძის "ბიარიცმა" შინ მოუგო "ბაიონს" - 22:6. ახობაძე თადარიგში იყო და თამაშში 53-ე წუთიდან ჩაერთო, ჯალაღონია და ნუცუბიძე განაცხადში არ იყვნენ.


აუტსაიდერმა, ილია კაიკაციშვილის "მასიმ" შინ მორიგი მარცხი იწვნია ნიკა ნეფარიძის "ვანთან" დაპირისპირებაში- 6:21. ნეფარიძე თამაშში 58-ე წუთიდან ჩაერთო, კაიკაციშვილს არ უთამაშია.

პროდ-2. VI ტური

ბიარიცი-ბაიონი 22:6
ბრივი-ორიაკი 36:14
ანგულემი-მონ დე მარსანი 20:16
მასი-ვანი 6:21
ოიონაქსი-ბურგ ან ბრესი 49:16
ნევერი-ექსი 39:17
კარკასონი-ბეზიე 47:13
მონტობანი-კოლომიე 29:20

სატურნირო მდგომარეობა
1. მონ დე მარსანი - 21 ქულა, 2. ნევერი - 19, 3. კარკასონი - 19, 4. ბრივი - 19, 5. ოიონაქსი - 18, 6. ანგულემი - 18, 7. ბიარიცი - 16, 8. ბაიონი - 16, 9. მონტობანი - 13, 10. ბეზიე - 13, 11. ვანი - 12, 12. ექსი - 12, 13. კოლომიე - 10, 14. ორიაკი - 9, 15. ბურგ ან ბრესი - 6, 16. მასი - 1.

ინგლისის ჩემპიონატში მორიგი, ძალზე მნიშვნელოვანი გამარჯვება მოიპოვა ზურაბ ჟვანიას "ვოსფსმა". საქართველოს ნაკრების პირველხაზელის გუნდი სტუმრად "ნიუკასლთან" მე-60 წუთამდე 13:22 აგებდა. თუმცა, ძალების მობილიზება და მატჩის მინიმალური სხვაობით მოგება შეძლო - 23:22. ჟვანია ამჯერადაც ძირითად შემადგენლობაში იყო და მე-60 წუთზე შეცვალეს. "ვოსფსი" 19 ქულით ახლა მე-3 ადგილზეა და უახლოეს მდევარ "ჰარლიქვინზს" ექვსი ქულით უსწრებს.

კელტთა ლიგაში გიორგი ნემსაძის "ოსფრიზმა" სტუმრად დაამარცხა იტალიური "ზებრე" - 22:8. ნემსაძეს კისრის ტრავმა აქვს და არ უთამაშია. ასევე არ გამოჩენილა "კარდიფის" შემადგენლობაში ანტონ ფეიქრიშვილიც. მისმა გუნდმა კი შინ სამხრეთაფრიკული "ჩიტაზი" დაამარცხა - 24:21.
"ოსფრიზი" A ჯგუფში 17 ქულით მეორე ადგილზეა. "კარდიფს" კი 13 ქულა აქვს და მეოთხე საფეხური უკავია.

ყოველდღიური სპორტული გაზეთი "ლელო"
343
მკითხველის კომენტარები / 0 /
მსგავსი ამბები
რუბრიკის სხვა სიახლეები