რაგბი. საქართველოს ჩემპიონატი: ვინ იქნება ფავორიტი?

საქართველოს ჩემპიონატის უმაღლესი ლიგა 31 აგვისტოს დაიწყება. განაცხადების წარდგენის ბოლო ვადა გუშინ ამოიწურა.

ყველა (10) კლუბმა შემადგენლობები დათქმულ დროს წარადგინა და საშუალება მოგვეცა, მომავალი ჩემპიონატის სავარაუდო სურათი წარმოგვედგინა. ვინ იქნება ფავორიტი? ვის მოუწევს უმაღლეს ლიგაში დარჩენისთვის ბრძოლა? მოდი, მივყვეთ თანამიმდევრულად...

საქართველოს ჩემპიონი თბილისის "ლოკომოტივია", რომლის შემადგენლობაც წლეულს დიდად არ შეცვლილა. "რკინიგზელებს" ქუთაისის "აიადან" საკმაოდ სერიოზული ძალა დაემატათ - უკანახაზელი ზურაბ ძნელაძე საქართველოს შვიდკაცა რაგბის ნაკრების წევრია და ერთნაირად კარგად შეუძლია თამაში როგორც ფულბეკად, ისე შუამარბად და გარემარბად. გასულ სეზონში ის "აიას" საუკეთესო მელელოვე იყო.

ქვეყნის ვიცე ჩემპიონმა ქუთაისის "აიამ" ძნელაძე კი მოისაკლისა, მაგრამ ირლანდიიდან მობრუნდა საქართველოს ახალგაზრდული ნაკრების მგეზავი თედო აბჟანდაძე, რომელიც ქუთათურებისთვის ნამდვილად სერიოზული დანამატია. "აიას" საკმაოდ კარგად ორგანიზებული სარაგბო სკოლა აქვს და შევსებას ძირითადად სწორედ იქიდან იღებს.

საქართველოს ჩემპიონატის ბრინჯაოს პრიზიორმა გორის "ჯიქმა" მწვრთნელთა შემადგენლობა შეცვალა. ფრანგი ოლივიე საოში პირველი უცხოელი სპეციალისტია, რომელიც ქართულ კლუბს უთავკაცებს. მისი ასისტენტი ყოფილი "ბორჯღალოსანი" ლევან დათუნაშვილი იქნება, რომელმაც სარაგბო კარიერა წლეულს დაასრულა.

"ჯიქის" ყოფილი დამრიგებელი პალიკო ჯიმშელაძე კი მარნეულის "არმაზში" გადაბარგდა მთავარი მწვრთნელის ასისტენტად. გორელთა გუნდი დატოვა ასევე მგეზავმა მამუკა ნინიძემ, რომელიც მშობლიურ ქალაქ ბათუმში დაბრუნდა.

ბათუმური გუნდი საკმაოდ მოღონიერდა. ზღვისპირელთა რიგები ბახვა კობახიძემ დატოვა. ბათუმელთა ექვსი ახალწვეულიდან ოთხი - საქართველოს ეროვნული ნაკრების წევრია - ალექსანდრე თოდუა ("ლელო"), საბა შუბითიძე, ანაზორ სიჭინავა (ორივე - "აკადემია") და ვაჟა ხუციშვილი ("ხარები"). მათ გარდა, გუნდს დაემატნენ გუგა ხანთაძე ("აია") და მამუკა ნინიძე ("ჯიქი"), რომელზეც ზემოთ უკვე ვთქვით. შეგახსენებთ, რომ "ბათუმში" კიდევ ორი "ბორჯღალოსანი" - ლაშა ხმალაძე და გიორგი თხილაიშვილი ირჯება. უნდა ვივარაუდოთ, რომ "ბათუმი" წლეულს ჩემპიონობის უმთავრესი კანდიდატი იქნება და გამორიცხული არ არის, ისევ ითამაშოს ევროთასებზე.

კარგი მატება აქვს თბილისის "ლელოსაც". გუნდს გორის "ჯიქიდან" დაუბრუნდა შერკინების კვაჭი გიორგი ჭყოიძე. უკანა ხაზს კი რეზო ჯინჯიხაძე და საქართველოს ნაკრების წევრი, თბილისის "აკადემიის" აღზრდილი სოსო მათიაშვილი გააძლიერებენ.

"ლელოს" რიგები დატოვა საქართველოს ნაკრების კიდევ ერთმა წევრმა, გარემარბმა ალექსანდრე თოდუამ. აღსანიშნავია, რომ გუნდში ერთბაშად სამმა, ძალიან მაღალი დონის ფულბეკმა მოიყარა თავი - მერაბ კვირიკაშვილმა, სოსო მათიაშვილმა და ბექა მამუკაშვილმა. "ლელო" წლეულს უფრო სოლიდურად გამოიყურება და "ბათუმთან", "აიასა" და "ლოკომოტივთან" ერთად, ჩემპიონობის უმთავრესი კანდიდატიც იქნება.

რუსთავის "ხარები" გასულ სეზონში პლეი ოფის მონაწილე იყო და ჩემპიონატი საბოლოოდ მე-6 ადგილზე დაასრულა. ამაში ლომის წილი ცხრა ნომერსა და გუნდის ლიდერ ვაჟა ხუციშვილს მიუძღოდა, რომელმაც მშობლიური გუნდი დატოვა და "ბათუმში" გადაწყვიტა კარიერის გაგრძელება. რუსთავული გუნდიძირითადად საკუთარი სკოლის აღზრდილებით შეივსო.

თბილისის "აკადემია" ყოველი სეზონის წინ კარგავს მოთამაშეებს. საბა შუბითიძე, ანზორ სიჭინავა და სოსო მათიაშვილი ამ გუნდის ლიდერები იყვნენ და მათი

წასვლა გუნდს აშკარად დაეტყობა. ისევე, როგორც ყოველთვის, "აკადემია" ამჯერადაც საკუთარი აღზრდილების იმედადაა.

მარნეულის "არმაზის" მთავარი მწვრთნელი ირაკლი მაჩხანელია, მის ასისტენტებად კი ახალგაზრდული ნაკრების მწვრთნელები - ილია მაისურაძე და ლადო კილასონია იმუშავებენ. ამ შთამბეჭდავ სიას, როგორც ზემოთ ვთქვით, დაემატება პალიკო ჯიმშელაძეც, რომელმაც შარშანწინ გორის "ჯიქი" ჩემპიონი გახადა.
"არმაზში" მრავლად არიან ეროვნული და ახალგაზრდული ნაკრების წევრები თუ კანდიდატები. შესაბამისად, კარგი, ბრძოლისუნარიანი გუნდის შეკვრა სამწვრთნელო შტაბს არ უნდა გაუჭირდეს. დროა, "არმაზმა" პლეი ოფში გასვლისთვის იბრძოლოს.

"არმიას" ბოლო დროს ძალიან გაუჭირდა. თავდაცვის სამინისტრომ მის დაფინანსებაზე უარი თქვა და ახლა პატრონად "ვეტერანთა კავშირი" ჰყავს, გუნდის ახალი მთავარი მწვრთნელი კი ლეგენდარული "ბორჯღალოსანი" ლევან ცაბაძეა. არმიელთა რიგებს "ბათუმიდან" დაუბრუნდა ფულბეკი ბახვა კობახიძე. გუნდს აქვს იმის პოტენციალი, რომ პლეი ოფში მოხვედრისთვის იბრძოლოს.

საქართველოს ჩემპიონატის უმაღლესი ლიგის დებიუტანტს, პატარძეულის "ვეფხვებს", წლეულს საუკეთესოთა შორის ფეხის მოკიდება ძალიან გაუჭირდება. არადა, გუნდს რამდენიმე კარგი მორაგბე დაემატა, რომლებიც "ვეფხვებს" ამ ამოცანის გადაჭრაში დაეხმარებიან - გიორგი ჭურაძე, ვალერი ლეგაშვილი (ორივე - "არმაზი"), რევაზ ბროძელი, ოთარ ქარჩავა (ორივე - "ჯიქი"), ჟორა მღებრიშვილი ("აია"), მიხეილ ზურიკაშვილი ("არმია"), გიორგი თუთბერიძე ("ბაგრატი"), ნიკა ბეჟუაშვილი ("ხარები") და ლევან გომიაშვილი ("როდეზი").

ყოველდღიური სპორტული გაზეთი "ლელო"
566
მკითხველის კომენტარები / 0 /
მსგავსი ამბები
რუბრიკის სხვა სიახლეები