რაგბი. საქართველოს ჩემპიონატი. ლოკომოტივი ლიდერობას მაინც ვერ შესწვდა

"შევარდენის სანაკრებო ბაზაზე" საქართველოს ჩემპიონატის მეხუთე ტურის გამოტოვებულ მატჩში თბილისის "ლოკომოტივმა" "ბათუმს" უმასპინძლა და 24:15 დაამარცხა.

სტუმრებმა სათამაშოდ თითქმის სათადარიგო შემადგენლობა გამოიყვანა. ძირითადის მორაგბეები კი თამაშში მეორე ტაიმიდან ჩაერთნენ, თუმცა მატჩის გადარჩენა ვერაფრით შეძლეს. მეტიც, "ბათუმს" შეეძლო საპრემიო ქულა მაინც მოეპოვებინა, მაგრამ უშედეგოდ გაისარჯა.

"ლოკომოტივმა"" თამაში აქტიურად დაიწყო და საწყის 14 წუთში ორი ლელო გაიტანეს. ორივე ჯერზე რკინიგზელებს საჯარიმოს დარტყმა შეეძლოთ, მაგრამ ასე არ გაისარჯნენ.

მე-6 წუთზე მგეზავად გამწესებულმა გიორგი აფციაურმა მეტოქის 22-ში საჯარიმო სწრაფად გაითამაშა და ბურთი მესამეხაზელ ლაშა ფოფხაძეს გაატანა, რომელმაც ხაზი გაჭრა და ლელოში შევიდა.

რვა წუთის შემდეგ რკინიგზელებმა ბურთი აუტში გადაიტანეს. დერეფნიდან მოლი ააგორეს, მეტოქეს უკან სწრაფად დაახევინეს. ბოლოს ბურთი ხელში დაჩი კოპაძეს ჰქონდა. ვახტანგ კავთიძემ გარდასახვები ორჯერვე არაზუსტად დაარტყა - 10:0.

სტუმრებმა მდგომარეობა მალევე გამოასწორეს. თამაშის ტემპს უმატეს და უპირატესობაც მოიპოვეს. მე-18 წუთზე დურმიშხან ჯაბნიძემ საჯარიმო დარტყმით ანგარიშში სხვაობა შეამცირა.

5 წუთში კი მასპინძლების შეცდომით კარგად ისარგებლა გიორგი მენაბდემ, მან რკინიგზელთა მიერ დაკარგულ ბურთს ფეხი წაჰკრა და ლელოში დაამიწა. ჯაბნიძემ გარდასახვა ზუსტად დაარტყა - 10:10.

პირველი ტაიმის ბოლო ათ წუთში ისევ "ლოკომოტივი" დომინირებდა. 31-ე წუთზე რკინიგზელებმა ისევ მოლით გადაწყვიტეს ლელოს გატანა, რომელიც ბათუმელმა პირველხაზელმა შოთა გოგისვანიძემ განზრახ ჩააქცია, რის გამოც არბიტრმა საჯარიმო ლელოთი დააფიქსირა. წესის დამრღვევი კი სინბინში გაუშვა - 17:10.

სამი წუთის შემდეგ ლაშა გედეხაურმა კარის პირდაპირ გაჭრა ხაზი, აფციაურმა და კავთიძემ ბურთი მარჯვნივ ჩაათამაშეს, ლევან გოგოლაშვილი მცველს გაექცა და ლელოში შეაღწია. კავთიძემ რთული პოზიციიდან გარდასახა - 24:10. ასე დასრულდა პირველი ტაიმი.

შესვენების შემდეგ თამაშის სურათი მთლიანად შეიცვალა. მოედანზე "ბათუმის" ძირითადი შემადგენლობის მოთამაშეები ერთბაშად გამოჩნდნენ. შედეგად, რკინიგზელებმა მონაგარს მეორე ნახევარში ვეღარაფერი შესძინეს. ბათუმელებს კი მე-60 წუთიდან კაცნაკლულებს მოუწიათ თამაშმა.

შეცვლაზე შესულ ხვიჩა ბუჯიაშვილს მსაჯმა ჯერ ყვითელი ბარათი უჩვენა, ხოლო რამდენიმე ჩხუბის პროვოცირებისთვის წითელი ბარათით გააძევა. მიუხედავად ამისა, "ბათუმი" ჯიუტად ცდილობდა მატჩის გადარჩენას.

71-ე წუთზე ზღვისპირელებმა მეტოქის ლელოდან ხუთ მეტრში დერეფანი მოიგეს, მოლი დაძრეს და ბოლოს ბურთი ხელში მეორეხაზელი არჩილ ლიქაძე იყო. ჯაბნიძემ გარდასახვა ვერ გაიტანა - 15:24.

თამაშის ბოლომდე ანგარიში აღარ შეცვლილა. შედეგად, "ლოკომოტივმა" სატურნირო ცხრილში მეორე ადგილზე გადაინაცვლა. "ბათუმი" კი ისევ მეხუთეა. აღსანიშნავია, რომ მატჩის ოქმის მიხედვით წითელი ბარათით დასჯილია ზვიად მაისურაძეც. როგორც ჩანს, ინციდენტი თამაშის შემდეგ მოხდა.

ლოკომოტივი-ბათუმი 24:15

ლოკომოტივი (15-9) წიკლაური, გოგოლაშვილი, გაგოშვილი, კავთიძე, შკინინი, აფციაური, გედახური (ჩიღვინაძე 77). (1-8) ვ.ქვათაძე (გოგიჩაშვილი 60), ხიდეშელი (ი. ქვათაძე 63), ქართველიშვილი (არაბული 50), კოპაძე, გეგია (დარსელია 75), გასვიანი (მაისურაძე 46), ფოფხაძე, ამირანაშვილი.

4 ლ: საჯარიმო, ფოფხაძე, კოპაძე, გოგოლაშვილი. გ: კავთიძე.
სინბინი: ამირნაშვილი, კოპაძე
გაძევება: მაისურაძე

ბათუმი (15-9) ტუჩაშვილი, კირინი, ტრაპაიძე, გოგიტიძე, აბუსელიძე (ხმალაძე 41), ჯაბნიძე, ნინიძე (1-8) ჯიჯავაძე (ერისთავი 41), მენაბდე (მამრიკიშვილი 41), გოგისვანიძე (დონაძე 43), ალიქაძე, ბეჟანიძე (ქოიავა 41), კორტავა (ფუტკარაძე 49), ფერსელიძე (მიქაძე 41), ზაქარაძე (ბუჯიაშვილი 42).
2 ლ: მენაბდე, ალიქაძე. გ, ს: ჯაბნიძე.

სინბინი: გოგისვანიძე, ბუჯიაშვილი
გაძევება: ბუჯიაშვილი

თ მ ფ წ ბ ქ(პ)
1. აია 10 9 0 1 +147 38(2)
2. ლოკომოტივი 10 8 0 2 +96 37(5)
3. ლელო 10 8 0 2 +96 36(4)
4. ჯიქი 10 5 1 4 +26 28(6)
5. ბათუმი 10 5 1 4 +87 28(6)
6. ხარები 10 5 1 4 -34 23(1)
7. აკადემია 10 3 0 7 +9 20(8)
8. არმაზი 10 2 1 7 -59 15(5)
9. არმია 10 2 0 8 -140 9(1)
10. ბაგრატი 10 1 0 9 -228 5(1)

XI ტური. 26 იანვარი

ლოკომოტივი-ხარები

27 იანვარი

აია-აკადემია
არმია-ლელო

28 იანვარი

ბაგრატი-ბათუმი
არმაზი-ჯიქი

ყოველდღიური სპორტული გაზეთი "ლელო"
817
მკითხველის კომენტარები / 0 /
მსგავსი ამბები
რუბრიკის სხვა სიახლეები
;