რაგბი. პრესკონფერენცია: დაცულია თუ არა ქომაგის ინტერესი?

* ნოემბრის ტესტების საშინაო მატჩებს "რაგბი ტვ" შემოგვთავაზებს.
* უელსთან საგარეო მატჩის ტრანსლირების უფლება "იმედმა" შეიძინა.
* რაგბის კავშირი მომავალში არც ერთ კომპანიას აღარ გადასცემს უსასყიდლოდ რაიმე მოვლენის ექსკლუზიური ტრანსლირების უფლებას.

საქართველოს ნაკრები ნოემბრის ტესტებზე ორ მატჩს თბილისში გამართავს კანადისა და აშშ-ის ნაკრებებთან. როგორც საქართველოს რაგბის კავშირმა დადგინა ამ მატჩების ტრანსლაციას "რაგბი ტვ" განახორციელებს. სტუმრად, უელსთან თამაშის ტრანსლაციის უფლება კი, ტელეკომპანია "იმედმა" შეიძინა.

აქამდე, წლების განმავლობაში საქართველოს ეროვნული ნაკრების თამაშების ტრანსლაციას საზოგადოებრივი მაუწყებელი აწარმოებდა. მისი "რაგბი ტვ"-ით ჩანაცვლებას საზოგადოებაში არაერთგვაროვანი რეაქცია მოჰყვა. სწორედ ამის გამო საქართველოს რაგბის კავშირის პრეზიდენტმა გოჩა სვანიძემ პრესკონფერენცია გამართა, სადაც მან შემდეგი განაცხადა:

"უნდა მოგახსენოთ, რომ "საზოგადოებრივმა არხმა" არაერთხელ დაამტკიცა, რომ არის ქართული სპორტის და მათ შორის, რაგბის განვითარების ხელშემწყობი მედიასაშუალება. რაგბის კავშირისა და საზოგადოებრივი მაუწყებლის ურთიერთობა ათწლეულებს ითვლის. რაგბის დღევანდელი პოპულარობა და წარმატება სწორედ ამ მეგობრობისა და პარტნიორობის შედეგია.

საქართველოს რაგბის კავშირს მიაჩნია, რომ დღეს ქართულ რაგბის მნიშვნელოვანი წვლილი შეაქვს არა მხოლოდ სპორტში, არამედ, მთელი ქართველი საზოგადოების გაერთიანებაში. ამ საქმიანობაში უმნიშვნელოვანეს როლს ასრულებენ მასობრივი ინფორმაციის საშუალებები.

რაგბის პოპულარობის ზრდამ გამოიწვია კერძო ინიციატივითა და ინვესტიციით სპეციალიზებული არხის, "რაგბი ტვ"-ის შექმნა. რაგბის კავშირი შეეცდება, კანონის ფარგლებში, მაქსიმალური დახმარება აღმოუჩინოს ამ ინიციატივას და ხელი შეუწყოს მის პოპულარობას, ვინაიდან "რაგბი ტვ"-ის გაძლიერება შემდგომში პირდაპირ აისახება ქართული სარაგბო კლუბების ფინანსურ მდგომარეობაზე.

მიუხედავად ამგვარი, ერთი შეხედვით, პროტექციონისტური დამოკიდებულებისა "რაგბი ტვ"-ის მიმართ, საქართველოს რაგბის კავშირი მიესალმება სხვა ტელეკომპანიების, მათ შორის ტელეკომპანია "იმედისა" და საზოგადოებრივი მაუწყებლის აქტივობას, რაც გამოიხატება სარაგბო მატჩებისა თუ ტურნირების რეპორტაჟების შეძენასა და სხვა თემატური გადაცემების შექმნაში.

გვინდა გულისტკივილით აღვნიშნოთ, რომ საზოგადოებრივი მაუწყებლის ხელმძღვანელობის მიერ გუშინ გავრცელებულმა განცხადებამ შემოდგომის ტესტების ანუ "თიბისი რაგბის სერიის" რეპორტაჟის უფლების საზოგადოებრივი მაუწყებლობისათვის მიუცემლობის შესახებ გამოიწვია გაუგებრობა გულშემატკივართა შორის.

აღნიშნულთან დაკავშირებით, ვაცხადებთ, რომ საზოგადოებრივი მაუწყებელი ითხოვდა ამ მატჩების ტრანსლირების ექსკლუზიურ უფლებას, რაც არ შედის საქართველოს რაგბის კავშირის სტრატეგიულ ინტერესებში და ამის გამო, ეთქვა უარი. საზოგადოებრივ მაუწყებელს შევთავაზეთ, რომ თუკი მას პარალელურ რეჟიმში არ სურდა რეპორტაჟის გადაცემა, მიიღებდა "რაგბი ტვ"-ისგან სიგნალს უფასოდ. ამაზე საზოგადოებრივმა მაუწყებელმა უარი განაცხადა, ვინაიდან მისი კატეგორიული მოთხოვნა გახლდათ ექსკლუზიური უფლების მოპოვება. ამგვარი უფლებით საზოგადოებრივმა მაუწყებელმა უფასოდ ისარგებლა საქართველოში წელს ჩატარებულ 20-წლამდელთა მსოფლიოს ჩემპიონატზე, თუმცა, იქვე გავაფრთხილეთ, რომ მომავალში საქართველოს რაგბის კავშირი არ დაუშვებდა რომელიმე ტელეკომპანიისთვის უსასყიდლოდ ექსკლუზიური უფლების მინიჭებას, არამედ, ხელს შეუწყობდა მედიასაშუალებების ერთმანეთთან კოოპერირებას.

იმედია, საქართველოს რაგბის კავშირის ეს განმარტება აღქმული იქნება პოზიტიურად და საზოგადოებრივი მაუწყებელი გადახედავს თავის დამოკიდებულებას რაგბის მიმართ, რაც დადებითად აისახება როგორც გულშემატკივართა მიმართ დამოკიდებულებაში, ასევე რაგბის შემდგომ პოპულარიზაციაში. რაგბის კავშირი განსაკუთრებით ფრთხილად ეკიდება მისი ყოფილი თუ მოქმედი პარტნიორების ინტერესებს და იმ ურთიერთობას, რომელიც ჩამოყალიბდა თანამშრომლობის გარკვეულ ეტაპებზე და იმედს გამოვთქვამთ, ცალკეული დროებითი გაუგებრობები არ მოახდენს უარყოფით გავლენას ჩვენს პარტნიორობაზე."

ყოველდღიური სპორტული გაზეთი "ლელო"
891
მკითხველის კომენტარები / 0 /
მსგავსი ამბები
რუბრიკის სხვა სიახლეები