რაგბი. I და II ლიგები: ვეფხვები პირველში, თელავი მეორეში

საქართველოს ჩემპიონატის პირველი ლიგის გათამაშებაში მეოთხე ტურის შეხვედრები გაიმართა. უკვე გამოიკვეთა, რომ პირველობის მთავარი ფავორიტი პატარძეულის "ვეფხვებია". ის ერთადერთი გუნდია, რომელიც ჯერაც დაუმარცხებელია.

"ვეფხვები" მეოთხე ტურში ოზურგეთის "არწივებს" სტუმრობდა და მშრალი ანგარიშით 44:0 დაამარცხა. პირველი მარცხი იწვნია უმაღლესი ლიგიდან დაქვეითებულმა ბოლნისის "ყოჩებმა". მისი ძლევა ქუთაისის "არესმა" შეძლო 27:7, რამაც საშუალება მისცა, 13 ქულით მესამე ადგილზე გადაბარგებულიყო. ეს ქუთაისური გუნდი ნელ-ნელა, ძალას იკრებს და წლეულს თუ არა, სავარაუდოდ, უახლოეს მომავალში, გამორიცხული არ არის, უმაღლეს ლიგაში გადასვლისთვის სერიოზულად იბრძოლოს.

"არესს" ერთი ქულით უსწრებს თბილისის "ივერია", რომელმაც დაძაბულ ბრძოლაში თბილისის "დინამოს" დამარცხება შეძლო. ჯერ ადრეა ამაზე საუბარი, მაგრამ როგორც ჩანს, წლეულს დინამოელებს უმაღლეს ლიგაში გადასვლაზე პრეტენზია არ ექნებათ.

პირველ ლიგაში დარჩენისთვის კი, როგორც ჩანს, თბილისის "ხულიგანა" და კიკეთის "იუნკრები" იბრძოლებენ. მათ შორის დაპირისპირება ფრედ 22:22 დასრულდა.

I ლიგა
არწივები-ვეფხვები 0:44
იუნკრები-ხულიგანა 22:22
ივერია-დინამო 28:26
ყოჩები-არესი 7:27

სატურნირო მდგომარეობა
1. ვეფხვები - 18 ქულა, 2. ივერია - 14, 3. არესი - 13, 4. ყოჩები - 11, 5. დინამო - 6, 6. არწივები - 6, 7. იუნკრები - 3, 8. ხულიგანა - 3.

V ტური
ხულიგანა-არწივები, ვეფხვები-ივერია, დინამო-ყოჩები, არესი-იუნკრები

* * *

მეორე ლიგის გათამაშებაში დასავლეთ ზონაში ორი ფავორიტი გამოიკვეთა. ესენია: ახალციხის "ტაო" და "ჭიათურა". აღმოსავლეთ ზონაში კი, როგორც ჩანს, "თელავს" კონკურენციას ვერავინ გაუწევს, რადგან გუნდმა ექვსი თამაშიდან ექვსივე მოიგო და დამაჯერებლად ლიდერობს გათამაშებას.

თელაველებმა მეექვსე ტურში უშუალო კონკურენტს, თბილისის "დევებს" უმასპინძლეს და 22:8 დაამარცხეს. ახლა ამ გუნდებს შორის ქულათა სხვაობამ შვიდს მიაღწია.

დასავლეთში "ტაო" ერთი ქულით უსწრებს "ჭიათურას". მათ დავაში, დიდი ალბათობით, "წყალტუბო" ჩაერთვება, რომელსაც ერთი თამაში აქვს გამოტოვებული აუტსაიდერთან, ზესტაფონის "არწივებთან". გამარჯვების შემთხვევაში, წყალტუბოელები დაწინაურებულებს მჭიდროდ მიუახლოვდებიან.

II ლიგა
დასავლეთი ზონა
წყალტუბო-აიეტი 40:19
ტაო-არწივები 112:0
რაინდები-ფირალები 67:7

სატურნირო მდგომარეობა
1. ტაო - 24 ქულა, 2. ჭიათურა - 23, 3. რაინდები - 18, 4. წყალტუბო - 17, 5. აიეტი - 7, 6. ფირალები - 6, 7. არწივები - 0

VII ტური
წყალტუბო-ჭიათურა, ტაო-აიეტი, რაინდები-არწივები

აღმოსავლეთი ზონა
სტუ-იბერია 46:15
თელავი-დევები 22:8
ტორნადო-გორდა 26:24

სატურნირო მდგომარეობა
1. თელავი - 27 ქულა, 2. დევები - 20, 3. გორდა - 14, 4. სტუ - 13, 5. ტორნადო - 9, 6. იბერია - 4

VII ტური
გორდა-თელავი, ტორნადო-იბერია, დევები-სტუ

* * *

ჭაბუკთა A ლიგაში ბოლო ეტაპი დაიწყო. ნახევარფინალის პირველ მატჩში თბილისის "ლელომ", რომელმაც რეგულარული გათამაშება პირველ ადგილზე დაასრულა, მეოთხეადგილოსან კიკეთის "იუნკრებს" 34:29 მოუგო და ფინალში ქუთაისის "აიასა" და თბილისის "ყოჩებს" შორის გამარჯვებულს დაუპირისპირდება. ამ გუნდებს შორის მატჩი დღეს გაიმართება.

ჭაბუკთა A ლიგა
ნახევარფინალი
ლელო-იუნკრები 34:29

26 ოქტომბერი
აია-ყოჩები

ყოველდღიური სპორტული გაზეთი "ლელო"
705
მკითხველის კომენტარები / 0 /
მსგავსი ამბები
რუბრიკის სხვა სიახლეები