რაგბი. მსოფლიოს თასი. როგორ ითამაშებს საქართველო? 'ბორჯღალოსნებს' გამადიდებლით დააკვირდებიან

მსოფლიო რაგბის ორგანიზაციის მთავარმა აღმასრულებელმა ოფიცერმა (CEO) დაადასტურა, რომ დიდი ალბათობით, მსოფლიოს თასზე მონაწილე გუნდების რაოდენობა გაიზრდება.

ბრეტ გოსპერმა განაცხადა, რომ საკითხი პრინციპულად გადაწყვეტილია, სხვა საქმეა, როდის შესრულდება. ეს შეიძლება უკვე 2023 წლის მსოფლიოს თასზე მოხდეს, სადაც 20-ის ნაცვლად 24 ნაკრებს დაუშვებენ.

"ჩვენ ყოველთვის გაფართოებაზე ვფიქრობთ. ასე რომ, გუნდების გაზრდა მსოფლიოს თასზე უფრო დროის საკითხია. მაგრამ ჩვენ გვსურს დავრწმუნდეთ, რომ 24 ნაკრები კონკურენტუნარიანი იქნება, რომ მსოფლიოს თასზე ითამაშოს. 2023 წლისთვის დაგეგმილია 20- გუნდიანი ჩემპიონატი, მაგრამ ჯერ იქამდე დრო არის და შეიძლება ვითარება შეიცვალოს.

გოსპერმა საქართველოც ახსენა: "ვნახოთ, როგორ ითამაშებენ მსოფლიოს თასზე ისეთი გუნდები, როგორიც საქართველო და ნამიბიაა. თუ ეს ნაკრებები კარგად გამოვლენ, ჩვენ მეტი მოტივაცია გვექნება ცვლილებების მისაღებად", - განაცხადა გოსპერმა.

ცოტა უცნაურია, ტურნირის უსუსტეს გუნდებში საქართველოს მოხსენიება, რომელმაც წინა მსოფლიოს თასზე ისე კარგად იასპარეზა (4-დან 2 მატჩი მოიგო და არც ახალ ზელანდიასთან შეურცხვენია თავი), რომ იაპონიის საგზური მაშინვე მოიპოვა. გოსპერმა ახსენა საქართველო, მაგრამ არ გახსენებია იმავე კონტექსტში ურუგვაი, რუსეთი, ტონგა...

შეგახსენებთ, რომ "ბორჯღალოსნები" 2003 წლიდან მოყოლებული ყოველთვის გამოდიან მსოფლიოს თასზე (მანამდე ორჯერ ვერ გავიდნენ). სულ ჯამში 4 ტურნირზე საქართველოს ნაკრებმა 4 მატჩი მოიგო და 12 დათმო.

ყოველდღიური სპორტული გაზეთი "ლელო"
1389
მკითხველის კომენტარები / 0 /
მსგავსი ამბები
რუბრიკის სხვა სიახლეები