[რაგბი] ნოემბერში ბორჯღალოსნებს ექვს ერში დაუძახებენ?!

აქვს საქართველოს უახლოეს მომავალში ექვსი ერის გათამაშებაში ჩართვის შანსი? მიუხედავად იმისა, რომ ოფიციალურად ამ კუთხით დადებითი არასდროს თქმულა, ევროპული მედია გამუდმებით ტურნირის რეორგანიზაციის საკითხზე მართავს დისკუსიებს. როგორც ჩანს, საკითხი მომწიფდა, ახლა თავიანთ აზრს უკვე ოფიციალური პირებიც აფიქსირებენ...

ამ დღეებში მედიასთან ინგლისური რაგბის კავშირის (RFU) აღმასრულებელმა ბილ სვინიმ ილაპარაკა. უფრო ადრე თავისი მოსაზრება ირლანდიური რაგბის ბოსმა გამოთქვა, რომელმაც მედიაში დიდი რეზონანსი გამოიწვია. ბილ სვინიმ ერთი მხრივ, დაახლოებით ის თქვა, რაც მისმა ირლანდიელმა კოლეგამ. ეს, რა თქმა უნდა, ცუდია, მაგრამ ამ მედალს მეორე მხარეც აქვს. ჯერ დავწეროთ, რა თქვა ინგლისური რაგბის ბოსმა:

„რაგბიში ისეთი სიტუაცია არ გვაქვს, როგორც - ფეხბურთში, სადაც შესაბამისი დონის მე-2 დივიზიონი არსებობს და იქ საუკეთესო ელიტაში უმტკივნეულოდ გადმოდის. ევროპულ რაგბიში ამის ფუფუნება არ გაგვაჩნია. თუკი იტალიას საქართველოთი ჩავანაცვლებთ, ვფიქრობ, არაფერი შეიცვლება. ძალთა განლაგების მიხედვით იგივე სიტუაცია გვექნება. ჩემი აზრით, უფრო მართებული მსოფლიო რაგბის გრძელვადიანი განზრახვაა, რომ ე.წ. მეორე დონის ქვეყნები ნელ-ნელა განვითარდნენ. საინტერესოა გლობალური კალენდრის იდეაც, თუკი პირველი და მეორე რანგის ნაკრებები ერთ ტურნირში ჩართვას მოახერხებენ, ეს, შედარებით სუსტ გუნდებს წინსვლის საშუალებას მისცემთ“.

თუმცა ბილ სვინიმ 6 ერის უახლოეს გეგმებზეც ისაუბრა, იქ კი ჩვენთვის ძალზე საინტერესო ვერსია გამოთქვა.

როგორც მოსალოდნელი იყო, ივლისის ტესტები გადაიდო, სვინის მიაჩნია, რომ ნოემბრის ტესტებიც საფრთხეშია. შესაძლოა, სამხრეთ ნახევარსფეროს ნაკრებებმა ჩრდილოეთში ტესტების ნაცვლად, რაგბი ჩემპიონშიპი ითამაშონ. რას იზამს ამ შემთხვევაში ექვსი ერი?

„პირველ რიგში აღვნიშნავ, რომ თუ რამე ცვლილება იქნება მიღებული ექვსი ერის ტურნირის ფორმატზე, ეს იქნება დროებითი გადაწყვეტილება. მომავალში ყველაფერი ძველებურად დაბრუნდება“.

რა ვარიანტებზე მუშაობს ტურნირი, პირველი, ყველაზე სავარაუდო ვარიანტი ასეთია: ექვსი ერი 5 ტურის ნაცვლად 10 ტურად გაიმართება, შემოდგომით პირველი ნაწილი, ხოლო 2021 წლის თებერვალ-მარტში მეორე ნახევარი.

„ამ შემთხვევაში, აღარავინ ილაპარაკებს იმაზე, რომ ნაკლები თამაში ჩაატარა შინ. ყველაფერი სამართლიანად გადაწყდება, მაგრამ ეს მხოლოდ დროებითი ცვლილება შეიძლება იყოს“.

მეორე ვარიანტი, რომელსაც სვინის აზრით, ნოემბრის ტესტების გაუქმების შემთხვევაში განიხილავენ ასეთია: შემოდგომით დასრულდება წლევანდელი ტურნირი, შემდეგ ჩატარდება სრული ტურნირი წელსვე, 2021 წლის თებერვალ-მარტში კი ახალი შეჯიბრება გაიმართება და ყველაფერი თავის ადგილზე დადგება.

მაგრამ არის მესამე ვარიანტიც, რომელიც ქართული რაგბის ქომაგს დააინტერესებს: გაიმართოს არა ჩვეულებრივი ექვსი ერი, არამედ, ტურნირს დაემატოს მიწვევით სხვა ქვეყნებიც. ტურნირი შინ და გარეთ ფორმატით ჩატარდება.

„ჯერ ადრეა იმაზე ლაპარაკი, რომელი ქვეყნები შეიძლება მოვიწვიოთ, მაგრამ ჩვენ შეგვიძლია საკითხს შემოქმედებითაც მივუდქეთ. ამით რაგბის ნამდვილ ფესტივალს მივიღებთ“.

იტალიური OA Sport მიიჩნევს, რომ მიწვეული ნაკრებებიდან ერთ-ერთი, შესაძლოა, საქართველოს ნაკრებიც აღმოჩნდეს:

„პირველ რიგში, ეს შესაძლოა, იყოს ყველასთვის ცნობილი საქართველო, რომელიც ბოლო წლებია, აკაკუნებს 6 ერის კარზე. შესაძლოა, ეს ყველაზე ნაკლებად მომხიბლავი ჰიპოთეზა იყოს, მაგრამ სავსებით რეალურია.

ეს კარგია იმ მხრივაც, რომ გააბათილებს ჭორებს, თითქოს, საქართველო ექვს ერში იტალიას ცვლის“. თუმცა სხვა წყაროები სამხრეთ აფრიკასა და იაპონიას ასახელებენ. თუკი რაგბი ჩემპიონშიპი ჩატარდება, მაშინ სამხრეთ აფრიკის ნაკრები ფიზიკურად ვერ შეძლებს ექვსი ერის მიწვევის მიღებას.

4501
მკითხველის კომენტარები / 1 /
დალი
0
საქართველოს მიზანმიმართულად ბლოკავენ.პირდაპირ აცხადებენ,რომ ეს ყველაზე ცუდი იდეაა.პირდაპირ აცხადებენ,რომ აქ საქართველოს ნაკრების ჩართვა გამოიწვევს თურმე მის სწრაფ ზრდას პროფესიონალურად და ეს "ყველაზე ცუდი"იქნება თურმე.როგორ ეშინია ყველას პატარა საქართველოსი. ჩვენ კი აქ როგორ გულითადად ვიღებთ ამ უსახურებს.
მსგავსი ამბები
რუბრიკის სხვა სიახლეები
;