რაგბი. ტესტები. რეიტინგში დავქვეითდით, - კვესელაძე სიმბოლურში, მალაღურაძეაც

საქართველოს ნაკრები იტალიიდან დაბრუნდა და ტრადიციულად "შევარდენის სანაკრებო ბაზაზე" განაგრძობს მზადებას. რა ცვლილებები მოხდა გუნდში "სკუადრა აძურასთან" მატჩის შემდეგ, ჯერჯერობით, უცნობია.

შეგახსენებთ, რომ გასულ უქმეებზე "ბორჯღალოსნებისა" და იტალიის ნაკრების დაპირისპირებაში დაშავდა ფულბეკი სოსო მათიაშვილი, ტრავმირებულია ასევე გარემარბი გიორგი კოშაძე. გამორიცხული არ არის ამ მორაგბეებმა ნოემბრის ტესტების დარჩენილ ორ მატჩში ვერ იასპარეზონ.

აღსანიშნავია, რომ სარაგბო პორტალმა ultimaterugby.com -მა საქართველოს ნაკრების მესამეხაზელი ბექა გორგაძე სიმბოლურ ნაკრებში შეიყვანა. ამავე გამოცემამ კიდევ ერთი სიმბოლური ნაკრები, შეცვლაზე შესული საუკეთესო თხუთმეტეული დაასახელა. გარემარბის (#14) პოზიციაზე გიორგი მალაღურაძეა დასახელებული. ცხადია, ეს გამოცემის შეცდომაა, რადგან გარემარბის პოზიციაზე შეცვლაზე გიორგი კოშაძეს ადგილი გიორგი კვესელაძემ დაიკავა და მართლაც შესანიშნავად ჩაერთო თამაშში. აი, რას წერს მასზე საიტი:

"21 წლის მორაგბემ შესანიშნავად წარმოაჩინა საკუთარი შესაძლებლობები. ბურთით 45 მეტრი გაიარა, დაჩაგრა მოწინააღმდეგის ერთი მცველი და სალელოვე გადაცემა გააკეთა".

დიახ, საუბარი ნამდვილად გიორგი კვესელაძეზეა. სასიხარულოა, რომ ეს გამოცემა ჩვენს მორაგბეებს სათანადო ყურადღებას უთმობს, რასაც ვერაფრით ვიტყვით, სხვა პოპულარულ ვებგვერდებზე.

აქვე ისიც უნდა აღვნიშნოთ, რომ იტალიასთან მარცხის შემდეგ სარეიტინგო კიბეზე ერთი საფეხურით დავქვეითდით. საქართველოს ნაკრებს ახლა 72,37 ქულა აქვს და მე-14 ადგილზეა. მე-13 ადგილზე იტალიამ გადაინაცვლა 73,32 ქულით, მე-12 კი ტონგას ნაკრებია - 73,84. კიდევ ერთ ჩვენს მეზობელს, აშშ-ის ნაკრებს, რომელიც მე-15 ადგილზეა, 72,32 ქულა აქვს.

საქართველოს ნაკრების მორიგ მეტოქეს სამოას ეროვნულ გუნდს კი დღემდე 67,61 ქულა დაუგროვდა და მე-17 ადგილზეა. სამოელებმა გასულ უქმეებზე ნეიტრალურ მოედანზე აშშ-ის ნაკრებთან წააგეს მინიმალური სხვაობით - 29:30.

სამოას ნაკრების შემადგენლობა ასეთი იყო:
15. სეე ტუალა, 14. ედ ფიდოუ, 13. რეი ლეე ლო, 12. ალაპატი ლეიუა. 11. ჯეი ჯეი ტაულაგი, 10. ტუსი პისი, 9. მელანი მატავაო. 1. ლოგოვიი მულიპოლა, 2. მოტუ მატუუ, 3. პაულ ემილე, 4. კანე ლეაუპეპე, 5. ფილო პაულო, 6. ჯოშ ტაირელი, 7. ჯეკ ლემი, 8. ფაიფილი ლევავე
16. რეი ნიუია, 17. ჯორდან ლეი, 18. ჯეიმს ლეი, 19. ბენ ნეენეე, 20. ლაკოპო პეტელო მაპუ, 21. დუეინ პოლატაივაო, 22. დანჯელო ლეუილა, 23. სტესი ლიი
შეგახსენებთ, რომ საქართველოსა და სამოას ნაკრებების მატჩი შაბათს, "ავჭალის სარაგბო სტადიონზე" გაიმართება და 18 საათზე დაიწყება.

ტესტები

17 ნოემბერი
საქართველო-სამოა

24 ნოემბერი
საქართველო-ტონგა

ყოველდღიური სპორტული გაზეთი "ლელო"
1371
მკითხველის კომენტარები / 0 /
მსგავსი ამბები
რუბრიკის სხვა სიახლეები
;