რაგბი. ნაკრები. ისევ ნულზე! თამაშის ხარისხის მიუხედავად

* საქართველოს ნაკრებმა რაგბი ევროპის ჩემპიონატში ზედიზედ
ორი მატჩი მოიგო ნულზე - 47:0 ბელგიასთან და 64:0 გერმანიასთან.
* გიორგი კვესელაძემ გერმანიასთან ლელოების ჰეთ თრიკი შეასრულა.
* მესამე ტური 3 მარტს გაიმართება, საქართველოს ნაკრები
ესპანეთს მასპინძლობს.

საქართველოს ნაკრებმა ინგლისში, "პომებთან" გამართული ერთობლივი ვარჯიშის შემდეგ გერმანიის ქალაქ ოფენბახში ადგილობრივ ნაკრებს დიდი ანგარიშით 64:0 მოუგო.

ცხადია, ასეთი სხვაობით გერმანიის ნაკრების დამარცხებაში მოულოდნელი არაფერია. გერმანელთა ეროვნული გუნდი ის არ არის "ბორჯღალოსნებს" პრობლემები შეუქმნას. ამდენად, ყველასთვის საინტერესო იყო თამაშის ხარისხი, ამა თუ იმ კომბინაციის შესრულების დონე.

პირველი ტაიმი ამ მხრივ ხარვეზებით სავსე იყო. მართლია, მეტოქეს სამი ლელო გავუტანეთ და 19:0 დავწინაურდით, მაგრამ ტექნიკური წუნი, ბურთის წინ გავარდნა, შეტევის არასწორი მიმართულებით განვითარება, ხშირი იყო. აშკარად ეტყობოდა, რომ მორაგბეებს მოტივაცია აკლდათ.

შესვენების შემდეგ ვითარება ნელ-ნელა გამოსწორდა. სათადარიგო სკამიდან თამაშში ჩართულმა მორაგბეებმა გუნდის გარჯა უფრო ხალასი და ხარისხიანიც გახადეს. ამის შედეგია, რომ "ბორჯღალოსნებმა" მეორე ტაიმში შვიდი ლელო მიითვალეს.

ვინმეს გამორჩევა ძნელია, მაგრამ აუცილებლად უნდა აღვნიშნოთ ახალგაზრდა შუამარბის გიორგი კვესელაძეს ჰეთ თრიკი. ის თამაშიდან თამაშამდე უმატებს და ეროვნულ ნაკრებში იმკვიდრებს ადგილს.

მომდევნო მატჩს საქართველოს ნაკრები 3 მარტს თბილისში გამართავს ესპანეთის ნაკრებთან, რომელმაც თავის მხრივ, შინ დაამარცხა რუმინეთის ეროვნული გუნდი და მსოფლიოს თასის საგზურის აღების რეალური შანსი აქვს.

ესპანელებმა გათამაშების აუტსაიდერებს ბელგიასა და გერმანიას საპრემიო ქულით უნდა მოუგოს, რაც მიუღწეველი მიზანი სულაც არაა. ამ შემთხვევაში, ესპანელები პირდაპირ A ჯგუფში მოხვდებიან.

მატჩის შემდეგ

მილტონ ჰეიგი, საქართველოს ნაკრების მთავარი მწვრთნელი:

"პირველ ტაიმში თამაში არ გამოგვივიდა. ბურთს ვერ ვინარჩუნებდით. წინსვლის ნაცვლად განივად ვუტევდით. მეორე ტაიმში დავალება ცხადი იყო - მეტი მობილიზება, ბურთის შენარჩუნება და აგრესია შეტევაში.

ეს გავაკეთეთ თუ არა, თამაშსაც შეეტყო. ბურთი შევინარჩუნეთ თუ არა, პასებსაც შეეტყო და კოლექტიურ თამაშსაც. მეორე ნახევრით კმაყოფილი ვარ. გარდა ამისა, განსაკუთრებით კმაყოფილი ვარ შეცვლაზე შესული მორაგბეების თამაშით".

ვიქტორ კოლელიშვილი, საქართველოს ნაკრების მესამეხაზელი:

"დიდი კვირა გვქონდა. ინგლისის ნაკრებთან სამდღიანი ერთობლივი ვარჯიშის შემდეგ, ამ თამაშზე კონცენტრირება გაგვიჭირდა. შედეგი კარგია, თუმცა თამაში დასახვეწი და გამოსასწორებელი გვაქვს. ვიმედოვნებ, რომ შემდეგ მატჩში უკეთეს ხარისხს ვაჩვენებთ".

II ტური

გერმანია-საქართველო 0:64
საქართველო: (15-9) წიკლაური, თოდუა (ფრუიძე 70), კაჭარავა (მალაღურაძე 65), კვესელაძე, სიჭინავა, ხმალაძე, აფრასიძე (ლობჟანიძე 41); (1-8) ნარიაშვილი (ჟვანია 61), მამუკაშვილი (ალხაზაშვილი 61), ჩილაჩავა (ფეიქრიშვილი 41), ნემსაძე, ^ჭეიშვილი (გიორგაძე 61), გაჩეჩილაძე, კოლელიშვილი (ცუცქირიძე 68), ლომიძე 10 ლ: კვესელაძე (3,) თოდუა, ჩილაჩავა, ფეიქრიშვილი, გაჩეჩილაძე, გიორგაძე, ჟვანია, ხმალაძე. 7 გ: წიკლაური

გერმანია: (15-9) კოხი, ფიშტერერი, პლუმპე, ფონ გრუმბკოვი, დემბელე, (ფიშერი 10), დოუ პეინი, (პიოსიკი 45); (1-8) ბენდერი (ლიშტმანი 59), ვალეტი (ნგუბანე 60), მარტელი, მარკსი, მაუ, დუვე, რიკსი (რემზი 57), დიკჰოფი.
მსაჯი: კრეიგ ევანსი (უელსი)

რუსეთი-ბელგია 48:7
ესპანეთი-რუმინეთი 22:10

თ მ ფ წ ბ ქ(პ)
1. საქართველო 2 2 0 0 +111 10(2)
2. ესპანეთი 2 2 0 0 +19 8(0)
3. რუსეთი 2 1 0 1 +34 6(2)
4. რუმინეთი 2 1 0 1 +67 5(1)
5. ბელგია 2 0 0 2 -88 0(0)
6. გერმანია 2 0 0 2 -143 0(0)

III ტური

3 მარტი
საქართველო-ესპანეთი
რუმინეთი-რუსეთი
ბელგია-გერმანია

ყოველდღიური სპორტული გაზეთი "ლელო"
1594
მკითხველის კომენტარები / 0 /
მსგავსი ამბები
რუბრიკის სხვა სიახლეები
;