რაგბი. ლეგიონი. ქართველების საჩემპიონო განაცხადი

საფრანგეთის სარაგბო ჩემპიონატის ელიტურ, პირველ დივიზიონში რვა ტურის შემდეგ საპლეიოფო ექვსეულში ქართველ მორაგბეთა ოთხი გუნდია. ესენია: "კლერმონი", "სტად ფრანსე", "რასინგი" და "ბორდო".

წლეულს შესანიშნავად ასპარეზობს დავით ზირაქაშვილის, ბექა კაკაბაძისა და ვიქტორ კოლელიშვილის "კლერმონი", რომელმაც მერვე ტურში საფრანგეთის ჩემპიონ "კასტრს" უმასპინძლა და უშანსოდ დაამარცხა - 41:6. თამამად შეიძლება ითქვას, რომ ეს "ვულკანების" საჩემპიონო განაცხადია. მით უფრო, რომ ამ გამარჯვების შედეგად ლიდერობას ისევ ინარჩუნებენ.

ზირაქაშვილი თამაშში 56-ე წუთიდან ჩაერთო, კაკაბაძე მოედანზე 12 წუთის შემდეგ გამოჩნდა, კოლელიშვილი ტრავმირებულია.

"კლერმონს" კვალში უდგას გიორგი მელიქიძის "სტად ფრანსე", რომელმაც შინ შეძლო მიხეილ ნარიაშვილის, კონსტანტინე მიქაუტაძის, ლევან ჩილაჩავასა და გელა აფრასიძის "მონპელიეს" დამარცხება - 25:20.
ჩილაჩავა და ნარიაშვილი თამაშში ერთდროულად, 43-ე წუთიდან ჩაერთნენ. სხვა ქართველებს არ უთამაშიათ. "მონპელიე" ჯერჯერობით ექვსეულს მიღმაა.

სასიამოვნო მოულოდნელობაა ლიდერთა შორის ბექა გორგაძის, ლექსო ყაულაშვილისა და ლაშა ტაბიძის "ბორდოს" გამოჩენა. ბორდოელებმა უშუალო კონკურენტ "ლიონს" უმასპინძლეს და დამაჯერებლად მოუგეს - 35:13. გორგაძე თამაშში 63-ე წუთიდან ჩაერთო, ხუთი წუთის შემდეგ მოედანზე ტაბიძეც გამოჩნდა, ყაულაშვილი ტრავმირებულია.

ახლა "ბორდო" გურამ გოგიჩაშვილისა და ვასილ კაკოვინის "რასინგთან" ერთად 22-22 ქულით მეოთხე-მეხუთე ადგილებს იყოფს. პარიზელებმა შინ შეძლეს "პოს" დამარცხება - 48:28. გოგიჩაშვილი ძირითად შემადგენლობაში იყო და 64-ე წუთზე შეცვალეს, კაკოვინს არ უთამაშია.

კატასტროფული მდგომარეობა აქვს მამუკა გორგოძისა და ბადრი ალხაზაშვილის "ტულონს", რომელმაც შინ წააგო "ლა როშელთან" - 9:13. ტულონელები ახლა ბოლოსწინა ადგილზე არიან და დივიზიონში დარჩენისთვის ბრძოლა მოუწევთ. ქართველ მორაგბეებს არ უთამაშიათ.

ჯერჯერობით აუტსაიდერთა შორის არის თამაზ მჭედლიძისა და გიორგი თეთრაშვილის "აჟენი", რომელმაც შინ მიიღი დავით ქუბრიაშვილისა და ბექა გიგაშვილის "გრენობლი". მატჩი ფრედ 9:9 დასრულდა. ქუბრიაშვილი ძირითად შემადგენლობაში იყო და 48-ე წუთზე ის სწორედ გიგაშვილმა შეცვალა. მჭედლიძე და თეთრაშვილი განაცხადში არ იყვნენ.

ტოპ-14. VIII ტური
კლერმონი-კასტრი 41:6
აჟენი-გრენობლი 9:9
პერპინიანი-ტულუზი 18:36
რასინგი-პო 48:28
სტად ფრანსე-მონპელიე 25:20
ბორდო-ლიონი 35:13
ტულონი-ლა როშელი 9:13

სატურნირო მდგომარეობა
1. კლერმონი - 30 ქულა, 2. სტად ფრანსე - 27, 3. ტულუზი - 24, 4. რასინგი - 22, 5. ბორდო - 22, 6. ლიონი - 21, 7. მონპელიე - 21, 8. ლა როშელი - 21, 9. კასტრი - 19, 10. პო - 17, 11. გრენობლი - 12, 12. აჟენი - 11, 13. ტულონი - 10, 14. პერპინიანი - 3

ყოველდღიური სპორტული გაზეთი "ლელო"
785
მკითხველის კომენტარები / 0 /
მსგავსი ამბები
რუბრიკის სხვა სიახლეები
;