[რაგბი. ტრანსფერი] შალვა მამუკაშვილი ისევ პრემიერშიპში

ინგლისური პრემიერშიპის გუნდმა „ლესტერ ტაიგერსმა“ გამოაცხადა, რომ 2020/21 წლების სეზონიდან გუნდის წევრი ბორჯღალოსანი შალვა მამუკაშვილი გახდება. 29 წლის მორკინალს საქართველოს ნაკრებში დებიუტი 2011 წელს ჰქონდა და მას მერე „ბორჯღალოსნების“ მაისურით 73 კეპი მოიპოვა.

„ტაიგერსის“ მწვრთნელი გორდონ მერფი აღფრთოვანებულია ქართველი მორაგბის დამატების პერსპექტივით:

გორდონ მერფი: „შალვას ბევრი კლუბი გამოუვლია, ახალგაზრდული ასაკის მიუხედავად, ძალზე გამოცდილია. ის წინა ხაზში უნიკალურ თვისებებს დაუმატებს „ტაიგერსს“. კლუბის პოლიტიკა ხშირად ითვალისწინებდა მორკინალების დამატებას უცხო ქვეყნებიდან და იმედი გვაქვს, რომ შალვას ისტორიაც მორიგი საერთაშორისო წარმატების ისტორია იქნება ლესტერში. ძლიერ ნაკრებში 70 კეპის გამართვა არის დიდი მიღწევა, რაც შალვამ გააკეთა საქართველოს ნაკრებში. ეს უდიდესი შრომის გარეშე შეუძლებელია. ის ძალზე მოტივირებული ნამდვილი პროფესიონალია, რაც ჩვენმა პირადმა საუბარმა კიდევ ერთხელ დამიდასტურა. ფანები კმაყოფილი დარჩებიან იმით, რასაც შალვა ჩვენს კლუბს მოუტანს“.

შალვა მამუკაშვილი: „ლესტერ ტაიგერსი“ დიდი კლუბია, მას ხანგრძლივი ისტორია უმაგრებს ზურგს და ერთ-ერთი ყველაზე წარმატებულია ინგლისის პრემიერშიპში. მოტივირებული ვარ და 100 პროცენტით დავიხარჯები ტაიგერსისთვის. კარგ სეზონს ველი“.

მამუკაშვილის კარიერა „ყოჩებში“ დაიწყო, საიდანაც ის ეროვნულ გუნდში მოხვდა, შემდეგ იყო „არმია“. 2014 წელს ის „სეილ შარკსის“ მოთამაშე გახდა და ერთი სეზონი პრემიერშიპში გაატარა, შემდეგ კი „გლაზგო უორიორსში“ გადავიდა. ამის შემდეგ იყო ფრანგული კლუბები: „მონპელიე“, „ტულონი“ და „კარკასონი“.

2018 წელს მამუკაშვილი დიდ ათში დაბრუნდა, თბილისის „ლოკომოტივის“ შემადგენლობაში, 2019 წლის მსოფლიოს თასის წინ რუსულ „ენისეიში“ გადავიდა.

738
მკითხველის კომენტარები / 0 /
მსგავსი ამბები
რუბრიკის სხვა სიახლეები
;