რაგბი. ჩემპიონის პირველი სერიოზული გამოცდა

ერთადერთი გუნდი, რომელიც დაუმარცხებლად ასპარეზობს ქვეყნის ჩემპიონი თბილისის "ლოკომოტივია". მეხუთე ტურის წინ ორი ისეთი გუნდია, რომლებსაც ჯერ არ განუცდიათ გამარჯვების სიხარული. ესენია: თბილისის "არმია" და თბილისის "აკადემია". ამჯერად ისინი, ერთმანეთის პირისპირ წარსდგებიან.

მეხუთე ტური დღეს თბილისში, "ლელო არენაზე" თბილისის "ლელოსა" და ქუთაისის "აიას" დაპირისპირებით გაიხსნება. სატურნირო ცხრილის მეზობლებისა და გათამაშების ფავორიტების მატჩი, ცხადია, განსაკუთრებულ ინტერესს იწვევს. ქუთათურებმა ჩემპიონატი ომახიანად დაიწყეს, მაგრამ მერე ნელ-ნელა ტემპს უკლეს და მეოთხე ტურში დამარცხნდნენ კიდეც. "ლელომ", მართალია მძიმედ, მაგრამ მაინც მოახერხა სამი მატჩის მოგება და და ლიდერებს ოდნავ ჩამორჩება.

"აიას" ტრავმის მოშუშების შემდეგ ნაკრების ფულბეკი მირიან მოდებაძე დაუბრუნდა. ჯერ ისევ ტრავიმრებულნი არიან გიორგი ბაბუნაშვილი და დავით ლოსაბერიძე. "ლელოს" ძირითად შემადგენლობას დაუბრუნდა შერკინების კვაჭი გიორგი ჭყოიძე. სამაგიოეროდ, განაცხადში არ არის "ბორჯღალოსნების" გარემარბი სოსო მათიაშვილი, რომელმაც, გადაუწარბებლად შეიძლება ითქვას, რომ ჯერ კიდევ ვერ შეეწყო ახალ გუნდს.

***
ტურის ცენტრალური შეხვედრა რუსთავში გაიმართება. ლიდერი თბილისის "ლოკომოტივი" ადგილობრივ "ხარებს" დაუპირისპირდება, რომელმაც პირველ ტურში შინ "ლელოსთან" განცდილი მარცხის შემდეგ ზედიზედ სამი მატჩი მოიგო. აქედან ორი გასვლაზე, ჯერ "ბათუმს" სძლია, მერე კი, ქუთასის "აიას". რუსთაველთა ასეთი პროგრესი სასიამოვნო მოულოდნელობაა და, იმედია, ეყოფათ ძალა საბოლოოდ მედლებისთვის იბრძოლონ.
"ლოკომოტივი" თამაშიდან თამაშამდე უმატებს. თუმცა, ისიც აღსანიშნავია, რომ დაუმარცხებელ ჩემპიონს ლიდერთაგან ჯერ არავინ შეხვედრია. "ხარები" პირველი გუნდია, ვინც ლიდერთა შორისაა და რკინიგზელების დამარცხებას შეეცდება.

***
"ბათუმი", რომელიც პოტენციურად მიმდინარე გათამაშებაში ყველაზე უკეთაა დაკომპლექტებული, ჯერჯერობით მეორე ადგილზეა და მე-5 ტურში გორის "ჯიქს" უმასპინძლებს. შავიზღვისპირელებმა ერთი გაუთვალისწინებელი მარცხი უკვე იწვნიეს შინ "ხარებთან" და ნაკლებად სავარაუდოა გორელებთან იგივე განმეორდეს.
"ჯიქს" ძალიან აკლია მისი კაპიტანი და ლიდერი გურამ შენგელია, რომელიც ტრავმის გამო გუნდს ვერ ეხმარება. თუმცა, გორელების ბრძოლისუნარიანობას თუ გავითვალისწინებთ, "ბათუმს" მათ დასამარცხებლად მძიმე სამუშაოს შესრულება მოუწევს.

***
პატარძეულის "ვეფხვების" მოედანი უმაღლესი ლიგის მოთხოვნებს ვერ აკმაყოფილებს. ამიტომ, ამ გუნდს, ფაქტობრივად, ყველა მატჩის გამართვა სტუმრად ან ნეიტრალურ მოედანზე უწევს. ამჯერად, პატარძეულელები ისევ ნეიტრალურ მოედანზე, "შევარდენის სანაკრებო ბაზაზე" ითამაშებენ მარნეულის "არმაზთან", რომელსაც ასევე არ აქვს საკუთარი არენა.

ეს გუნდები სატურნირო ცხრილში ერთმანეთისგან შორს არ არიან. "ვეფხვებმა" გასულ ტურში რამდენიმე წამყვანი მორაგბე დაასვენა, რომლებიც, სავარაუდოდ, ისევ ძირითად შემადგენლობაში იქნებიან, პროგრესის გზაზე მდგარი "არმაზის" წინააღმდეგ მატჩში.
***
აუტსაიდერების, თბილისის "აკადემიასა" და თბილისის "არმიას" მატჩი რუსთავში გაიმართება. ძნელია ამ ორ გუნდს შორის გამარჯვებულის წინასწარ გამოცნობა. ფაქტია, რომ მათ ანგარიშზე ჯერ ერთი მოგებაც არ არის. "აკადემია" წამყვანი მოთამაშეებისგან სეზონის დაწყების წინ დაიცალა. ახალგაზრდა მორაგბეებმა კი, ისინი ჯერ სრულფასოვნად ვერ შეცვალეს. "არმია" კი, მიუხედავად იმსა. რომ გამოცდილი მორაგბეებითაა დაკომპლექტებული, ერთ მუშტად შეკვრას ვერაფრით ახერხებს.

V ტური

28 სექტემბერი
ლელო-აია 17:00

29 სექტემბერი
ბათუმი-ჯიქი 16:00
არმაზი-ვეფხვები 14:00

30 სექტემბერი
ხარები-ლოკომოტივი 15:00
აკადემია-არმია 17:30

345
მკითხველის კომენტარები / 0 /
მსგავსი ამბები
რუბრიკის სხვა სიახლეები