რატომ არ ათამაშა რუსთავმა ლეგიონერები და რატომ დაიწყო ფინალი 45 წუთის დაგვიანებით?

"ქუთაისი" ზედიზედ მესამედ გახდა ზურაბ საკანდელიძისა და მიხეილ ქორქიას სახელობის თასის მფლობელი, მაგრამ მატჩის წინ განვითარებულმა მოვლენებმა ფინალი ცოტა არ იყოს გააუფერულა.

ქუთაისისა და რუსთავის ფინალური დაპირისპირევა დაგეგმილზე 45 წუთით გვიან დაიწყო. მიზეზი რუსთაველთა დაგვიანება იყო, გარკვეული მიზეზების გამო, რაზეც რუსთაველებმა საუბარი არ ისურვეს, ისინი თამაშზე გასვლას საერთოდაც არ აპირებდნენ...

საბოლოოდ, ფინალი შედგა, მაგრამ "რუსთავმა" ლეგიონერების გარეშე, მხოლოდ 6 კალათბურთელით ითამაშა და დაპირისპირებაც უფრო ამხანაგურ მატჩს ჰგავდა ვიდრე ფინალს.

თამაშის დაწყებამდე ქომაგებს რუსთაველთა მწვრთნელმა რამაზ გოგობერიშვილმა მიმართა, რომელმაც დარბაზში შეკრებილებს მოუბოდიშა, შესაძლოა დღეს ისეთი თამაში ვერ იხილოთ, როგორიც "რუსთავისგან" ელითო და ასეც მოხდა...

რამაზ გოგობერიშვილი:

- ვულოცავ "ქუთაისს" გამარჯვებას, ყოველთვის ასეა და ალბათ, ეს ტრადიცია გაგრძელდება – "ქუთაისი" საკუთარ ქალაქში ამ ორი ლეგენდარული კალათბურთელის სახელობის თასს არ დათმობს. მცდელობა გვქონდა, გვინდოდა მოგება, მაგრამ არ გამოგვივიდა.

- შეხვედრა ლეგიონერების გარეშე, მხოლოდ 6 კალათბურთელით ჩაატარეთ, რა იყო ამის მიზეზი?

- კითხვას უკომენტაროდ დავტოვებ, იყო პრობლემები რაზეც საუბრისგან თავს შევიკავებ.

კოტე ტუღუში:

- პირველ რიგში მივულოცავ ჩვენს გულშემატკივარს "ქუთაისის" გამარჯვებას. ტურნირის დაწყების წინაც ვთქვი, რომ ძალიან პრესტიჟულია ჩვენთვის ზურაბ საკანდელიძისა და მიხეილ ქორქიას სახელობის თასის მოგება. მიხარია, რომ ზედიზედ მესამეჯერ მოვახერხეთ გამარჯვება და ალბათ ეს თასი საბოლოოდ დაიდებს ადგილს ქუთაისში.

- ძალიან ვწუხვარ, რომ რაღაც ინციდენტის გამო ფინალი ისეთი არ გამოვიდა, როგორიც უნდა ყოფილიყო, მაგრამ რუსთავის გუნდს მადლობას ვუხდი.. რა მოხდა დეტალები არ ვიცი, მაგრამ ამას ყველა გასცემს ადეკვატურ პასუხს. მინდა ვუსურვო ქუთაისს, რომ კალათბურთი დიდხანს ყოფილიყოს ამ ქალაქში წარმატებული სპორტი, რადგანაც ქუთაისი არის ქართული კალათბურთისთვის უმნიშვნელოვანესი ქალაქი.

1293
მკითხველის კომენტარები / 0 /
მსგავსი ამბები
რუბრიკის სხვა სიახლეები
;