რას, სად და როგორ მალავს კრიშტიანო - გაიცანით სულ სხვანაირი რონალდო [+ფოტო]

კრიშტიანო რონალდო 33 წლისაა. ასაკის მიუხედავად, ის შესანიშნავ ფორმაში ხვდება ჩემპიონთა ლიგის მეექვსე ფინალს. მან ამ კვირაში განაცხადა, რომ თავს ისე გრძნობს, როგორც 23 წლის ბიჭი და თავისუფლად შეუძლია, 41 წლამდე ითამაშოს...

...და მაინც რა არის "რეალის" ყველა დროის საუკეთესო მეგოლის ჯანმრთელობისა და ფიზიკური სიძლიერის საიდუმლო? - ფიზიკური ვარჯიშები, მასთან იდეალურად შეხამებული დასვენება და თავის მოვლა. არადა, თავიდან ასე არ იყო. თუნდაც მადრიდული კარიერის დასაწყისში არსებობდა ეჭვები კრიშტიანო რონალდოს ფიზიკურ ფორმასთან დაკავშირებით.

ასაკმა სიბრძნე მოიტანა. კრიშტიანოს დღეს ჰყავს შვილი, რომელიც მას დახარჯული ძალების აღდგენაში ეხმარება. რონალდო აბსოლუტურად ყველა მატჩის შემდეგ მიდის აუზზე, სადაც სპეციალურად მისთვის... შერჩეულ წყალში ცურავს. არცთუ იშვიათად ის ყინულიანი წყლის აბაზანასაც იღებს.

ამის შემდეგ ის კრიოთერაპიის (მკურნალობა დაბალი ტემპერატურის თხევადი აზოტით) პალატაში გადაინაცვლებს ხოლმე. ეს მომსახურება პორტუგალიელს ძალიან ძვირი, 50 ათასი ევრო უჯდება. ზუსტად ამ მეთოდს მიმართავს ფრანკ რიბერი, ვინც 35 წლის ასაკშიც კი მშვენიერ ფორმას ინარჩუნებს. ამ პალატაში 2-3 წუთის განმავლობაში სარეკორდოდ ეცემა ტემპერატურა.

"რედინგის" ამჟამინდელმა მწვრთნელმა პოლ კლემენტმა, ვინც ორი წლის განმავლობაში "რეალში" მუშაობდა, გაიხსენა ერთი ეპიზოდი. როცა მადრიდული კლუბის ფეხბურთელები შუაღამისას მომქანცველი თურქული მოგზაურობიდან დაბრუნდნენ, უმალ თავიანთ მანქანებს მიაშურეს, რათა დროულად წასულიყვნენ შინ, რონალდო კი... ყინულის აბაზანის მისაღებად წავიდა.

კრიშტიანოს დღე-ღამის განმავლობაში სულ 8 საათი სძინავს. ის კვირის 5 დღის განმავლობაში განუწყვეტლივ ვარჯიშობს "რეალის" საწვრთნელ ცენტრში ან თავისი გიგანტური სახლის სპეციალურ დარბაზში.

ნახტომზე ვარჯიში, ქუსლებისა და ფეხის წვერის სპეციალური ვარჯიშები - ბევრს გვიკვირს, რონალდო ჰაერში რომ დაეკიდება ხოლმე. არადა, არც ერთმა ჩვენგანმა არ იცის, რამხელა შრომა დგას ამის უკან.

ის გამუდმებით ვარჯიშობს ტრენაჟორებზე, მისდევს გერმანელი ფიზიოთერაპევტის, იოზეფ პილატეს მეთოდებს. მისი საცურაო აუზის სიგრძე 25 მეტრზე მეტია. მას აქვს სპეციალური სავარჯიშოები აზროვნების სისწრაფისთვის.

რონალდო სახლში ყოფნის დროსაც კი სპეციალურ ვარჯიშებს აკეთებს ბურთთან ერთად. ავარჯიშებს ფეხებს, მუხლებს, პრესს... ამ დროისათვის კრიშტიანო ამერიკული ფირმის სავარჯიშო დანადგარებს იყენებს, ახლო მომავალში თავად გეგმავს მათი მწარმოებელი კომპანიის გახსნას და ეს კომპანია მისივე სახელობისა იქნება.

ბოლო წლებში მან მნიშვნელოვნად გაამკაცრა დიეტა. ახლა დღეში ოთხ-ხუთჯერ ჭამს. ანუ, ჭამს ხშირად და ცოტას. დაიწყო სპეციალური ხსნარის მომზადება, რომელიც გარკვეული რაოდენობით შეიცავს შაქარს.

რონალდო არ არის ვეგეტარიანელი. მისი ერთ-ერთი საყვარელი კერძია პორტუგალიური სამზარეულოს მშვენება - შემწვარი ბარკალი. უბრალოდ, კრიშტიანო ყველაფერს აკეთებს იმისთვის, რომ ხორცში ცხიმის დაბალი შემცველობა იყოს. მან იცის, რომ თამაშის დასრულების შემდეგ საჭმელად საუკეთესო დროა. ის სიამოვნებით მიირთმევს სუშისაც.

კრიშტიანო არ ეკარება ალკოჰოლურ სასმელებს. 2015 წელს, თავის დაბადების დღეზე, პაპარაცებმა ის კოლუმბიელ მომღერალ კევინ როლდინთან ერთად დააფიქსირეს. კრიშტიანოს ხელში შუშის ბოთლი ეჭირა. მაშინვე გაჩნდა ვარაუდი, რომ წლის განმავლობაში პორტუგალიელი ვარსკვლავი უამრავ თანხას ხარჯავდა ალკოჰოლურ სასმელებზე...

ზინედინ ზიდანი დარწმუნებულია, რომ კრიშტიანო ძველ ღვინოს ჰგავს და დროის გასვლასთან ერთად მისი თამაში უფრო და უფრო უკეთესი ხდება. ეს შემთხვევითი არ არის.

მან სოლიდურ უკვე ასაკში დაამხო რაულისა და ალფრედო დი სტეფანოს მიერ დამყარებული საგოლე რეკორდები. მაგალითისთვის - რაულმა 323 გოლი შეაგდო 741 შეხვედრაში, რონალდოს ანგარიშზე კი 434 მატჩში 450 გოლია. ადვილი დასაანგარიშებელია, როგორი იქნებოდა მისი მაჩვენებელი, რაულის ოდენობის მატჩები რომ ჰქონდეს ჩატარებული "რეალში".

რაულმა 16 წლის განმავლობაში ითამაშა "რეალში". პორტუგალიელი კი მხოლოდ მე-9 წელია, "სანტიაგო ბერნაბეუზეა". რონალდოს უნდა, რომ ფეხბურთი 41 წლამდე ითამაშოს და, ალბათ, ამას შეძლებს კიდეც. სპორტული მედიცინა ძალიან წინ წავიდა.

ძველ დროში სტენლი მეთიუზმა 50 წლამდე ისე ითამაშა, რაიმე განსაკუთრებული რეცეპტი არ ჰქონია, თუ არ ჩავთვლით იმას, რომ კვირაში ერთ დღეს, უბრალოდ, შიმშილობდა.

"ლივერპულთან" შეხვედრის წინ "რეალის" ქომაგებს ყველანაირი საფუძველი აქვთ ოპტიმიზმისათვის. ტესტები აჩვენებს, რომ 33 წლის კრიშტიანო "რეალის" შემადგენლობაში საუკეთესო ფიზიკურ ფორმაშია.

ეჭვგარეშეა, "ლივერპულის" ფეხბურთელების მთავარი ამოცანა სწორედ კრიშტიანოს გაუვნებლება იქნება.

ამის შემდეგ კი რონალდოს მსოფლიოს ჩემპიონატი ელის. პორტუგალიის ნაკრების შემადგენლობაში მან უკვე მოიგო ევროპის პირველობა და ახლა იმავეს გაკეთებას მუნდიალზე ეცდება. გამოუვა? ვნახოთ...

ყოველდღიური სპორტული გაზეთი "ლელო"
1575
მკითხველის კომენტარები / 0 /
მსგავსი ამბები
რუბრიკის სხვა სიახლეები
;