რამდენად სერიოზულია გრანპრის ფინალში მიღებული ბექა ღვინიაშვილის ტრავმა?

როგორც ძიუდოისტთა ნაკრების მწვრთნელმა მინდია ბიდაველმა გვითხრა, ბექა ღვინიაშვილის (90) ტრავმა არც ისე საშიში აღმოჩნდა. მას თურმე კოჭი გადაუბრუნდა, რომელიც ახლა შესიებულია, მაგრამ მდგომარეობა არაა საგანგაშო. ბოდაველის თქმით, ის 2-3 დღეში ვარჯიშს განაახლებს. ყოველ შემთხვევაში, ამ კვირის ბოლოს ბაკურიანში შეკრებაზე მყოფ რამდენიმე თანაგუნდელს უნდა შეუერთდეს.

შეგახსენებთ, რომ ღვინიაშვილმა ტრავმა კვირას მიიღო პარიზის "დიდი მუზარადის" ფინალში, რომელიც იაპონელ შოიჩირო მუკაისთან დათმო. წაგება წაგებად და მაშინვე გაჩნდა კითხვა, ხომ არ შეუშლიდა ეს ხელს დიუსელდორფის "დიდ პრიზზე" გამოსვლაში, რომელიც ორიოდ კვირაში გაიმართება? როგორც ბოდაველმა გვითხრა, გერმანიაში მისი ჭიდაობა არც იგეგმებოდა.

მიკროტრავმის მიუხედავად, ღვინიაშვილი მაინც დარჩა პარიზში ტურნირის შემდგომ ერთობლივ ვარჯიშებზე, რომელშიც ჩვენი გუნდიც მონაწილეობს. ამ შეკრებაზე არ დარჩნენ მხოლოდ ევროპის ჩემპიონი, მსოფლიოს მესამე პრიზიორი ვაჟა მარგველაშვილი (66), ოლიმპიური და ევროპის ჩემპიონი ლაშა შავდათუაშვილი (73) და მსოფლიოს ბრინჯაოს მედალოსანი უშანგი მარგიანი (90) - ეს სამეული დღეს ნაშუადღევს უკვე ჩამოფრინდა თბილისში, რათა ბოდაველთან ერთად ბაკურიანში ზემოაღნიშნულ შეკრებაზე გაემგზავროს.

შეგახსენებთ, რომ ეროვნულმა ნაკრებმა იანვარში ბაკურიანში უკვე გაიარა საერთო ფიზიკური მომზადებისთვის განკუთვნილი შეკრება, მაგრამ მაშინ ეს სამეული და ვალერი ლიპარტელიანი (100) ავსტრიულ მიტერსილში იყვნენ ევროპულ საწვრთნელ კემპზე.

თუმცა ის ტექნიკურ-ტაქტიკური ხასიათის ვარჯიშები იყო, ფიზიკური მომზადება კი არ გაუვლიათ. ბაკურიანში ახლა სწორედ ამ ხარვეზის შესავსებად მიდიან, მათთან ერთად კი ღვინიაშვილიც ივარჯიშებს, ვისაც, როგორც ჩანს, დააკლდა მაშინდელი წვრთნა.

1213
მკითხველის კომენტარები / 0 /
მსგავსი ამბები
რუბრიკის სხვა სიახლეები