რაგბი. ლეგიონი. ტრავმების ეპიდებია: კონსტანტინე მიქაუტაძემ წინამხარი მოიტეხა

საფრანგეთის სარაგბო ჩემპიონატში ტური ისე არ ჩაივლის, ვინმე ქართველი მორაგბე არ დაშავდეს.

მესამე ტურში საქართველოს ნაკრებისა და "მონპელიეს" მეორეხაზელმა კონსტანტინე მიქაუტაძემ წინამხარი მოიტეხა. ჩემპიონატს კი დაუმარცხებლად ლიდერობს ქართველთა კიდევ ერთი გუნდი "კლერმონი".

დავით ზირაქაშვილის, ვიქტორ კოლელიშვილისა და ბექა კაკაბაძის "კლერმონმა" შინ მიიღო ფინანსურად მოღონიერებული, გიორგი მელიქიძის "სტად ფრანსე" და დამაჯერებლად სძლია 42:20. ქართველთაგან მხოლოდ ზირაქაშვილმა ითამაშა, რომელიც მოედანზე 59-ე წუთიდან გამოჩნდა.

მიხეილ ნარიაშვილის, კონსტანტინე მიქაუტაძის, ლევან ჩილაჩავასა და გელა აფრასიძის "მონპელიემ" სტუმრად ფრედ ითამაშა ლექსო ყაულაშვილის, ბექა გორგაძისა და ლაშა ტაბიძის "ბორდოსთან" - 9:9. ნარიაშვილი და ჩილაჩავა ტრავმირებულნი არიან. მიქაუტაძე მატჩის დასაწყისშივე, მე-2 წუთზე დაშავდა. მასპინძელთა რიგებში მხოლოდ ყაულაშვილმა ითამაშა, რომელიც შეცვლაზე 58-ე წუთიდან შევიდა.

ვასილ კაკოვინისა და გურამ გოგიჩაშვილის "რასინგმა" შინ დიდი ანგარიშით დაამარცხა გიორგი თეთრაშვილისა და თამაზ მჭედლიძის "აჟენი" - 59:7. ამ მატჩში გოგიჩაშვილის დებიუტი შედგა საფრანგეთის ჩემპიონატში, მან 54-ე წუთზე კაკოვინი შეცვალა. მჭედლიძემ სრულად ითამაშა, თეთრაშვილი 48-ე წუთზე შეცვალეს.

პირველი გამარჯვება მოიპოვა მამუკა გორგოძისა და ბადრი ალხაზაშვილის "ტულონმა", რომელმაც საკუთარ მოდანზე ქვეყნის ჩემპიონს "კასტრს" მინიმალური სხვაობით მოუგო - 28:27. ქართველებს არ უთამაშიათ.

ტოპ-14. III ტური

ბორდო-მონპელიე 9:9
ტულუზი-ლა როშელი 33:26
პერპინიანი-ლიონი 16:22
რასინგი-აჟენი 59:7
კლერმონი-სტად ფრანსე 42:20
გრენობლი-პო 21:24
ტულონი-კასტრი 28:27

სატურნირო მდგომარეობა
1. კლერმონი - 14 ქულა, 2. რასინგი - 10, 3. ტულუზი - 10, 4. სტად ფრანსე - 9, 5. კასტრი - 9, 6. პო - 6, 7. მონპელიე - 7, 8. ბორდო - 7, 9. ლიონი - 7, 10. ლა როშელი - 4, 11. ტულონი - 4, 12. აჟენი - 4, 13. გრენობლი - 2, 14. პერპინიანი - 1

მეორე დივიზიონში ქართველ მორაგბეთა გუნდები მეოთხე ტურის შემდეგ ლიდერთა შორის არ არიან. თუმცა, "ნევერმა", "ბრივმა", კარკასონმა" და "ანგულემმა" 10-10 ქულა დააგროვეს და მეექვსე-მეათე ადგილებს იყოფენ.

შალვა სუთიაშვილის "ანგულემმა" შინ ლაშა ლომიძის, მერაბ შარიქაძის, გიორგი ჯავახიას, გიორგი ცუცქირიძისა და გიორგი ვეფხვაძის "ორიაკს" უმასპინძლა და 23:13 დაამარცხა. სუთიაშვილმა სრულად ითამაშა და მატჩის არბიტრმა 76-ე წუთზე სინბინში გაუშვა. "ორიაკში" ქართველებიდან მხოლოდ ლაშა ლომიძემ ითამაშა, რომელიც 69-ე წუთზე შეცვალეს.

ოთარ გიორგაძის, ლუკა გოგინავას, კარლენ ასიეშვილის, სოსო ბეკოშვილისა და ვასილ ლობჟანიძის "ბრივმა" შინ დაამარცხა "ბეზიე" - 27:6. გიორგაძემ თავიდან ბოლომდე ითამაშა, გოგინავა მოედანზე 37-ე წუთიდან გამოჩნდა. სხვა ქართველ მორაგბეებს არ უთამაშიათ.

მირიან ბურდულის "კარკასონმა" საკუთარ მოედანზე დაამარცხა ბექა შეყლაშვილის "კოლომიე" - 25:20. შეყლაშვილი ძირითად შემდგენლობაში იყო და 48-ე წუთზე შეცვალეს, იმავდროულად თამაშში ჩაერთო ბურდული.

ილია კაიკაციშვილის "მასის" გამარჯვებათა გრაფაში ნული უწერია. პარიზულმა გუნდმა ამჯერად, სტუმრად წააგო თორნიკე მატარაძისა და გურამ პაპიძის "ნევერთან" - 6:17. კაიკაციშვილი ძირითად შემადგენლობაში იყო. ის მე-14 წუთზე დაშავდა და შესაცვლელი შეიქნა. მატარაძეს და ტაბიძეს არ უთამაშიათ.

პრო დ-2. IV ტური
ოიონაქსი-ბაიონი 18:16
ანგულემი-ორიაკი 23:13
ბიარიცი-ბურგ ან ბრესი 46:9
კარკასონი-კოლომიე 25:20
ნევერი-მასი 17:6
ექსი-ვანი 38:23
მონტობანი-მონ დე მარსანი 20:25
ბრივი-ბეზიე 27:6

სატურნირო მდგომარეობა
1. მონ დე მარსანი - 16 ქულა, 2. ოიონაქსი - 13, 3. ექსი -12, 4. ბიარიცი - 12, 5. ბაიონი - 11, 6. ნევერი - 10, 7. ბრივი - 10, 8. ანგულემი - 10, 9. კარკასონი - 10, 10. მონტობანი - 9, 11. ბეზიე - 8, 12. ორიაკი - 8, 13. ვანი - 7, 14. კოლომიე - 6, 15. ბურგ ან ბრესი - 6, 16. მასი - 0.

ყოველდღიური სპორტული გაზეთი "ლელო"
214
მკითხველის კომენტარები / 0 /
მსგავსი ამბები
რუბრიკის სხვა სიახლეები