'რაინდები' და 'წითელი ლომები' - გავიცნოთ მალტა და ლუქსენბურგი

საქართველოს ეროვნულ ნაკრებს კარს მოადგა ორი ამხანაგური შეხვედრა მალტასა და ლუქსემბურგთან.

ჩვენი მკითხველი უკვე ინფორმირებულია იმ შემადგენლობების თაობაზე, რომლებითაც ეს ნაკრებები ვლადიმირ ვაისის გაწვრთნილ გუნდს დაუპირისპირდებიან. გარდა ამისა, ამ ორი ქვეყნის ნაკრების დღევანდელობაზე დაკვირვება რამდენიმე საინტერესო დასკვნის გამოტანის საშუალებას იძლევა.

დავიწყოთ ჩვენი გუნდის პირველი მეტოქის, მალტის გაცნობით და მერე გადავინაცვლოთ ლუქსემბურგზე. მართალია, ეს გუნდები, რბილად რომ ვთქვათ, არ მიეკუთვნებიან ევროპულ გრანდებს, მაგრამ სწორედ ისინი არიან ჩვენი მეტოქეები და მათზე გვმართებს ყურადღების გამახვილება.

მალტის რაინდები

...ასეთია მალტის ნაკრების მეტსახელი. გუნდს ამჟამად ფიფას რეიტინგში 185-ე ადგილი უჭირავს. მალტის ნაკრების რეკორდსმენი ჩატარებული მატჩებისა და გოლების მიხედვით მაიკლ მიფსუდია.

მასზე ცალკე ქვემოთ ვი- საუბრებთ, მანამდე კი ვთქვათ, რომ ყველა დროის საუკეთესო მალტელმა ფეხბურთელმა ეროვნულ გუნდში 128 შეხვედრა ჩაატარა და 40 გოლი შეაგდო.

როცა საქმე მალტის დონის ნაკრებთან გვაქვს, ეს მართლაც რომ შესანიშნავი შედეგია. ისიც უნდა გავითვალისწინთ, რა დონის პარტნიორებთან ერთად უწევს მიფსუდს წლების განმავლობაში ნაკრებში თამაში.

მწვრთნელი

მალტის ეროვნულ ნაკრებს 62 წლის რეი ფარუჯა მოძღვრავს. თავის დროზე ის ამპლუით თავდამსხმელი გახლდათ. სხვადასხვა დროს უთამაშია "ფლორიანაში", "მალტა იგლზსა" და "ნახარ ლაიონზში". ამ უკანასკნელს ის სამწვრთნელო კარიერის დასაწყისში წვრთნიდა, იყო ასევე "პიეტა ჰოთსპურის", მალტის ახალგაზრდულ ნაკრების, "მარსაქსლოკის" და "შლიემა უონდერერზის" დამრიგებელი.

ბოლოს, ფარუჯა მუშაობდა მალტის ნაკრების მთავარი მწვრთნელის ასისტენტად, 2018 წლიდან კი თავად გახდა ეროვნული გუნდის პირველკაცი. მან ნაკრები მას შემდეგ ჩაიბარა, რაც მალტის ფეხბურთის ფედერაციამ კარისკენ მიუთითა ბელგიელ სპეციალისტ ტომ საინტფელდს.

ბოლო დროის შედეგები

მოკლედ გადავავლოთ თვალი მალტის ნაკრების მიერ 2018 წელს ჩატარებულ შეხვედრებს. ამ წელს კუნძულელებს ოფიციალური შეხვედრა არ ჩაუტარებიათ. საერთოდ, გუნდმა 2017 წელს გამართული ყველა ოფიციალური შეხვედრა წააგო და მხოლოდ ერთ ამხანაგურ მატჩში "გაისროლა", როცა უკრაინას 1:0 მოუგო გასვლაზე.

ახლა ისევ მიმდინარე წელს დავუბრუნდეთ. 22 მარტს გუნდი ჩვენს კიდევ ერთ მომავალ მეტოქეს, ლუქსემბურგს დაუპირისპირდა და 0:1 წააგო. ოთხი დღის შემდეგ, თურქულ ბელექში, მალტელებმა მწარე ალიყური მიიღეს ფინელებისგან, რომელთაგან 5 უპასუხო ბურთი მიიღეს.

საქართველოს ნაკრების სამწვრთნელო შტაბს მომავალ მეტოქეზე დაკვირვების საშუალება 29 მაისს ექნება, როცა ავსტრიულ ვეტენში მალტელები ამხანაგურ შეხვედრაში სომხეთთან ითამაშებენ. შეგახსენებთ, რომ მალტას 1 ივნისს ვეთამაშებით ასევე ავსტრიულ ქალაქ შვაცში.

რა თქმა უნდა, აქვე შეიძლებოდა საქართველოს ნაკრებისა და მალტის უპირველესი გუნდის შეხვედრების გახსენება, თუმცა ამაზე სხვა წერილში ვილაპარაკებთ.

ლეგენდა

დღევანდელი და არა მხოლოდ დღევანდელი მალტის ნაკრები წარმოუდგენელია 37 წლის ფორვარდის, მაიკლ მიფსუდის გარეშე. მის სანაკრებო მიღწევებზე ზემოთ უკვე ვისაუბრეთ და ამაზე სიტყვას აღარ გავაგრძელებთ.

მალტის ნაკრების კაპიტანს სხვადასხვა დროს უთამაშია "შლიემაში" (მალტა), "კაიზერსლაუტერნში" (გერმანია), "ლილესტრიომში" (ნორვეგია), "ქოვენთრიში" (ინგლისი), "ბარნლიში" (ინგლისი), "ვალეტაში" (მალტა), "კორმსა" (მალტა) და "მელბურნში" (ავსტრალია). ამჟამად, ღვაწლმოსილი ფეხბურთელი "ვალეტას" ღირსებას იცავს.

ლიდერები

...მაგრამ მალტის ნაკრები მხოლოდ მიფსუდი არ არის. ამ გუნდს ჰყავს სხვა, ასე თუ ისე, ცნობილი ფეხბურთელებიც. გუნდის ერთ-ერთ ლიდერად ითვლება "ჰიბერნიანის" გამოცდილი კარის დარაჯი ენდრიუ ჰოგი.

დაცვაში გამორჩეული კაცია 19 წლის მაილს ბერმანი. ახალგაზრდული ასაკის მიუხედავად, მან უკვე მოასწრო შოტლანდიური "გლაზგო რეინჯერსის" მაისურის მორგება. არ უნდა გამოგვრჩეს "ჰიბერნიანის" ვეტერანი ენდრიუ აგიუსი. მან მალტის ნაკრებში 74 შეხვედრა ჩაატარა.

"გზირას" ნახევარმცველმა როდერიკ ბრიფამ მალტის ნაკრების შემადგენლობაში 94 შეხვედრა ჩაატარა და 1 გოლი შეაგდო. საყურადღებო ნახევარმცველია ინგლისური "ლუთონის" შუახაზელი ლუკ გამბინი.

მიფსუდის გარდა, თავდასხმის ხაზში უსათუოდ უნდა გამოვარჩიოთ ანდრე შკემბრი. პერიოდულად, ის მალტის ნაკრების კაპიტანიცაა. ეს ძირითადად მაშინ, როცა მიფსუდი არ არის მინდორზე. ამჟამად, შკემბრი კვიპროსული "აპოლონის" ღირსებას იცავს, მანამდე კი "ჰიბერნიანში", "მარსაქსლოკში", "ბრაუნშვაიგში",

"კარლ ცაისში", "კერნტენში", "ფერენცვაროშში", "პანიონიოსში", "ომონიაში", "ფრანკფურტსა" და "ბოავიშტაში" უთამაშია.

31 წლის ფეხბურთელი მალტის ნაკრებში შეუცვლელია. მან ამ გუნდის შემადგენლობაში 81 შეხვედრა ჩაატარა და 3 გოლი გაიტანა.

წითელ ლომებს სასწაულის
მოხდენაც შეუძლიათ

მალტის ნაკრებზე სერიოზულ ძალას წარმოადგენს ლუქსემბურგის უპირველესი გუნდი. ამჟამად შუაევროპელებს ფიფას რეიტინგში სარეკორდოდ მაღალი, 83-ე ადგილი უკავიათ. ცოტა ხნის წინ ლუქსემბურგმა ისეთი რამ გააკეთა, რამაც ის მთელი საფეხბურთო მსოფლიოს ყურადღების ცენტრში მოაქცია...
მაგრამ მივყვეთ თანამიმდევრობით...

ჰოლცი, როგორც პროგრესის სათავე

ლუქსემბურგის ეროვნულ ნაკრებს 48 წლის სპეციალისტი ლუკ ჰოლცი წვრთნის. სწორედ ამ სპეციალისტის სახელს უკავშირდება გუნდის ბოლოდროინდელი საგრძნობი პროგრესი, რასაც ყველა აღნიშნავს.

ფეხბურთელობისას ჰოლცი ლუქსემბურგულ კლუბებში თამაშობდა. ეროვნულ ნაკრებში მან 55 შეხვედრა ჩაატარა და 1 გოლი შეაგდო. სამწვრთნელო კარიერა "ეტცელაში" დაიწყო. ამის შემდეგ ქვეყნის ახალგაზრდული ნაკრები ჩაიბარა, 2010 წლიდან კი ქვეყნის უპირველესი გუნდის დამრიგებელია.

როგორ დაუდგნენ
საფრანგეთს...

2017 წელს, მსოფლიოს ჩემპიონატის შესარჩევ ციკლში, ლუქსემბურგის ნაკრებმა რამდენიმე დასამახსოვრებელი შეხვედრა ჩაატარა. ჰოლცის ბიჭებმა საშინაო ასპარეზზე დასცეს ბელარუსი (1:0) და ფრედ ითამაშეს ბულგარეთის უპირველეს გუნდთან (1:1), ამხანაგური მატჩი მოუგეს ალბანეთს.

2017 წლის 3 სექტემბერს კი თავი ყველას სიზმარში გვეგონა. ამ დღეს, მსოფლიოს ჩემპიონატის შესარჩევი ციკლის საშინაო შეხვედრაში, ლუქსემბურგმა საფრანგეთის ნაკრებთან საგარეო შეხვედრაში 0:0 ითამაშა. თანამედროვე ფეხბურთში ვის რა უნდა გაუკვირდეს, მაგრამ ეს შედეგი ლამის "საუკუნის სენსაციად" მოინათლა.

2018 წელს ლუქსემბურგმა ორი ამხანაგური შეხვედრა ჩაატარა. გასვლაზე და მოტას ერთადერთი გოლის წყალობით მოუგო ჩვენს კიდევ ერთ მეტოქე მალტას, მერე კი ავსტრიასთან საშინაო შეხვედრაში 4 უპასუხო გოლი გაუშვა მოწინააღმდეგისგან.

სახელებმა არ შეგვაშინოს...

მართალია, ლუქსემბურგი უკეთესია მალტაზე, მაგრამ ამ ნაკრებისგან მონსტრის შექმნა ნამდვილად არ ღირს. არადა, შემადგენლობას თვალს რომ გადაავლებ, თავდაპირველად ისეთი შთაბეჭდილება მაინც დაგრჩება, რომ საქმე, მინიმუმ, საშუალოზე ოდნავ დაბალი დონის ევროპულ ნაკრებთან გაქვს.

აქ შეხვდებით ფეხბურთელებს გერმანული ბუნდესლიგიდან, ინგლისური ჩემპიონშიფიდან... მაგრამ ეს შთაბეჭდილება შეიძლება მაცდური აღმოჩნდეს, რადგან მათ უმეტესობას საერთოდ არ აქვს სათამაშო პრაქტიკა, ან ამ კლუბების მეორე გუნდებში ირიცხებიან.

ლიდერები

და მაინც, ლუქსემბურგის ნაკრების შემადგენლობაში არის რამდენიმე აშკარად ანგარიშგასაწევი ფეხბურთელი, რომელთა სათვალავში ჩაუგდებლობაც არაფრით არ შეიძლება.

ასე მაგალითად, ვარშავის "ლეგიას" ფეხბურთელია კრის ფილიპსი. მან "მეცის" შემადგენლობაში საფრანგეთის ჩემპიონატის უმაღლეს ლიგაშიც მოასწრო თამაში. პოლონურ კლუბში ახლახანს გადავიდა და სათადარიგოთა სკამზე ნამდვილად არ არის მიჯაჭვული.

62 შეხვედრა ჩაატარა ნაკრებში და 4 გოლი შეაგდო შვედური "ნორჩოპინგის" შუახაზელმა, ლარს გერსონმა. ის ძირითადად შვედურ და ნორვეგიულ კლუბებში ასპარეზობს. მოედნის ცენტრალურ ზონაში დიდი მოცულობის სამუშაოს შესრულება შეუძლია.

ბელგიური "ბევერენის" ძირითადი შემადგენლობის ფეხბურთელია ლორენ იანსი. საინტერესო ფეხბურთელია პორტუგალიელი ჟერსონ როდრიგესიც. ის პორტუგალიის დაბალ დივიზიონებში ასპარეზობის შემდეგ ლუქსემბურგში გადავიდა საცხოვრებლად, ცოტა ხნის წინ კი ტირასპოლის (მოლდოვა) "შერიფში" მივიდა.

საერთოდ, ლუქსემბურგის ნაკრების შემადგენლობაში არაერთი ნატურალიზებული ფეხბურთელია...

აი, სულ ეს არის. ურთიერთშეხვედრების ისტორია კი, როგორც შეგპირდით, მერე იყოს, როცა თამაშები უფრო მოახლოვდება.

ყოველდღიური სპორტული გაზეთი "ლელო"
1018
მკითხველის კომენტარები / 1 /
vaso
0
AR DAGEKARGOD SADME, AN ERTI, AN MEORE. VAI TQVENS PATRONS
მსგავსი ამბები
რუბრიკის სხვა სიახლეები
;