რატომ არ იხარჯება უფრო მეტი ფული ბავშვთა ფეხბურთში? 

...ამის შესახებ ქართული ფეხბურთის განვითარების ფონდმა საინტერესო ინფორმაცია გაავრცელა.

დაზუსტდა ინფორმაცია, თუ რამდენი სკოლაა ლიცენზირებული და რა პროექტები განხორციელდება. მთელი საქართველოს მასშტაბით, სპეციალურად შექმნილ ელექტრონულ სისტემაში მონაცემები ქვეყანაში დაფუძნებული ყველა (115) საფეხბურთო სკოლაზეა დარეგისტრირებული.

„საქართველოს ფეხბურთის ფედერაციამ და ქართული ფეხბურთის განვითარების ფონდმა ბავშვთა ფეხბურთის და საფეხბურთო სკოლების განვითარებისათვის, 2018 წელს დაწყებული პროექტი განაგრძო და მას 2019 წელს უპრეცედენტო მასშტაბი შესძინა.

შარშან დაფინანსდა 96 საფეხბურთო სკოლა, რომლებზეც ჯამურად 1,167,797 ლარი დაიხარჯა. სფფ-ს საფეხბურთო სკოლების მონიტორინგის სამსახურმა 2018 წლიდან დაიწყო საფეხბურთო სკოლების კატეგორიზაცია (სულ 4 კატეგორია) და სპეციალურად შექმნილ ელექტრონულ სისტემაში მთელი საქართველოს მასშტაბით ყველა, 115 სკოლა წარადგენდა მოთხოვნილ დოკუმენტაციებს, რის შემდეგაც მონიტორინგის სამსახური საფეხბურთო სკოლებს მათი ინფრასტრუქტურის, სტრუქტურის, განვითარების პროგრამის, ასაკობრივი გუნდების, საჭირო პერსონალის და მათი კვალიფიკაციის დადასტურებით, სავარჯიშო გეგმა გრაფიკების და სხვადასხვა დოკუმენტაციების შესწავლის შედეგად აფასებდა საფეხბურთო სკოლებს“, - წერია ფონდის წერილში. 

2019 წელს I კატეგორიის (აკადემიის) სტატუსი 4 საფეხბურთო სკოლას მიენიჭა: „ესენია თბილისის „დინამოს“, „საბურთალოს“, „ლოკომოტივისა“ და მარტვილის აკადემიები, რომელთაც ქართული ფეხბურთის განვითარების ფონდი ყოველთვიურად 20.000 ლარით ხარჯვით ნაწილში დააფინანსებს, რაც 2019 წელს 6-თვიან პერიოდზე შეადგენს 120.000 ლარს.

აღნიშნული თანხა მიმართული უნდა იყოს ბავშვთა ეკიპირების, კვების, საჭირო ვიტამინებისა და მედიკამენტებისთვის, აკადემიის მატერიალურ-ტექნიკური ბაზის გაუმჯობესებისთვის, ადგილობრივი თუ უცხოეთში საერთაშორისო ტურნირზე ტრანსპორტირებისთვის. მაგრამ თანხა ვერ იქნება მიმართული ხელფასებში, იჯარასა და სხვა ადმინისტრაციულ ხარჯში“.

დანარჩენი (111) სკოლებისთვის კატეგორიის მინიჭების პროცესი სექტემბრის თვეში დასრულდება: „ამის შემდეგაც მოხდება იმ სკოლების დაფინანსება (2019 წელს ერთჯერადად), ვინც მიიღებს სფფ-ის კატეგორიას. სკოლების მიერ მიღებული დაფინანსება მიმართული უნდა იყოს 2019 წელს მინიჭებული კატეგორიის გაუმჯობესებისთვის.

პროცესის დასრულების შემდგომ წარმოგიდგენთ სკოლების სიას კატეგორიების მიხედვით. საქართველოს ფეხბურთის ფედერაცია და ქართული ფეხბურთის განვითარების ფონდი მომავალშიც გააგრძელებს ბავშვთა სკოლებისა და აკადემიების მხარდაჭერის პროექტს“.

ყოველდღიური სპორტული გაზეთი "ლელო"
305
მკითხველის კომენტარები / 0 /
რუბრიკის სხვა სიახლეები
;