რაგბი. ორი ფინალი მთავარი ფინალის წინ

ოთხი მატჩიც და საქართველოს 2017/18 წლების სეზონის ჩემპიონიც გამოვლინდება. იმ ოთხ გუნდს შორის, რომელიც პირველობისთვის იბრძვის, სამი შარშანაც ამავე სტადიაზე იყო. წლეულს, თბილისის "ლელო" ქუთაისის "აიამ" ჩაანაცვლა, რომელიც გათამაშების ერთ-ერთი მთავარი ფავორიტია.

ჯიქი-ბათუმი

საქართველოს მოქმედი ჩემპიონი გორის "ჯიქი" გასავარდნ ფინალში შინ მიიღებს "ბათუმს". ეს გუნდები შარშანდელი ჩემპიონატის ფინალისტები არიან და მაშინ გამარჯვებას გორელებმა მიაღწიეს, რის შედეგადაც პირველად მოიპოვეს საქართველოს ჩემპიონის ტიტული.

ახლა მათი გზები გასავარდნ ფინალში გადაიკვეთა, დამარცხებული ბრძოლას გამოეთიშება და საბოლოოდ ჩემპიონატში მეოთხე ადგილს დასჯერდება. გამარჯვებულს კი, შესარჩევ ფინალში, "ლოკომოტივსა" და "აიას" დაპირისპირებაში დამარცხებულთან მოუწევს ასპარეზობა დიდ ფინალში გასასვლელად.

"ჯიქმა" და "ბათუმმა" ერთმანეთთან ზუსტად ორი კვირის წინათ, რეგულარული გათამაშების ბოლო ტურში ითამაშეს. გორელებმა მეტოქეს შინ უმასპინძლეს და 12:15 დამარცხდნენ. თუმცა, ისიც აღსანიშნავია, რომ პირველ წრეში "ჯიქმა" ბათუმელებს სტუმრად მოუგო - 22:12.

ცხადია, ის, რაც აქამდე იყო, მატჩზე გავლენას ვერაფრით იქონიებს. "ჯიქი" სწრაფი, ხელდახელ მოთამაშე გუნდია. "ბათუმის" უპირატესობა კი, მძიმე შერკინება და კარგად დალაგებული დაცვა უნდა იყოს. დიდი მნიშვნელობა ექნება დამრტყმელთა ჩუბინობასაც, გაიმარჯვებს ის, ვისაც ნერვები არ უმტყუნებს.

ლოკომოტივი-აია

თბილისის "ლოკომოტივისა" და ქუთაისის "აიას" დაპირისპირება ძველი ამბავია. იმდენად ძველი, რომ ცოტა ვინმეს თუ ახსოვს, საბჭოთა ეპოქაში მათი ერთმანეთთან და რუსთა გუნდებთან ჭიდილი. წესით, ორივე ამ გუნდმა დიდ ფინალში უნდა ითამაშონ. ასე იქნება სწორი, როგორც ისტორიულად, ისევე დღევანდელი მდგომარეობითაც.

"აია" მთელი სეზონის განმავლობაში ლიდერობდა. "ლოკომოტივი" მუდამ კვალდაკვალ მისდევდა და ბოლო ტურში გაუსწრო კიდეც. უფრო სწორად, გუნდებმა თანაბარი ქულები დააგროვეს. ორივეს ერთმანეთთან თითო მოგება ჰქონდა, ორივე სამი ქულის სხვაობით. ბოლოს, ურთიერთშეხვედრებში გატანილი ლელოები დათვალეს და "ლოკომოტივს" ერთით მეტი აღმოაჩნდა. ამიტომ, რეგულარული გათამაშების პირველი ადგილი და შესარჩევი ფინალის მასპინძლობის უფლება "ლოკომოტივს" ერგო.

ცხადია, ეს უპირატესობაა. თუმცა, "აიას" დასაკარგავი არაფერი აქვს. მარცხის შემთხვევაში ის წინასწარ ფინალში ითამაშებს და იქიდან შეეცდება დიდ ფინალში მოხვედრას. ამიტომ, წესით, ქუთათურებმა ფსიქოლოგიურ წნეხს უნდა გაუძლონ. თუმცა, იმავეს თქმა შეიძლება "ლოკომოტივზეც". ერთი სიტყვით, გამარჯვებული პირდაპირ დიდ ფინალში ითამაშებს და წინასწარ ფინალში გამარჯვებულს დაელოდება.

შესარჩევი ფინალი

28 აპრილი ლოკომოტივი-აია 16:00

გასავარდნი ფინალი

29 აპრილი ჯიქი-ბათუმი 16:00

6 მაისი წინასწარი ფინალი

13 მაისი ფინალი

ყოველდღიური სპორტული გაზეთი "ლელო"
916
მკითხველის კომენტარები / 1 /
ავტორს
0
დასაკარგავი - არასწორია
---
დასაკარგი

პ.ს.
ვწეროთ და ვიმეტყველოთ ქართულად, გამართულად - განსაკუთრებით მედიის წარმომადგენლებმა
მსგავსი ამბები
რუბრიკის სხვა სიახლეები
;