რაგბი. ოთხი ერი. სამხრეთ აფრიკა ათი წლის შემდეგ...

ოთხი ერის გათამაშება, რომელიც წლეულს მსოფლიოს თასის გამო შეკვეცილი ფორმატით, ერთ წრედ გაიმართა, სამხრეთ აფრიკის ნაკრების გამარჯვებით დასრულდა. "ბოკემ" ოთხი ერი ათწლიანი შესვენების შემდეგ მოიგო.

სამხრეთაფრიკელებმა ბოლო ტურში არგენტინის ნაკრებთან სტუმრად ითამაშეს და მეტოქეს დამაჯერებლად სძლიეს - 46:13. მასპინძლებმა თამაში აქტიურად დაიწყეს და უკვე მე-2 წუთზე ნიკოლას სანჩესის ფეხით დიდოსტატური გადაცემის შემდეგ, მარჯვენა კიდესთან ახლოს ლელო გარემარბმა სანტიაგო კორდერომ გაიტანა.

ამის მეტი ლელო მასპინძლებს აღარ გაუტანიათ. მერე, მხოლოდ სამხრეთაფრიკელები ზეიმობდნენ მეტოქის ჩათვლის მოედანში შესვლას. სულ კი, ეს "ბოკემ" ხუთჯერ მოახერხა. აქედან ორი ლელო მგეზავის, ანდრე პოლარდის ანგარიშზეა. მანვე ხუთი საჯარიმო და სამი გარდასახვა მიითვალა (სულ 31 ქულა).

შედეგად, როგორც უკვე ვთქვით, სამხრეთ აფრიკამ ოთხი ერი მოიგო, რადგან რამდენიმე საათით ადრე, ავსტრალიის ნაკრებმა შინ დაამარცხა ახალი ზელანდია 47:26. ასეთი დიდი სხვაობით "ოლ ბლექსს" ერთხელ ჰქონდა წაგებული და ისიც ავსტრალისთან 20 წლის წინათ - 1999 წელს.

აღსანიშნავია, რომ 39-ე წუთზე, როცა "ოლ ბლექსი" 12:13 აგებდა, მატჩის არბიტრმა მეორეხაზელ სკოტ ბარეტს წითელი ბარათი უჩვენა და ახალზელანდიელებმა მთელი მეორე ტაიმი კაცნაკლულებმა ჩაატარეს. ეს, ცხადია, გუნდის თამაშს აშკარად დაეტყო და ავსტრალიელებმა, რომელებიც იაპონიაში გასამართ მსოფლიოს თასზე "ბორჯღალოსნების" მეტოქეები არიან, შანსი ხელიდან არ გაუშვეს.

"ვოლაბების" 6 ლელოდან 2 - გარემარბ რის ჰოჯის ანგარიშზეა. ამდენად, ავსტრალიის ნაკრებმა მეორე ადგილი დაიკავა, ხოლო ახალი ზელანდია მესამეს დასჯერდა. ამასთამ ერთად, "ოლ ბლექსმა" მსოფლიოს რეიტინგში პირველი ადგილი უელსს დაუთმო.

III ტური
ავსტრალია-ახ. ზელანდია  47:26
ავსტრალია: 6ლ - ჰოჯი (2), ლეალაიაულოტო-ტუი, ვაითი, კერევი, ბილი. 4გ - ლაეალიიფანო (2), ტომუა (2). 3ს - ლაეალიიფანო
ახ.ზელანდია: 4ლ - ლინერტ-ბარუნი, ბ.ბარეტი, იოანე, ლაუმაპე. 3გ - მოუნგა.
გაძევება: ს.ბარეტი

არგენტინა-.აფრიკა  13:46
არგენტინა: ლ - კორდერო. 2ს,გ - სანჩესი.
.აფრიკა: 5ლ - მბონამი, პოლარდი (2), მალერბე, კოლბი. 5ს,3გ - პოლარდი.
სინბინი: დე კლერი

საბოლოო მდგომარეობა
ს.აფრიკა - 12 ქულა, 2. ავსტრალია - 8, 3. ახ.ზელანდია - 6, 4. არგენტინა - 2

413
მკითხველის კომენტარები / 0 /
მსგავსი ამბები
რუბრიკის სხვა სიახლეები
;