რატომ ახატია ბასილაშვილს ჩონჩხის თავი? [TimeLine]

თავწაკრულ მეკობრეებზე ფილმები ხომ გინახავთ? - თავისქალიან დროშებს რომ დააფრიალებენ გემებით. ქართველმა ჩოგბურთელმა ნიკოლოზ ბასილაშვილმაც თავზე ჩონჩხის თავი წაიკრა და ჩინეთი გაძარცვა - 733 320 დოლარი წამოიღო.

ცნობილია, რომ მეკობრე კაპიტანმა მორგანმა (ახლა უკვე მისი სახელობის ვისკია გამოსული) 1972 წელს ერთი გასვლით დაახლოებით 1.3 მილიონი დოლარის განძი მოიპოვა.

ქართველ ჩოგბურთელსა და მეკობრეებს შორის "მცირე" განსხვავება მაინც არის - ჩვენმა ჩინეთის ღია პირველობა დიდი შრომის ფასად მოიგო და "განძიც" დამსახურებულად მოიპოვა. მეკობრეები კი სხვის ქონებას ეპატრონებოდნენ.

ნიკასა და ზღვის მძარცველებს შორის პარალელი ერთმა დეტალმა - ჩონჩხის თავმა გამავლებინა. რატომ ეძებ ყველაფერში პარალელსა და სიმბოლიზმს - კაცს მოუნდა და დაიხატა, - შეიძლება მომიბრუნდეს მეგობარი, რომელსაც ახლადამოტვიფრული სვირინგის მნიშვნელობა ვკითხე. მან კი მარტივად მიპასუხა - მომეწონა და დავიხატე.

ნიკა ბასილაშვილის შემთხვევაში ასე იოლად ვერ გამოვძვრებით. მას ხომ მთელს ეკიპირებაზე ახატია ჩონჩხის თავი. სათაურის შეკითხვა გავიმეოროთ: რას ნიშავს, რისი სიმბოლოა?

თანამედროვე ეპოქაში პასუხის მოძებნა იოლია - ჩაწერ საძიებო სისტემაში ლათინურად Skull (თავის ქალას ნიშნავს) და უამრავ პასუხს ჩამოგიწერს, მთავარია, მიხვდე რომელი შეესაბამება ბასილაშვილს.

    ⇒როგორ მივიდა ბასილაშვილი ჩინურ ტრიუმფამდე? [VIDEO]

Skull - ანატომიაში, ადამიანის... - ეს არ გამოგვადგება.

Skull  - ფიჯიზე, ბელადებს უამრავი ცოლი ჰყავდათ და მათ თავის ქალებს ინახავდნენ, უფრთხილდებოდნენ.. - არც ესაა საჩვენო.

Skull - საქართველოს ტერიტორიაზე, დმანისში აღმოაჩინეს 1.8 მილიონი წლის წინანდელი ადამიანის თავის ქალა. მათ პირობითად მზია დ ზეზვა უწოდეს. ეს ევრაზიის ტერიტორიაზე არსებული უძველესი თავის ქალებია. 2013 წელს კიდევ ერთი ქალა იპოვნეს, რომლის ფორმა უკვე თანამედროვე ადამიანისას წააგავს და ამ აღმოჩენით მეცნიერებმა საოცარი დასკვნა გააკეთეს: 1.8 მილიონი წლის წინათ პატარა ტვინის მქონე დაბალშუბლა ადამიანები, დიდშუბლა, თანამედროვე ტიპის ხალხთან თანაცხოვრობდნენ... - საინტერესოა, მაგრამ ნაკლებად დასაჯერებელია, ბასილაშვილს მაისურზე მზია ან ზეზვა ეხატოს.

Skull - მეკობრეების შავ დროშაზე მე-18 საუკუნიდან თავის ქალებს ხატავდნენ. ამით ისინი შიშის ზარს სცემდნენ... - არც ეს განმარტება გამოგვადგება.
დამატებითი სიტყვა-გასაღები გვჭირდება: Skull Sports (თავის ქალა და სპორტი). ამ ორ სიტყვას რომ ჩაწერთ, სულაც არ გაქვთ გარანტია, რომ ბასილაშვილი ამოგიხტებათ. დედამიწაზე არაერთი გუნდია (საკალათბურთო, საფეხბურთო...), ემბლემად ქალა რომ აქვს. მიმართულება უნდა შევცვალოთ: კარგად დავაკვირდეთ ბასილაშვილის მაისურზე გამოსახულ თავის ქალას, იქნებ ზედ რამე აწერია? არა. ქალაზე არ აწერია, მაისურზე, მხართან კი ვკითხულობთ: Hydrogen.

Hydrogen ქართულად წყალბადია. პირველი ელემენტი პერიოდულ სისტემაში. სად თავის ქალა, სად წყალბადი? რამდენად გასაკვირიც უნდა იყოს, ამოცანის ამოხსნასთან სწორედ წყალბადმა მიგვიყვანა. ინტერნეტში სიტყვა Hydrogen რომ ჩავწერე, ჭკვიანი სისტემა დამეკითხა: Hydrogen Tennis ხომ არ მოვძებნოო?

რა თქმა უნდა-მეთქი და "ენთერს" დავაჭირე. ესეც პასუხი სათაურში მოცემულ შეკითხვაზე:

"Hydrogen სპორტული ეკიპორების მწარმოებელი ფირმაა. იგი 2003 წელს იტალიაში დაარსა ალბერტო ბრეშიმ, რომელიც თავადაც ჩოგბურთელი იყო, თუმცა ტრავმის გამო კარიერა ვერ განაგრძო და სპორტში დარჩენა ეკიპირების მწარმოებელი ფირმის გახსნით გადაწყვიტა.

Hydrogen ძირითადად საჩოგბურთო ეკიპირებასა და აქსესუარებს აწარმოებს. მისი სიმბოლოა სამი ვარსკვლავი და თავის ქალა."

ესეც ასე. ვეძებდით ჰომო ერექტუსებში, მშფოთვარე მეკობრეებში და აღმოჩნდა იტალიაში - მშვიდი კაცი, რომელმაც ბიზნესი აპენინებზე დაიწყო. კი გაიკეთა მშვენიერი რეკლამა ჩინეთის ღია პირველობაზე ბასილაშვილის გამარჯვებით.

ერთი კითხვა მაინც უპასუხოდ რჩება - მაინცდამაინც თავის ქალა რატომ აირჩია სიმბოლოდ, აეღო ორი ერთმანეთზე მიყუდებული ადამიანის სილუეტი, გამარჯვების ქალღმერთის ფრთა, სამი ზოლი, სულაც პუმა დაეხატა...

    ⇒[TimeLine] უცნაური საჩოგბურთო პრიზები... რატომ აჩუქეს ბასილაშვილს ვენტილატორი?

ყოველდღიური სპორტული გაზეთი "ლელო"
3352
მკითხველის კომენტარები / 5 /
ბესო
0
ნიკას ინტერვიუ რომ მოგესმინა ბატონო ავტორო, ამდენს არ იწვალებდი მაგ თავსატეხზე. :)
.
1
"ჩონჩხის თავი" არა, თავის ქალა ქვია მაგას. არაპროფესიონალურია.
მსგავსი ამბები
რუბრიკის სხვა სიახლეები
;