[რაგბი. ლეგიონი. VIDEO] აქეთ გორგოძე და გიგაშვილი, იქით ჩილაჩავა, მიქაუტაძე და აფრასიძე...

საფრანგეთის სარაგბო ჩემპიონატის ელიტურ, პირველ დივიზიონში მოასპარეზე გუნდებს ეროვნულ ნაკრებებში მივლენილი მორაგბეები სრულად დაუბრუნდნენ და ახლა სრულყოფილი შემადგენლობებით ასპარეზობენ. სავარაუდოდ, სწორედ მსოფლიოს თასზე მოთამაშეების მივლინებასთანაა დაკავშირებული, ლიდერთა შორის „პო“ და „ბაიონი“ რომ არიან. ვფიქრობთ, ნელ-ნელა ყველაფერი თავის ადგილზე დალაგდება და აღიარებული ლიდერები პოზიციებს აღიდგენენ.

მე-9 ტურის ცენტრალურ მატჩად შეიძლება მამუკა გორგოძისა და ბექა გიგაშვილის „ტულონის“ დაპირისპირება მივიჩნიოთ მიხეილ ნარიაშვილის, ლევან ჩილაჩავას, კონსტანტინე მიქაუტაძისა და გელა აფრასიძის „მონპელიესთან“, რომელიც ფრედ 19:19 დასრულდა.

გორგოძე, ნარიაშვილი, მიქაუტაძე და ჩილაჩავა ძირითად შემადგენლობაში იყვნენ და მეორე ტაიმში ყველა შეცვალეს. ჩილაჩავა 39-ე წუთზე არბიტრმა სინბინში გაუშვა.

სატურნირო ცხრილს სათავეში „ლიონი“ უდგას, რომელსაც აქამდე მხოლოდ ერთი მარცხი აქვს. მას ხუთი ქულით ჩამორჩება ლაშა ტაბიძის, ლექსო ყაულაშვილისა და ბექა გორგაძის „ბორდო“, რომელმაც შინ მშრალი ანგარიშით დაამარცხა გიორგი თეთრაშვილის „აჟენი“ - 23:0.

თეთრაშვილი 64-ე წუთზე შეცვალეს, ყაულაშვილი თამაშში ოთხი წუთით ადრე ჩაერთო.

კარლენ ასიეშვილის, სოსო ბეკოშვილის, ოთარ გიორგაძის, ვასილ ლობჟანიძისა და თედო აბჟანდაძის „ბრივი“ სტუმრად დაუპირისპირდა „კასტრს“ და 26:28 დამარცხდა. ბრიველები ბოლო წუთებზე 26:25 იგებდნენ, მაგრამ მასპინძლებმა საჯარიმო დარტყმით ჩვენებურთა გუნდი გაწბილებული გაისტუმრეს.

ბეკოშვილი 42-ე წუთზე შეცვალეს, ასიეშვილმა და გიორგაძემ მოედანი 57-ე წუთზე დატოვეს, ლობჟანიძე თამაშში 55-ე წუთიდან ჩაერთო.

დავით ზირაქაშვილისა და ბექა კაკაბაძის „კლერმონმა“ სტუმრად წააგო „ტულუზთან“ - 8:34. ზირაქაშვილი ძირითად შემადგენლობაში იყო და 51-ე წუთზე შეცვალეს.

უმძიმეს მდგომარეობაშია გიორგი მელიქიძის „სტად ფრანსე“, რომელიც ბოლო ადგილზეა. პარიზულმა გუნდმა ამჯერადაც შინ წააგო ვასილ კაკოვინისა და გურამ გოგიჩაშვილის „რასინგთან“ - 9:25. გოგიჩაშვილი თამაშში 58-ე წუთიდან ჩაერთო.

I დივიზიონი

ტულონი-მონპელიე 19:19, ბაიონი-პო 3:9, ბორდო-აჟენი 23:0, კასტრი-ბრივი 28:26, ტულუზი-კლერმონი 34:8, ლიონი-ლა როშელი 45:17, სტად ფრანსე-რასინგი

სატურნირო მდგომარეობა: 1. ლიონი - 35 ქულა, 2. ბორდო - 30, 3. ბაიონი - 21, 4. პო - 21, 5. ტულონი - 20, 6. კლერმონი - 20, 7. მონპელიე - 19, 8. ტულუზი - 19, 9. კასტრი - 18, 10. ლა როშელი - 18, 11. ბრივი - 18, 12. რასინგი - 18, 13. აჟენი - 16, 18. სტად ფრანსე - 9

860
მკითხველის კომენტარები / 0 /
მსგავსი ამბები
რუბრიკის სხვა სიახლეები
;