რაგბი. ლევან ჩილაჩავას ახალ სეზონს 'მონპელიეში' დაიწყებს,-ვახტანგ ახობაძე 'ბიარიცაში'

"მიდი ოლიმპიკის" ინფორმაციით, ქართველმა ბორჯღალოსანმა ლევან ჩილაჩავამ გუნდი შეიცვალა - ის ახალ სეზონს "მონპელიეში" დაიწყებს.

ჩილაჩავამ საფრანგეთის ვიცე-ჩემპიონთან სამწლიან კონტრაქტს მოაწერა ხელი და ასე დაემშვიდობა "ტულონს". ეს სეზონი ქართველ მორკინალს აქტივში ვერ ჩაეთვლება, რადგან "ტულონის" რიგებში მხოლოდ 11 მატჩში მიიღო მონაწილეობა და მხოლოდ 4-ჯერ იყო იგი ძირითად შემადგენლობაში.

შეგახსენებთ, რომ "ტულონში" ჩილაჩავა მამუკა გორგოძისა და ბადრი ალხაზაშვილის თანაგუნდელი იყო.

"მონპელიეში" ჩილაჩავას თანამემამულეები მიხეილ ნარიაშვილი და კონსტანტინე მიქაუტაძე დახვდებიან. "მონპელიე" ტოპ-14-ის პლეი ოფის ფინალში გავიდა, სადაც ჩემპიონატის მოგების ფავორიტი იყო, მაგრამ მოულოდნელად "კასტრთან" დამარცხდა.

ბასკურმა "ბიარიცმა", რომელიც ელიტურ, მეორე დივიზიონში თამაშობს, ქართველი მორაგბეები დაიმატა. "აჟენიდან" ბასკურ კლუბში ვახტანგ ახობაძე გადავიდა, რომელიც "აჟენში" 2016 წლიდან თამაშობდა.

"ბიარიცში" გადავიდა 20-წლამდელთა ნაკრების ვარსკვლავი თორნიკე ჯალაღონია, რომელმაც ახლახან მსოფლიოს ჩემპიონატზე თავი ისე გამოიჩინა, რომ სიმბოლურ ნაკრებში შეიყვანეს.

სხვათა შორის, "უმცროსი ბორჯღალოსნები" გუშინ დაბრუნდნენ საფრანგეთიდან სამშობლოში. მათ აეროპორტში გულშემატკივრები და ჟურნალისტები დახვდნენ. შეგახსენებთ, რომ საქართველოს 20-წლამდელთა ნაკრებმა ისტორიაში პირველად შეძლო მსოფლიოს ჩემპიონატზე მე-9 ადგილის დაკავება.

მსოფლიო რაგბიმ ბოლო ტურში კოტე მარჯანიშვილის ლელო გამოარჩია და ის ტოპ-5 ლელოში შეიყვანა. სხვათა შორის, ჩემპიონატის განმავლობაში ტურის ტოპ-5-ებში ქართული ლელოები ოთხჯერ მოხვდა.

ყოველდღიური სპორტული გაზეთი "ლელო"
1605
მკითხველის კომენტარები / 0 /
მსგავსი ამბები
რუბრიკის სხვა სიახლეები
;