[რაგბი] სამი პლეი ოფშია, ერთი იბრძვის

ჩემპიონთა თასის გათამაშებაში პლეი ოფში გასვლისთვის ბრძოლას ქართველთა სამი გუნდიდან ერთი, „კლერმონი“ განაგრძობს. „რასინგმა“ კი, საგზური ერთი ტურით ადრე მოიპოვა.

დავით ზირაქაშვილისა და ბექა კაკაბაძის „კლერმონმა“ მეხუთე ტურში შინ დაამარცხა უშუალო კონკურენტი, ირლანდიური „ალსტერი“ 29:13 და 20 ქულით გალიდერდა. „ალსტერი“ მას სამი ქულით ჩამორჩება. ბოლო ტურში ჩვენებურთა გუნდი სტუმრად ეთამაშება უმოტივაციოდ დარჩენილ ინგლისურ „ჰარლიქვინზს“ და პირველი ადგილის დასაკავებლად მხოლოდ გამარჯვება სჭირდება. ქართველ მორაგბეებს „ალსტერთან“ არ უთამაშიათ.

ტურნირს გამოეთიშა მიხეილ ნარიაშვილის, უშანგი ჭეიშვილის, ლუკა აზარიაშვილის, ლევან ჩილაჩავას, კონსტანტინე მიქაუტაძისა და გელა აფრასიძის „მონპელიე“, რომელიც სტუმრად დამარცხდა ინგლისურ „გლოსტერთან“ - 6:29. ქართველებიდან ჭეიშვილმა, აზარიაშვილმა, მიქაუტაძემ და აფრასიძემ ითამაშეს.

პლეი ოფში თამაშის უფლება მოიპოვა ვასილ კაკოვინისა და გურამ გოგიჩაშვილის „რასინგმა“, რომელმაც შინ ირლანდიურ „მანსტერს“ მოუგო 39:22. ქართველებს არ უთამაშიათ.

n n n

ჩელენჯ კაპის გათამაშების ჯგუფური ეტაპის დასრულებამდე ერთი ტურით ადრე ქართველ მორაგბეთა გუნდებმა „ტულონმა“ და „ბორდომ“ პლეი ოფში თამაშის უფლება გაინაღდეს.

მამუკა გორგოძისა და ბექა გიგაშვილის „ტულონმა“, რომელიც B ჯგუფში ასპარეზობს, ხუთი თამაშიდან ხუთივე მოიგო. ტულონელებმა მეხუთე ტურში სტუმრად დაამარცხეს უშუალო კონკურენტი, უელსური „ჰლანეჰლი“ 27:15. ახლა, ტულონს 22 ქულა აქვს და მეტოქეთაგან მიუწვდომელია. „ჰლანეჰლი“, რომელიც მე-2 ადგილზეა, მას 8 ქულით ჩამორჩება.

ბექა გიგაშვილი ძირითად შემადგენლობაში იყო. ის 52-ე წუთზე შეცვალეს, მაგრამ ერთი წუთის შემდეგ ტრავმირებული პირველხაზელის ნაცვლად ისევ მოედანზე დაბრუნებამ მოუწია. ის მატჩის საუკეთესო მორაგბედ აღიარეს.

ხუთიდან ოთხი თამაში მოიგო ლექსო ყაულაშვილის, ბექა გორგაძისა და ლაშა ტაბიძის „ბორდომ“. მეხუთე ტურში ჟირონდელებმა შინ სძლიეს უშუალო კონკურენტ „ედინბურგს“ და პლეი ოფში თამაშის უფლება გაინაღდეს. „ბორდოს“ 22 ქულა აქვს. მას „ედინბურგი“ 6 ქულით ჩამორჩება.

ყაულაშვილი თამაშში 50-ე წუთიდან ჩაერთო. სხვა ქართველ მორაგბეებს არ უთამაშიათ.

ჩელენჯ კაპის გათამაშებაში მომდევნო ეტაპზე გასვლის შანსი დაკარგა ყველაზე „ქართულმა“ ფრანგულმა კლუბმა „ბრივმა“. კარლენ ასიეშვილის, სოსო ბეკოშვილის, ვანო კარკაძის, ოთარ გიორგაძის, ვასილ ლობჟანიძისა და თედო აბჟანდაძის გუნდმა სტუმრად ითამაშა ჯგუფის ლიდერ „ბრისტოლთან“ და დიდი ანგარიშით 3:52 დამარცხდა.

ერთადერთი საჯარიმო ბრიველების მხრიდან თედო აბჟანდაძემ გაიტანა, რომელიც 57-ე წუთზე შეცვალეს, იმავდროულად მოედანი ლობჟანიძემაც დატოვა. გიორგაძემ სრულად ითამაშა, ასიეშვილი და კარკაძე თამაშში ერთდროულად, 41-ე წუთიდან ჩაერთნენ.

332
მკითხველის კომენტარები / 0 /
მსგავსი ამბები
რუბრიკის სხვა სიახლეები
;