რაგბი. ლეგიონი: ჩილაჩავას პირველი ლელო, - ქართველების 'ტულუზი' და 'კლერმონი' პლეი ოფში არიან

საფრანგეთის სარაგბო ჩემპიონატის ელიტურ, პირველ დივიზიონში რეგულარული გათამაშების დასრულებამდე სამი ტურიღა დარჩა. 

უკვე თამამად შეიძლება ითქვას, რომ „ტულუზი“ და „კლერმონი“ პლეი ოფში არიან. დარჩენილი ოთხი ადგილისთვის კი ერთბაშად შვიდი გუნდი იბრძვის. ამათგან ოთხი ქართველი მორაგბეებისაა. ესენია: „რასინგი“, „მონპელიე“, „ბორდო“ და „სტად ფრანსე“. 

როგორც უკვე ვთქვით, დავით ზირაქაშვილის, ვიქტორ კოლელიშვილისა და ბექა კაკაბაძის „კლერმონმა“ პლეი ოფში თამაშის უფლება უკვე მოიპოვა. „ვულკანებმა“ 23-ე ტურში სტუმრად დაამარცხეს ერთ-ერთი პრეტენდენტი, გიორგი მელიქიძის „სტად ფრანსე“ - 41:25. 

კაკაბაძე ძირითად შემადგენლობაში იყო და 52-ე წუთზე შეცვალეს, მელიქიძე მოედანზე შვიდი წუთის შემდეგ გამოჩნდა.

ქართველების დანარჩენი გუნდებიდან საუკეთესო მაჩვენებელი ვასილ კაკოვინისა და გურამ გოგიჩაშვილის „რასინგს“ აქვს, რომელმაც ამჯერად სტუმრად წააგო „პოსთან“ - 27:29. კაკოვინი ძირითად შემადგენლობაში იყო და 46-ე წუთზე შეცვალეს. 

ლევან ჩილაჩავას, კონსტანინე მიქაუტაძის, მიხეილ ნარიაშვილისა და გელა აფრასიძის „მონპელიემ“ შინ დაამარცხა ერთ-ერთი აუტსაიდერი, დავით ქუბრიაშვილის, ბექა გიგაშვილისა და ლექსო ყაულაშვილის „გრენობლი“ - 47:12. ჩილაჩავა ერთადერთი ქართველია, რომელმაც ამ მატჩში იასპარეზა. ის ძირითად შემადგენლობაში იყო და 47-ე წუთზე ლელო მიითვალა. 

მამუკა გორგოძის „ტულონმა“ შინ დაამარცხა ლაშა ტაბიძისა და ბექა გორგაძის „ბორდო“ - 45:17. გორგოძე თამაშში მე-60 წუთიდან ჩაერთო, მალევე მოედანზე ტაბიძეც გამოჩნდა. 

I დივიზიონი 

XXIII ტური
პო-რასინგი 29:27, კასტრი-ტულუზი 20:21, მონპელიე-გრენობლი 47:12, აჟენი-ლიონი 25:15, პერპინიანი-ლა როშელი 29:51, ტულონი-ბორდო 45:17, სტად ფრანსე-კლერმონი 25:41

სატურნირო მდგომარეობა 
1. ტულუზი - 84 ქულა, 2. კლერმონი - 77, 3. ლიონი - 65, 4. კასტრი - 64, 5. რასინგი - 63, 6. ლა როშელი - 62, 7. მონპელიე - 57, 8. ბორდო - 57, 9. სტად ფრანსე - 56, 10. ტულონი - 48, 11. პო - 38, 12. აჟენი - 34, 13. გრენობლი - 28, 14. პერპინიანი - 12

მეორე დივიზიონში რეგულარული გათამაშების დასრულებამდე ერთი ტური დარჩა. ქართველი მორაგბეების, ოთარ გიორგაძის, ვასილ ლობჟანიძის, კარლენ ასიეშვილისა და სოსო ბეკოშვილის „ბრივმა“ პირველი ადგილი უკვე გაინაღდა. თუმცა, პირველ დივიზიონში გადასასვლელად კიდევ ორი მატჩი აქვს მოსაგები.

პლეი ოფის ნახევარფინალში ბრიველები შინ ითამაშებენ, რისი საშუალებაც მათ პირველ ადგილზე გასვლამ მისცა. ფინალში კი, რომელიც ნეიტრალურ სტადიონზე ჩატარდება, „ბრივმა“ აუცილებლად უნდა მოიგოს. სწორედ ამ შემთხვევაში გადავა ის პირველ დივიზიონში ავტომატურად. ფინალში დამარცხებული თავის მხრივ, პირველი დივიზიონის ბოლოსწინა ადგილზე გასულ გუნდს ასვლა-დარჩენის პლეი ოფს ეთამაშება. 

29-ე ტურში „ბრივმა“ სტუმრად დაამარცხა უშუალო კონკურენტი, ირაკლი მირცხულავას „ოიონაქსი“ - 22:10. მირცხულავა, ასიეშვილი და ბეკოშვილი 49-ე წუთზე შეცვალეს, გიორგაძემ მოედანი ოთხი წუთის შემდეგ დატოვა, ლობჟანიძე თამაშში 64-ე წუთიდან ჩაერთო. 

პლეი ოფში მოხვედრის შანსი აქვს ასევე ქართველ მორაგბეთა ორ გუნდს, „ნევერს“ და „ანგულემს“. თორნიკე მატარაძისა და გურამ პაპიძის „ნევერმა“ სტუმრად წააგო „მონტობანთან“ - 6:9. ქართველ პირველხაზელებს არ უთამაშიათ. 

შალვა სუთიაშვილისა და ზაური თევდორაშვილის „ანგულემი“ ასევე სტუმრად დამარცხდა ბექა შეყლაშვილის „კოლომიესთან“ - 8:15. თევდორაშვილი მე-15 წუთზე შეცვალეს, შეყლაშვილმა მოედანი 49-ე წუთზე დატოვა. 

მერაბ შარიქაძის, გიორგი ცუცქირიძის, გიორგი ჯავახიას, ვანო კარკაძისა და ბექა საღინაძის „ორიაკმა“ შინ წააგო „ბიარიცთან“ - 16:17. ცუცქირიძემ სრულად ითამაშა და მე-13 წუთზე არბიტრმა ის სინბინში გაუშვა. ჯავახია თამაშში 55-ე წუთიდან ჩაერთო. 

„ორიაკმა“ ამ მარცხით საქმე სათუოდ გაიხადა. ბოლო ტურში ჩვენებურთა გუნდმა ერთი საპრემიო ქულა მაინც უნდა აიღოს რათა დივიზიონში ადგილი დაიბევოს. 

ყოველდღიური სპორტული გაზეთი "ლელო"
1249
მკითხველის კომენტარები / 0 /
მსგავსი ამბები
რუბრიკის სხვა სიახლეები
;