[რაგბი] ქართველი მსაჯების წინსვლა აშკარაა

რაგბის ქართველი მსაჯები ნელ-ნელა პროგრესირებენ და საერთაშორისო ტურნირების ორგანიზატორები მათ მეტ ნდობას უცხადებენ. ჩვენი არბიტრები ახალი წლიდან ევროთასებსა და რაგბი ევროპის ჩემპიონატის მატჩებს განსჯიან.

ნიკა ამაშუკელი ჩელენჯ კაპის ჯგუფური ეტაპის დასკვნით ორ ტურში იმსაჯებს. მას ქართულ ბრიგადასთან ერთად, უკვე ნამსაჯი აქვს სამი შეხვედრა. 11 იანვარს ის პარიზში, „სტად ჟან ბუენზე“ ფრანგული „სტად ფრანსესა“ და იტალიური „ზებრეს“ შეხვედრას განსჯის, ხოლო 18 იანვარს კარდიფში, მასპინძლებისა და იტალიური „კალვიზანოს“ მატჩზე იმსაჯებს. ორივე შემთხვევაში ნიკას კიდეებიდან შოთა თევზაძე და საბა აბულაშვილი დაეხმარებიან.

ამის შემდეგ, ნიკა ამაშუკელი ექვსი ერის ახალგაზრდული ნაკრებების შეჯიბრებაში ჩაერთვება. 1 თებერვალს, ის გრენობლში, საფრანგეთისა და ინგლისის ნაკრებების შეხვედრას განსჯის, რომელიც ტურნირის არაოფიციალური ფინალია. 7 თებერვალს კი უკვე ირლანდიისა და უელსის ნაკრებების პრინციპულ შეხვედრაში იქნება მთავარი მსაჯი. ორივე შემთხვევაში ნიკას კიდეებიდან ირაკლი ჭანუკვაძე და საბა აბულაშვილი დაეხმარებიან.

კიდევ ერთ ქართველ მსაჯს შოთა თევზაძეს 20-წლამდელთა ექვსი ერის მეოთხე ტურის შეხვედრა ანდეს. ის ირლანდიისა და იტალიის ნაკრებების შეხვედრას გაუძღვება. მას კიდეებიდან ნიკა ამაშუკელი და შოთა ცაგარეიშვილი დაეხმარებიან.

თებერვალში სტარტს აიღებს 2020 წლის რაგბი ევროპის ჩემპიონატი და თევზაძესა და ამაშუკელს უკვე კაცთა ნაკრებების მატჩებში მოუწევთ გარჯა. შოთა თევზაძე 8 თებერვალს, ბრიუსელში ბელგიისა და რუსეთის ნაკრებების შეხვედრას განსჯის და მას კიდეებიდან თორნიკე გვირჯიშვილი და შოთა ცაგარეიშვილი დაეხმარებიან.

22 თებერვალს ბოტოსანში ნიკა ამაშუკელი რაგბი ევროპის ჩემპიონატის ერთ-ერთ ცენტრალურ შეხვედრას, რუმინეთისა და ესპანეთის მატჩს განსჯის. მას კიდეებიდან შოთა ცაგარეიშვილი და თორნიკე გვირჯიშვილი დაეხმარებიან.

საერთაშორისო დონეზე მოედნის მსაჯი პირველად იქნება საბა აბულაშვილი. სადებიუტო შეხვედრაში ის რაგბი ევროპის ალაფაზე 29 თებერვალს, გერმანიისა და შვეიცარიის თამაშს განსჯის. მას კიდეებიდან სულხან ჩიხლაძე და გელა ლემონჯავა დაეხმარებიან.

624
მკითხველის კომენტარები / 0 /
მსგავსი ამბები
რუბრიკის სხვა სიახლეები
;