[VIDEO] რამდენი დოლარი აქვს გამომუშავებული ნიკოლოზ ბასილაშვილს კარიერაში?

"ტაი-ბრეიკზე ცუდად არ გამოვიყურებოდი, მაგრამ ბასილაშვილმა ბრწყინვალედ ითამაშა. მან მთელი მატჩი შთამბეჭდავად ჩაატარა. ის ძალიან ძლიერად ურტყამს და ხანდახან მეჩვენებოდა, რომ საერთოდ ვერ ვაკონტროლებდი ბურთს. მუდმივად მიწევდა ძალიან ძლიერი დარტყმების წინააღმდეგ ბრძოლა. რთული მოწინააღმდეგეა," - ეს მსოფლიოს ნომერ პირველმა ჩოგბურთელმა რაფაელ ნადალმა ქართველ ნიკოლოზ ბასილაშვილზე თქვა.

ნიკა დამოუკიდებელ ქართული სპორტის ისტორიაში საუკეთესო ჩოგბურთელია. იგი 2018 წელს მსოფლიოს რეიტინგში მე-16 პოზიციაზე აღზევდა, სადამდეც ბოლო 30-წლეულში არც ერთ ქართველ ვაჟ ჩოგბურთელს ვერ მიუღწევია.

როგორ გავხდეთ ნიკა ბასილაშვილი?

რუსეთის სახელით? არა!

ისევე როგორც ბევრ ცნობილ სპორტსმენს, ბასილაშვილსაც ურთულესი გზის გავლა მოუწია.

იგი 1992 წლის 23 თებერვალს დაიბადა. მამა, ნოდარი სუხიშვილების ანსამბლის მოცეკვავე გახლდათ, დედა, ნატალია - ფიზიკოსი. ნიკამ ვარჯიში 6 წლის ასაკში გოგა სანთელაძის ხელმძღვანელობით დაიწყო. ერთხან მამა ავარჯიშებდა.

2007-დან 2011 წლამდე ოჯახთან ერთად ამერიკის ქალაქ საკრამენტოში ცხოვრობდა, სადაც საფუძვლიანად შეისწავლა სპორტის ერთ-ერთი ყველაზე პოპულარული სახეობა. მწვრთნელი ვიტალი გორინი გახლდათ. 15 წლის ასაკში ოჯახთან ერთად რუსეთში გაემგზავრა და იყო ალბათობა, მსოფლიოს იგი რუსეთის სახელით გაეცნო:

"იყო შემთხვევები, როცა მე და მამას რამდენიმე კვირა მანქანაში გვეძინა, მთელი თვეც გაგრძელებულა ასე. იმ დროს ჯერ კიდევ იუნიორთა ტურში გამოვდიოდი. დიდი ხანი მამასთან ერთად კარავში მეძინა და თან ტურნირებზე გამოვდიოდი. თავისებურად, საინტერესო იყო. ცუდ პირობებში ვვარჯიშობდი და სპონსორიც ვერ ვიპოვე. ამიტომაც მივიღე რუსეთის მოქალაქეობა.

21 წლის ვიყავი, როცა პრაქტიკულად ნულიდან დავიწყე ჩოგბურთის თამაში, რადგან მორალურად განადგურებული ვიყავი. ეს ყველაფერი გაძლევს იმის გააზრების საშუალებას, რომ ცუდ დროებას ფუჭად არ ჩაუვლია. ამან უფრო მეტად გამაძლიერა, ძალა და უმაღლეს დონეზე ჩოგბურთის თამაშის საშუალება მომცა".

ვარსკვლავებში

ნიკოლოზ ბასილაშვილმა გრანდ სლემის პირველი ტურნირი 2015 წელს ითამაშა. ეს იყო საფრანგეთში, როლან გაროსის კორტებზე. მან თანასი კოკონაკისთან პირველივე წრეში დათმო.

პროფესიონალებში გადასვლიდან მეორე წელსვე ცოცხალ ლეგენდა როჯერ ფედერერთან მოუწია შეხვედრა. ცხადია, გამარჯვება "მხიარულ როჯერს" დარჩა, რომელიც ნიკას ბავშვობის ერთ-ერთი სპორტული კერპთაგანი იყო.

"ფედერერი საჩოგბურთო თვალსაზრისით, ასაკშია, თუმცა მაინც უმაღლეს დონეზე თამაშობს. საერთოდაც, ჩოგბურთელებს როჯერის დამარცხება ფსიქოლოგიურად უფრო უჭირთ, ვიდრე თამაშით. რთულია დაჯერება, რომ ჩოგბურთის ცოცხალი ლეგენდის დამარცხება შესაძლებელია. დღეს, ჯერ კიდევ არიან აშკარა ფავორიტები - ნადალი, ფედერერი, ჯოკოვიჩი, დელ პოტრო და სხვ. მაგრამ, ჩემი აზრით, უახლოეს წლებში საერთო დონე კიდევ უფრო გათანაბრდება და ასე აშკარად გამოკვეთილი ლიდერები აღარ იქნებიან," - შორს იხედება ნიკოლოზი.

თითქოს ურიგოდ არ ვთამაშობდი, მაგრამ დროთა განმავლობაში გავაანალიზე, რომ მჭირდებოდა სერიოზული ცვლილება - მჭირდებოდა მენტორი, რომელსაც 100 პროცენტით მივენდობოდი

ბასილაშვილმა სწორედ დელ პოტრო დაამარცხა პეკინის მასტერსის ფინალში და კარიერის ყველაზე ფასეული ტიტული მოიპოვა. მანამდე იყო სამწლიანი მერყეობა რეიტინგში - 50-100 საუკეთესო ჩოგბურთელს შორის.

"ველური ვიყავი. ჩოგბურთისადმი მიდგომის მხრივ, ჩემზე პროფესიონალი არ ითქმოდა. ვიცოდი, რომ მინდოდა კარგად თამაში, მაგრამ არ მქონდა უნარი უმაღლეს დონეზე გამოვსულიყავი. უბრალოდ, გეგმა არ გამაჩნდა. დიდი ხანი - ორი-სამი წელი - ასეულთან ახლოს ვიყავი. თითქოს ურიგოდ არ ვთამაშობდი, მაგრამ დროთა განმავლობაში გავაანალიზე, რომ მჭირდებოდა სერიოზული ცვლილება - მჭირდებოდა მენტორი, რომელსაც 100 პროცენტით მივენდობოდი".

ასეთი ადამიანი საჩოგბურთო მწვრთნელი იან დე ვიტი აღმოჩნდა, რომლის ხელმძღვანელობითაც სულ სხვა ნიკა ბასილაშვილი ვიხილეთ. უმთავრესად ფსიქოლოგიურად შეცვლილი და ფიზიკურად მაღალ დონეზე მომზადებული - მისთვის აღარც ავტორიტეტები არსებობენ და თავისუფლად შეუძლია არა მხოლოდ ხანგრძლივი, ურთულესი მატჩის ბოლომდე მიყვანა, არამედ ტურნირის მშვენივრად დაწყება და ასევე დასრულება.

TOP 5: ბასილაშვილის ჩაგდება ნადალთან მეორე ადგილზეა! [VIDEO]

2018 წელი მისთვის გამორჩეული იყო. ივლისში მოიგო ჰამბურგის ღია პირველობა:

German Tennis Championships (ATP500. გრუნტი)
ჰამბურგი, გერმანია
2018.07.23 - 2018.07.29
საპრიზო ფონდი: 1 619 935
I საკვ. ტობიას კამკე (გერმანია, 251) 7:5, 6:2
II საკვ. იურგენ მელცერი (ავსტრია, 596) 6:4, 4:6, 7:5
1/16 ფინალი. ფილიპ კოლშრაიბერი (გერმანია, 25) 7:5, 1:6, 6:4
1/8 ფინალი. პაბლო კუევასი (ურუგვაი, 72) 7:6(6), 6:4
1/4 ფინალი. პაბლო კარენო ბუსტა (ესპანეთი, 13) 7:6(3), 6:4
1/2 ფინალი. ნიკოლას ხარი (ჩილე, 69) 7:5, 0:6, 6:1
ფინალი. ლეონარდო მაიერი (არგენტინა, 36) 6:4, 0:6, 7:5

ჰამბურგის მასტერსის მოგებიდან გავიდა სამი თვე და ნიკამ კიდევ უფრო პრესტიჟულ შეჯიბრებაში გაიმარჯვა. უფრო ძლიერი მეტოქეებიც ჰყავდა და უფრო დაამჯერებლადაც გამოიყურებოდა. ეს იყო ჩინეთის ღია პირველობა.

China Open (ATP500. ჰარდი)
პეკინი, ჩინეთი
2018.10.01 - 2018.10.07
საპრიზო ფონდი: $3 401 860
1/16 ფინალი. ჯეკ სოკი (აშშ, 17) 6:7(6), 7:5, 6:2
1/8 ფინალი. ფერნანდო ვერდასკო (ესპანეთი, 28) 7:6(3), 6:4
1/4 ფინალი. მალეკ ჟაზირი (ტუნისი, 61) 6:2, 6:2
1/2 ფინალი. კაილ ედმუნდი (ბრიტანეთი, 16) 7:6(6), 6:4
ფინალი. ხუან მარტინ დელ პოტრო (არგენტინა, 4) 6:4, 6:4

თავისი საუკეთესო სეზონი ქართველმა ჩოგბურთელმა ასე შეაფასა:

"ATP 500-ის ორი ტურნირი მოვიგე. ორივე გამარჯვება ბევრს ნიშნავს ჩემთვის. ეს ძალიან დიდ პასუხისმგებლობას მანიჭებს. რეიტინგში კარიერაში საუკეთესო მაჩვენებელი მაქვს. ესეც დამატებითი პასუხისმგებლობაა, რადგან TOP 20-ში ყოფნა გავალდებულებს - მუდმივად კარგად ითამაშო და დაამტკიცო, რომ ელიტაში ყოფნის ღირსი ხარ. გულშემატკივრებსაც შენგან უფრო მეტის მოლოდინი აქვთ."

საქართველოს კარგა ხანია არ ჰყოლია ასეთი დონის ჩოგბურთელი, ამიტომაც, ბასილაშვილს გაცნობიერებული აქვს, რომ ის უნდა იყოს მაგალითი ახალგაზრდა ჩოგბურთელებისთვის.

"ვცდილობ, მივცე სწორი და კარგი მაგალითი ახალ თაობას, როგორც კორტზე, ასევე მოედნის მიღმა. ვიცი, რომ განსაკუთრებით მაკვირდებიან. ეს უდიდესი პასუხისმგებლობა და ამავდროულად, ძალიან სასიამოვნო გრძნობაა ჩემთვის. ძალიან მიხარია, რომ საქართველოს საუკეთესო ჩოგბურთელი ვარ. ეს მართლაც განსაკუთრებული გრძნობაა."

მომდევნო, 2019 წელს ბასილაშვილმა გერმანული მიღწევა გაიმეორა - მეორედ მოიგო ჰამბურგის ღია პირველობა, რის შემდეგაც არაერთ შეჯიბრებაში მიიღო მონაწილეობა, თუმცა ტიტულამდე ვერ მივიდა. ამის მიზეზი მხრის ტრავმა იყო... 2019 წლის ბოლოს მან ოპერაცია გაიკეთა და ველით ისეთსავე ბასილაშვილს, როგორიც 2018 წელს იყო.

German Tennis Championships (ATP500. გრუნტი)
გერმანია, ჰამბურგი
2019.07.22 - 2019.07.28
1/16 ფინ. დელიენი (ბოლ) 6:4, 6:3
1/8 ფინ. ლონდერო (არგ) 6:4, 3:6, 6:3
1/4 ფინ. შარდი (საფ) 6:2, 6:3
1/2 ფინ. ა. ზვერევი (გერ) 6:4, 4:6, 7:6(5)
ფინ. რუბლიოვი (რუს) 7:5, 4:6, 6:3


შემოსავალი

ჩოგბურთი სპორტის ის სახეობაა, რომელშიც თავდაუზოგავი შრომა აუცილებლად დაფასდება. ამის მაგალითი სწორედ ბასილაშვილის კარიერაა: თუ ნიკას მამამისთან ერთად კარიერის დასაწყისში მანქანასა და კარვებში უხდებოდა ღამის გათევება, პროფესიონალებში გადასვლის შემდეგ ამოისუნთქა. ყოველ შეჯიბრებაში თითო მოგებაზე სხვადასხვა საპრიზო თანხაა გამოყოფილი, ტურნირის მოგება კი ასიათასობით დოლარის შემოსავალია...

მაგალითად, ჩინეთის მასტერსზე პირველი საკვალიფიკაციო ეტაპის დამძლევი 2,845 დოლარს იღებს, მომდევნო ეტაპის მომგები - 5,575 დოლარს და ასე მატულობს თანხა ფინალამდე:

1/16 ფინალი - $25,200;
1/8 ფინალი - $47,480
1/4 ფინალი - $92,000
1/2 ფინალი - $180,900
ფინალი - $359,510
ჩემპიონს - $733,320

სწორედ 733,320 დოლარი მიიღო ნიკა ბასილაშვილმა 2018 წელს ჩინეთის ღია პირველობის მოგებისთვის. ჰამბურგის ტურნირის ბიუჯეტი შედარებით მოკრძალებულია. მისი მოგება 2018 წელს 349,200 დოლარად ფასობდა, 2019 წელს - 354,845 დოლარად.

საჩოგბურთო საიტებზე ნებისმიერი მოთამაშის შემოსავალი "თეთრებშია" გათვლილი. ცნობილია ისიც, რომ ნიკოლოზ ბასილაშვილს კარიერაში (2020 წლის მაისის მონაცემებით) 5,479,761 დოლარი აქვს მიღებული. ისიც კარგად მოგეხსენებათ, რომ ეს სუფთა შემოსავალი ვერ იქნება...

"ჩოგბურთელები ყველა ტურნირზე დაახლოებით 30%-ით იბეგრებიან. გარდა ამისა, მყავს ერთ-ერთი საუკეთესო და ძვირადღირებული მწვრთნელი, ასევე - ფიზიოთერაპევტი, სტატისტიკოსი და ანალიტიკოსი, რომელთაც მთლიანად მე ვაფინანსებ. სპორტის სხვა სახეობებისგან განსხვავებით, ჩოგბურთელები თვითონ უზრუნველყოფენ თავიანთი გუნდების წევრების ხელფასების, სასტუმროსა თუ კვების ხარჯებს და ტურნირებზე გამომუშავებული თანხების დიდი ნაწილიც სწორედ ამაში იხარჯება," - განმარტავს ქართველი ჩოგბურთელი.

13608
მკითხველის კომენტარები / 6 /
hm
0
am bichs naxevsric ar rceba anu 3 milic ar aqvs da es gogo migera is rac darca isic unda caartvas
chkua rom qonoda bevri darceboda da axla mgoni arc araperi
ზ.კალორია
0
აბა ჰე! არ დაგრჩეთ დოუთვლელი.
მსგავსი ამბები
რუბრიკის სხვა სიახლეები
;