რამდენად დამოკიდებულია 'ლივერპული' სალაჰზე - პრობლემა, რომლის წინაშეც კლოპი აღმოჩნდა

არავინ იცის, რა მოხდებოდა ჩემპიონთა ლიგის ფინალში, მოჰამედ სალაჰი ძალიან ადრე რომ არ დაშავებულიყო.

ფინალის საწყის მონაკვეთში "ლივერპული" აშკარად უკეთესი იყო "სამეფო კლუბზე". ამაზე მეტყველებს თუნდაც დარტყმების რაოდენობა - 9:2 ინგლისური კლუბის სასარგებლოდ.

4:12 - ასეთია დარტყმების შეფარდება მას შემდეგ, რაც ეგვიპტელმა მინდორი დატოვა. როგორც იტყვიან, კომენტარი ზედმეტია. ფაქტია, სალაჰის ტრავმის შემდეგ "ლივერპული" შეტევაში ჩაიფუშა. მაინც, რა დაკარგა გუნდმა ეგვიპტელის ტრავმის შემდეგ?

ლიდერი

იმ ნახევარი საათის განმავლობაში, რომელიც მოჰამედ სალაჰმა მინდორზე გაატარა, ორჯერ თავად შეუქმნა საფრთხე "რეალის" კარს და რამდენჯერმე დასარტყმელ სიტუაციაში დატოვა პარტნიორები.

სისწრაფე

არავისთვისაა საიდუმლო, რომ "ლივერპულის" ერთ-ერთი მთავარი იარაღი სისწრაფეა. სალაჰის მინდვრიდან გასვლის შემდეგ კი ეს უპირატესობა ინგლისურმა კლუბმა აშკარად დაკარგა.

ზოგადად, "ლივერპული" ძალიან კარგად იყენებს პრესინგს. ამ შემთხვევაში დიდი როლი ეკისრებათ სადიო მანესა და სალაჰს. გარემარბები ყველანაირად უზღუდავენ სივრცეს მეტოქეს. პირველი ნახევარი საათის განმავლობაში "რეალის" ბურთის ფლობის პროცენტი 56 იყო, "ლივერპულისა" კი 44, მაგრამ ეს იურგენ კლოპის გუნდს ხელს არ უშლიდა, სახიფათო კონტრშეტევების განხორციელებაში.

საერთოდ, "ლივერპულის" მთავარი ძალა სალაჰი-ფირმინო-მანეს სამეულია. როცა ამ სამიდან ერთი მაინც არ არის მინდორზე, გუნდის შემტევი პოტენციალი სრულად ვერაფრით ვლინდება. ასე მოხდა ამჯერადაც.

რაც შეეხება ადამ ლალანას, ის თამაშში კარგად ვერ ჩაერთო და ეს გასაგებია - დიდი ხნის განმავლობაში ტრავმირებული იყო და ჯერ ვერ "აკრიფა" ძველებური ფორმა.

ფირმინო კი თავს ასწევს და ეგვიპტელს შესანიშნავ გადაცემას უკეთებს სისწრაფეზე - ასეთი რამე ჩვენ ნახევარი საათის შემდეგ აღარ გვინახავს. ალბათ, დიდ გუნდებს უნდა ჰქონდეთ ექსტრემალური სიტუაციისთვის ერთგვარი სათადარიგო გეგმა B, მეტადრე ისეთ გუნდებს, რომლებიც ძალიან არიან დამოკიდებულები ერთ რომელიმე ფეხბურთელზე.

კლოპს ასეთი გეგმა არ აღმოაჩნდა. საერთოდ, "ლივერპული" შეზღუდულია კონტინგენტის მხრივ. დღევანდელ ფეხბურთში ასე ვერაფერს გახდები.

თავდაჯერება

"მას შემდეგ, რაც სალაჰი მინდვრიდან გავიდა, ჩვენ ლიდერი და თავდაჯერება დავკარგეთ. მეტოქე კი გამხნევდა", - თქვა ფინალის შემდეგ კლოპმა. გერმანელი მართალი იყო.

მას შემდეგ, რაც ტრავმირებულმა ეგვიპტელმა აცრემლებული თვალებით დატოვა მოედანი, "ლივერპულს" "რეალის" კარში 24 წუთის(!) განმავლობაში არ დაურტყამს. არადა, სალაჰმა პრემიერლიგაში 32 გოლი გაიტანა, ჩემპიონთა ლიგაში კი - 10. ამით ყველაფერია ნათქვამი.

ერთადერთი პრობლემა

"ლივერპულმა", შემადგენლობის გასაძლიერებლად, სეზონის დაწყების წინ და მისი მიმდინარეობისას თითქოს არაფერი დაიშურა. მერსისაიდელებმა 78,8 მილიონი ევრო გადაუხადეს "საუთჰემპტონს", მცველ ვირჯილ ვან დეიკის სანაცვლოდ. 42 მილიონი დაჯდა "რომადან" თავად სალაჰის გადაბირება. 38 მილიონი მიიღო "არსენალმა" ალექს ოქსლეიდ-ჩემბერლენის ტრანსფერში...

ერთადერთი პრობლემა, რომელიც კლოპმა ვერ გადაჭრა, მეკარის პრობლემა იყო და სწორედ მეკარემ უმტყუნა ფინალში. მას შემდეგ, რაც 2015 წელს გუნდიდან წავიდა პეპე რეინა, ასე თუ ისე ნორმალური კიპერის მოძიება პრაქტიკულად შეუძლებელი გახდა.

იმედები ვერ გაამართლა იმავე "საუთჰემპტონიდან" მოსულმა სიმონ მინოლემ. 2016 წელს კი "ენფილდზე" გერმანული "მაინცის" ყოფილი მეკარე ლორის კარიუსი გამოჩნდა. ეს ის კარიუსია სწორედ, ფინალის "გმირი".

კლოპის მთავარი შეცდომა ალბათ ის არის, რომ მთელი სეზონის განმავლობაში ვერ აკეთებდა საბოლოო არჩევანს მინოლესა და კარიუსს შორის. ამ სიტუაციას მინოლე ასე გამოეხმაურა:

"კლოპს ჩუმად არაფერი გაუკეთებია. ის მელაპარაკა ამაზე და მითხრა, რომ სიტუაცია მოითხოვდა, როტაციისთვის მიემართა. მე არ ვარ ასეთი რამის მომხრე, მაგრამ რას ვიზამთ, მწვრთნელს ნებისმიერ შემთხვევაში უნდა დაუჯერო".

საიდან გამოჩნდნენ?

ბელგიელი მონოლეს ტრანსფერი "ლივერპულის" მეკარეების მწვრთნელის, ჯონ ახტერბერგის დამსახურებაა. ჰოლანდიელს წლების განმავლობაში უნდოდა მისი აყვანა. ხოლო, რაც შეეხება კარიუსს, ეს უშუალოდ კლოპის დამსახურებაა. სხვათა შორის, ყმაწვილკაცობაში (2009-11) ამ გერმანელ მეკარეს "მანჩესტერ სიტის" სკოლა აქვს გავლილი.

"თუ ის ცუდი მეკარეა, მაშინ მე ფეხბურთში იდიოტი ვყოფილვარ და საერთოდ არაფერი მცოდნია", - თქვა ფინალის შემდეგ კლოპმა.

ყოველდღიური სპორტული გაზეთი "ლელო"
1221
მკითხველის კომენტარები / 0 /
მსგავსი ამბები
რუბრიკის სხვა სიახლეები
;