რაგბი. საქართველოს ჩემპიონატი. I ლიგა: მეორე წრეც დაიწყო

საქართველოს ჩემპიონატის პირველი ლიგის გათამაშებაში მეორე წრე დაიწყო. გათამაშების ლიდერმა პატარძეულის "ვეფხვებმა" აუტსაიდერს, თბილისის "ხულიგანას" უმასპინძლა და, მიუხედავად იმისა, რომ გადახალისებული შემადგენლობით ითამაშა, სტუმრები დამაჯერებლად დაამარცხა - 69:0.

"ვეფხვებს" უახლოესი მდევარი ქუთაისის "არესი" ოთხი ქულით ჩამორჩა მას შემდეგ, რაც სტუმრად ფრედ ითამაშა თბილისის "დინამოსთან" - 20:20.

პირველობისთვის რეალურად ეს გუნდები იბრძვიან და მომდევნო ტურში, ქუთაისში, სწორედ "არესისა" და "ვეფხვების" დაპირისპირება შედგება. ეს მატჩი ბევრ კითხვაზე გასცემს პასუხს. გამარჯვების შემთხვევაში პატარძეულელები ძალიან დიდ ნაბიჯს გადადგამენ წინ უმაღლესი ლიგისკენ.

"არესს" ერთი ქულით ჩამორჩება და ასევე პირველობაზე აქვს პრეტენზია ბოლნისის "ყოჩებს", რომელმაც ოზურგეთის "არწივებს" უმასპინძლა და დიდი ანგარიშით დაამარცხა 47:14. ბოლნისელთა გუნდს დაუბრუნდა მისივე აღზრდილი, მგეზავი თემურ სოხაძე, რომელიც ყოფილი "ბორჯღალოსანია". ისევ მშვენიერ ფორმაშია გარემარბი ირაკლი გეგენავა, რომელსაც ახლახან საქართველოს შვიდკაცა ნაკრებში უხმეს.

სასიხარულო სიახლეა ოზურგეთელთა ბანაკში: მალე ოზურგეთის ზვანეს უბანში მდებარე "არწივების" სარაგბო არენაზე საფუძვლიანი რეკონსტრუქცია დაიწყება. განახლებულ მოედანზე ოზურგეთელები მომავალი სეზონიდან იასპარეზებენ.

I ლიგა. VIII ტური
ყოჩები-არწივები 47:14
დინამო-არესი 20:20
ვეფხვები-ხულიგანა 69:0
ივერია-იუნკრები 12:54

ა  გ თ მ ფ წ ბ ქ(პ)
1. ვეფხვები 8 7 0 1 +255 34(6)
2. არესი 8 6 1 1 +128 30(4)
3. ყოჩები 8 6 1 1 +81 29(3)
4. არწივები 8 3 1 4 -69 15(1)
5. ივერია 8 3 0 5 -100 14(2)
6. დინამო 8 2 1 5 -26 13(3)
7. იუნკრები 8 2 1 5 -46 12(2)
8. ხულიგანა 8 0 1 7 -223 4(2)

IX ტური
დინამო-არწივები, არესი-ვეფხვები, ხულიგანა-ივერია, იუნკრები-ყოჩები.

ყოველდღიური სპორტული გაზეთი "ლელო"
1825
მკითხველის კომენტარები / 0 /
მსგავსი ამბები
რუბრიკის სხვა სიახლეები
;