რაპიდის მწვრთნელი: ვიცოდი, რომ ქვილითაიას უიღბლობა დროებითი მოვლენა იყო

ავსტრიულმა CRONE.AT-მა საინტერესო სტატია მიუძღვნა საქართველოს ეროვნული ნაკრებისა და ავსტრიული "რაპიდის" შემტევს, გიორგი ქვილითაიას. მოგეხსენებათ, ამ ბოლო დროს ჩვენებური მართლაც რომ შესანიშნავ ფორმაშია და მინდორს უგოლოდ არ ტოვებს.

სტატიაში საუბარია იმის თაობაზე, თუ როგორი დიდი მოთმინებით ცდილობდა ქვილითაია კრიზისის დაძლევას, როცა მას ჰქონდა "მშრალი სერია". როგორ ეკითხებოდა რჩევას მასთან შედარებით გამოცდილ თავდამსხმელებს და ვარჯიშის დროს იყენებდა მათ.

"ყოველივე ამან შედეგი გამოიღო. სადღეისოდ ქვილითაიას ანგარიშზე 13 გოლია და ამ მაჩვენებლით ის "რაპიდის" საუკეთესო ბომბარდირია. თავისთავად ცხადია, რომ ასეთი შედეგი არ მოდის ბევრი ვარჯიშისა და თავდადების გარეშე." - წერენ ავსტრიელები.

ავსტრიულ მედიასაშუალებას ასევე მოჰყავს კლუბის მთავარი მწვრთნელის, გორან ჯურიჩინის სიტყვები: "მე სულ ვიცავდი მას, დარწმუნებული ვიყავი მის შესაძლებლობებში. ძალიან კარგად ვხედავდი, თუ რა შეეძლო თუნდაც ვარჯიშებზე. მისი უიღბლობა იყო დროებითი მოვლენა და ყველას გვჯეროდა, რომ ეს პერიოდი მალე მორჩებოდა. ახლა შედეგს ყველანი ვხედავთ. მეცდა გულშემატკივარიც ბედნიერები ვართ ამის გამო".

ჩვენთვის სასიხარულოა ისიც, რომ ქვილითაია ერთხელაც მოხვდა ავსტრიის ჩემპიონატის სიმბოლურ ნაკრებში. "ლასკთან" მოგებულ (2:0) შეხვედრაში ქართველმა ცენტრფორვარდმა არ უღალატა ბოლო დროს დამკვიდრებულ ტრადიციას და შეხვედრის 42 - ე წუთზე გოლით გამოიჩინა თავი.

ყოველდღიური სპორტული გაზეთი "ლელო"
1791
მკითხველის კომენტარები / 1 /
ნანა
0
ყოჩაღ,გიო,წარმატებებს გისურვებ!
მსგავსი ამბები
რუბრიკის სხვა სიახლეები
;