რაგბი. ლეგიონი. ფედერალ 1 დივიზიონი: ჩხაიძისა და გოგიძის წყვილი ლელო

საფრანგეთის სარაგბო ჩემპიონატის ფედერალ 1 დივიზიონში მესამე ტურის შეხვედრები გაიმართა. ქართველ მორაგბეთა გუნდები ოთხივე ჯგუფში ლიდერობენ.

ფედერალ 1 დივიზიონის A ჯგუფში სამი თამაშიდან სამივე მოიგო და მეორე ადგილზეა გიორგი ცუხიშვილის "ნანტი". ჩვენებურის გუნდმა მესამე ტურში შინ დაამარცხა "ლანჟონი" - 38:7. ცუხიშვილმა თავიდან ბოლომდე ითამაშა.

ნანტელებს ერთი ქულით "რუენი" უსწრებს, რომელმაც სტუმრად დაამარცხა დიდი ანგარიშით გიორგი სულუაშვილის "სენ მედარი" - 54:5. სულუაშვილი თამაშში მე-60 წუთიდან ჩაერთო.

ნიკოლოზ გიორგაძის "რენი" შინ დამარცხდა "კონიაკთან" 9:31 და ხუთი ქულით ახლა მეშვიდე ადგილზეა. გიორგაძე მოედანზე 68-ე წუთიდან გამოჩნდა.
B ჯგუფში სამი თამაშიდან ორი მოიგო და მეორე ადგილზეა ზაზა ნავროზაშვილის "ალბი". ჩვენებურის ამ გუნდმა მესამე ტურში სტუმრად დაამარცხა გიორგი მარგველანის "ვალანსი" - 27:12. მარგველანი ძირითად შემადგენლობაში იყო და 65-ე წუთზე შეცვალეს. ნავროზაშვილი კი თამაშში 41-ე წუთიდან ჩაერთო. "ვალანსი" ერთი ქულით ბოლოსწინა ადგილზეა.

ირაკლი მირცხულავას "ლანამეზანმა" შინ დაამარცხა "ბაგნერე" 38:17 და ახლა რვა ქულით მეექვსე ადგილზეა. მირცხულავა ძირითად შემადგენლობაში იყო და მე-80 წუთზე შეცვალეს.

C ჯგუფში სამი თამაშიდან ორი მოიგო და მეორე ადგილზეა გიორგი როყვასა და მინდია ელგუჯაურის "კასტანე". მესამე ტურში ჩვენებურთა გუნდმა სტუმრად მოუგო "გროლეს" - 43:16. როყვა 39-ე წუთზე შეცვალეს, ელგუჯაურმა მოედანი 63-ე წუთზე დატოვა.

"კასტანეს" ერთი ქულით ჩამორჩება გიორგი შარაშიძის "როვალი", რომელმაც სტუმრად შეძლო გიორგი მენაბდიშვილის "ფლორანსის" დამარცხება - 47:3. მენაბდიშვილი 50-ე წუთზე შეცვალეს, შარაშიძე თამაშში ხუთი წუთის შემდეგ ჩაერთო.

ასტამურ იოსელიანის "როდეზმა" შინ ფრედ ითამაშა "ნიმთან" 27:27 და ახლა 7 ქულით მეხუთე ადგილზეა. იოსელიანი სათდარიგოთა შორის იყო და მოედანზე მე-40 წუთიდან გამოჩნდა.

გურამ გოგიძისა და ლაშა მჭედლიძის "ობენამ" სტუმრად წააგო "კერესთან" - 17:28. გოგიძემ სრულად ითამაშა და მე-5 წუთზე ლელო მიითვალა, მჭედლიძე 49-ე წუთზე შეცვალეს. "ობენა" 6 ქულით მე-7 ადგილზეა. "კერე" მას ერთი ქულით ჩამორჩება და სატურნირო ცხრილში მე-9 საფეხური უჭირავს.

D ჯგუფში ლიდერი გიორგი ზაქაშვილის "ბურგუენია". ჩვენებურის ამ გუნდმა მესამე ტურში სტუმრად მოუგო რევაზ ჟღენტის "ვიენს" - 26:11. ჟღენტი თამაშში 45-ე წუთიდან ჩაერთო, ზაქაშვილმა, რომელიც ძირითად შემადგენლობაში იყო, ათი წუთის შემდეგ დატოვა მოედანი.

გიორგი ჩხაიძის "ნიცამ" სტუმრად წააგო გიო სორდიას "შამბერისთან" - 21:24. ჩხაიძემ სრულად ითამაშა და 48-ე წუთზე ლელო გაიტანა. თავიდან ბოლომდე ითამაშა სორდიამაც. "ნიცა" 9 ქულით მე-4 ადგილზეა. "შამბერიმ" კი ხუთი ქულა დააგროვა და მეექვსეა.

ყოველდღიური სპორტული გაზეთი "ლელო"
291
მკითხველის კომენტარები / 0 /
მსგავსი ამბები
რუბრიკის სხვა სიახლეები