რაგბი. ლეგიონი. საფრანგეთიში ორხელისფლებიანობა დამყარდა - ორივე ქართველებისაა!

საფრანგეთის სარაგბო ჩემპიონატის ელიტურ, პირველ დივიზიონში მეორე ტურის შეხვედრები გაიმართა, რომლის შემდეგაც სატურნირო ცხრილში ორხელისფლებიანობა დამყარდა. ორივე ქართველი მორაგბის გუნდებია: "კლერმონი" და "სტად ფრანსე".

დავით ზირაქაშვილის, ვიქტორ კოლელიშვილისა და ბექა კაკაბაძის "კლერმონმა" გასული სეზონი, რომელსაც ჩემპიონის რანგში ატარებდა, ჩააგდო. "ვულკანებმა", თითქოს, ტაიმ-აუტი აიღეს. ერთი წელი შეისვენეს და წლევანდელი სეზონი რიხით დაიწყეს. თამამად შეიძლება ითქვას, რომ "კლერმონი" საჩემპიონო რბოლაში დაბრუნდა.

მეორე ტურში "ვულკანებს" რთული გასვლითი მატჩი ელოდათ სტუმრად, ვასილ კაკოვინისა და გურამ გოგიჩაშვილის "რასინგთან". თუმცა, კლერმონელების უპირატესობა იმდენად საგრძნობი იყო, რომ მათი გამარჯვება მატჩის მსვლელობის არცერთ მონაკვეთზე არ იწვევდა ეჭვს. "კლერმონმა" შთამბეჭდავი გამარჯვება მოიპოვა 40:17.

კაკოვინი თამაშში 35-ე წუთიდან ჩაერთო, ზირაქაშვილი მოედანზე 22 წუთის შემდეგ გამოჩნდა, სხვა ქართველები განაცხადში არ იყვნენ.

გასული სეზონი გიორგი მელიქიძის "სტად ფრანსემაც" ჩააგდო. მიზეზი ფინანსები იყო. ეს პრობლემა მოგვარდა და გუნდიც მძლავრად ამუშავდა. პარიზელებმა შინ შეძლეს ლექსო ყაულაშვილის, ბექა გორგაძისა და ლაშა ტაბიძის "ბორდოს" დამარცხება - 20:8. ქართველებიდან მხოლოდ ყაულაშვილმა ითამაშა, რომელიც ძირითად შემადგენლობაში იყო და 57-ე წუთზე შეცვალეს.

პირველი გამარჯვება მოიპოვეს ქართველ მორაგბეთა გუნდებმა, "აჟენმა" და "მონპელიემ". მიხეილ ნარიაშვილის, კონსტანტინე მიქაუტაძის, ლევან ჩილაჩავასა და გელა აფრასიძის "მონპელიემ" შინ დაამარცხა "ლა როშელი" - 36:14.

მიქაუტაძე ძირითად შემადგენლობაში იყო და 57-ე წუთზე შეცვალეს, ჩილაჩავა მოედანზე 37-ე წუთზე გამოჩნდა, მაგრამ მეორე ტაიმის დასაწყისშივე დაშავდა და შესაცვლელი შეიქნა.

გიორგი თეთრაშვილისა და თამაზ მჭედლიძის "აჟენმა" შინ დაძაბულ ბრძოლაში დაამარცხა პირველ დივიზიონში დაბრუნებული "პერპინიანი" - 25:23. მჭედლიძე თამაშში 74-ე წუთიდან ჩაერთო. თეთრაშვილი განაცხადში არ იყო.

უცნაურია, მაგრამ ორი თამაშიდან ორი წაგება აქვს და ბოლო ადგილზეა მამუკა გორგოძის "ტულონი", რომელმაც ამჯერად, სტუმრად წააგო "პოსთან" - 10:20. გორგოძე ტრავმირებულია.

ტოპ-14. II ტური

პო-ტულონი 20:10
კასტრი-ლიონი 19:16
მონპელიე-ლა როშელი 36:14
სტად ფრანსე-ბორდო 20:8
გრენობლი-ტულუზი 20:23
აჟენი-პერპინიანი 25:23
რასინგი-კლერმონი 17:40

სატურნირო მდგომარეობა
1. კლერმონი - 9 ქულა, 2. სტად ფრანსე - 9, 3. კასტრი - 8, 4. ტულუზი - 6, 5. მონპელიე - 5, 6. ბორდო - 5, 7. რასინგი - 5, 8. პო - 4, 9. ლა როშელი - 4, 10. აჟენი - 4, 11. ლიონი - 3, 12. გრენობლი - 1, 13. პერპინიანი - 1, 14. ტულონი - 0.

მეორე დივიზიონში სამი ტურის შემდეგ საუკეთესო მაჩვენებელი ირაკლი მირცხულავას "ოიონაქსს" აქვს, რომელმაც გასვლით მატჩში ბექა შეყლაშვილის "კოლომიეს" დამარცხება შეძლო - 19:18. ოიონაქსელები 9 ქულით მესამე ადგილზე არიან. მირცხულავა თადარიგში იყო და თამაშში 41-ე წუთიდან ჩაერთო. შეყლაშვილს არ უთამაშია.

"ოიონაქს" ერთი ქულით ჩამორჩება და მე-6 ადგილზეა მერაბ შარიქაძის, ლაშა ლომიძის, გიორგი ჯავახიას, გიორგი ცუცქირიძისა და გიორგი ვეფხვაძის "ორიაკი". ჩვენებურთა ამ გუნდმა შინ დაამარცხა მირიან ბურდულის "კარკასონი" - 19:16. ორიაკელთა რიგებში ლომიძის დებიუტი შედგა, ის თამაშში 67-ე წუთიდან ჩაერთო. ბურდული მოედანზე 29-ე წუთიდან გამოჩნდა.

სტუმრად, ბასკურ "ბიარიცთან" ფრედ ითამაშა კარლენ ასიეშვილის, სოსო ბეკოშვილის, ოთარ გიორგაძისა და ვასილ ლობჟანიძის "ბრივმა" - 33:33. გიორგაძემ, რომელმაც სრულად ითამაშა, მე-19 წუთზე ლელო მიითვალა.

პირველი გამარჯვება მოიპოვა შალვა სუთიაშვილის "ანგულემმა", რომელმაც შინ ასევე პირველი მარცხი აგემა "მონტობანს" - 29:23. სუთიაშვილი მე-60 წუთზე შეცვალეს.

პრო დ-2. III ტური

ბიარიცი-ბრივი 33:33
ანგულემი-მონტობანი 29:23
ორიაკი-კარკასონი 19:16
მასი-ბაიონი 12:21
ბურგ ან ბრესი-ექსი 18:16
ვანი-ნევერი 24:13
კოლომიე-ოიონაქსი 18:19
მონ დე მარსანი-ბეზიე 35:14

სატურნირო მდგომარეობა
1. მონ დე მარსანი - 12 ქულა, 2. ბაიონი - 10, 3. ოიონაქსი - 9, 4. მონტობანი - 8, 5. ბეზიე - 8, 6. ორიაკი - 8, 7. ექსი - 7, 8. ვანი - 7, 9. ბიარიცი - 7, 10. ნევერი - 6, 11. ანგულემი - 6, 12. ბრივი - 6, 13. კარკასონი - 6, 14. ბურგ ან ბრესი - 6, 15. კოლომიე - 5, 16. მასი - 0

ყოველდღიური სპორტული გაზეთი "ლელო"
1153
მკითხველის კომენტარები / 0 /
მსგავსი ამბები
რუბრიკის სხვა სიახლეები
;