რატომ გადავიდა შენგელია ცსკა-ში? 5 მიზეზი, რაც საზოგადოებამ უნდა იცოდეს [VIDEO]

შეკითხვით დავიწყებ: როგორ ფიქრობთ, თორნიკე შენგელიას რომელი ერჩივნა - მადრიდის "რეალის" მაისური მოერგო თუ მოსკოვის ცსკა-სი? დარწმუნებული ვარ, - "რეალის", მაგრამ დიდი სპორტსმენები ფორმებს მაღაზიებში არ ირჩევენ. არის უამრავი ფაქტორი, რაც მათ კარიერას, მომავალ კლუბსა თუ ბედს განაპირობებს.

ქვემოთ სწორედ იმ ხუთ მთავარ მიზეზს დავწერ, რამაც საქართველოს ნაკრების კაპიტანი ცსკა-ში გადაიყვანა.


1. გამოსასყიდი

მაშინ, როდესაც ჟურნალისტები შენგელიას ტრანსფერთან დაკავშირებით კომენტარების მომზადებასა და უცხოური პრესიდან ცხელი ამბების თარგმნით ვიყავით დაკავებულები, საქართველოს ნაკრების ყოფილმა კაპიტანმა ვახტანგ ნაცვლიშვილმა გაამახვილა ყურადღება ერთ გარემოებაზე, რაც, რეალურად მთავარი მიზეზი გახდა შენგელიას ცსკა-ში გადასვლისა.

"ვიტორიულ "ბასკონიასა" და ცსკა-ს შორის განხორციელდა ჩვეულებრივი ტრანსფერი. ანუ ბასკურმა კლუბმა გაყიდა თავისი კუთვნილი მოთამაშე ცსკა-ში, რაშიც საკმოდ სოლიდური თანხა აიღო. ამით გამოინთავისუფლა მისი მაღალანაზღაურებადი 2-წლიანი კონტრაქტი, პლუს ტრასფერიდან სილიდური თანხა მიიღო.

ასე რომ თორნიკე თავისი ნებით არ გაქცეულა მოსკოვში!" - წერს ნაცვლიშვილი.

ზოგადად, კალათბურთში, ფეხბურთისგან განსხვავებით, კონტრაქტის გამოსყიდვა იშვიათი მოვლენაა. როგორც წესი, მოთამაშეები კონტრაქტის ამოწურვის შემდეგ იცვლიან კლუბებს.

თორნიკეს შემთხვევაში ყველაფერი გასაგებია: თავიდან "რეალმაც" გამოთქვა დაინტერესება, "მილანმაც", მაგრამ რადგან შენგელიას "ბასკონიასთან" მოქმედი კონტრაქტი (2022 წლამდე) ჰქონდა, ხელშეკრულების გამოსყიდვისთვის სოლიდური თანხა დასჭირდებოდათ. გამოცემა "მარკას " მტკიცებით - დაახლოებით 1 მილიონი ევრო. სავარაუდოდ, სწორედ ამ თანხის გამო დაიხია უკან ბევრმა ევროპულმა გრანდმა, რომელთა ხელმძღვანელობასაც შენგელიას საკუთარ რიგებში ხილვის სურვილი ჰქონდა.

თოკომაც თქვა - სერიოზული ინტერესი მხოლოდ ცსკა-სგან იყოო.

ცხადია, "ბასკონიასთვის" ეს ტრანსფერი დიდად სარგებლიანი იყო. ასეთ პირობებში შეეძლო თორნიკე კლუბის წინააღმდეგ წასულიყო და უარი ეთქვა? პასუხს მეორე მიზეზთან მივყავართ...

საქართველოს ნაკრების კალათბურთელები თორნიკე შენგელიას მხარში უდგანან


2. ტიტული

"ნებისმიერი სპორტსმენის დიდი შრომა მიმართულია ერთი მიზნისკენ - მოიგოს უმაღლესი ტიტულები," - ასე იწყება ვლადიმერ ბოისას "ფეისბუქპოსტი". ვოვა წლების განმავლობაში სლოვენიური "ოლიმპიას" კაპიტანი და საქართველოს ნაკრების ლიდერთაგანი იყო.

მაყურებლისთვის, საქომაგო ობიექტის მიერ, ამა თუ იმ ჩემპიონატის მოგება, ემოციური მომენტია, მაგრამ ბოისაზე უკეთ ვის მოეხსენება, რას ნიშნავს ხანგრძლივი მარათონის ტიტულით დაგვირგვინება! ჩვენ ვერასოდეს გავიგებთ იმას, რა განიცადა ვოვამ იტალიის ჩემპიონატის მოგებისას, ფაჩულიამ - NBA-ის თასის აღმართვისას, შენგელიამ - ესპანეთის ჩემპიონისთვის განკუთვნილი თასის ჩახუტებისას.

კალათბურთელი მოჭადრაკე არ არის, ღრმა სიბერემდე ითამაშოს - ბლიცის თამაში უწევს: მოკლე დროში უნდა მოასწროს რაც შეიძლება მეტი და მაღალი ხარისხის თასის მოგება. ევროპაში საკლუბო მწვერვალი ევროლიგის ჩემპიონობაა. თორნიკე შენგელია დღეს ევროპის საუკეთესო მძიმე ფორვარდია, შესაბამისად სჭირდებოდა გუნდი, რომელთან ერთადაც ევროლიგის ტიტულს მოიგებს.

დიდი სიხარულის VIDEO - როგორ აღნიშნეს შენგელიამ და ჯენინგმა ჩემპიონობა საქართველოს დროშით

"ბასკონიასთან" ერთად ევროლიგაზე გამარჯვება გამორიცხული იყო, შესაბამისად კიდევ ორი წლით დარჩენა, ორი წლის დაკარგვას ნიშნავდა. დრო კი არ ითმენს, თორნიკე წლეულს 28 წლისა გახდება...

ცსკა ევროლიგის მოქმედი ჩემპიონია, შესაბამისად, ახალ სეზონშიც მთავარი ფავორიტი იქნება. ასეთი გუნდი კი საუკეთესო პლაცდარმი იქნება ევროპის მთავარი საკლუბო სიმაღლის დასაპყრობად, რაშიც შენგელიას დახმარების დიდი იმედი აქვს გუნდის მთავარ მწვრთნელს.


3. მწვრთნელი

მიჩვენე შენი მეგობარი და გეტყვი, ვინ ხარ შენ, - მოდით, ეს ანდაზა სპორტული კუთხით შევატრიალოთ: მითხარი, ვინ არის შენი მწვრთნელი და გეტყვი ვინ ხარ შენ.

"მწვრთნელს შეუძლია ვარსკვლავად გაქციოს, ან პირიქით - რაც შეგიძლია, ისიც დაგავიწყოს", - მითხრა რამდენიმე წლის წინათ ნიკოლოზ ცქიტიშვილმა.

სპორტში ასეა: როდესაც ახალ კლუბში გადადიხარ, პირველ რიგში, კითხულობ, ვინ არის მთავარი მწვრთნელი, რადგან სწორედ მის განწყობასა და ტაქტიკაზეა დამოკიდებული კალათბურთელის ბედი. თორნიკე შენგელიამ კარგად იცოდა ცსკა-ს მთავარი მწვრთნელის, დიმიტრის იტუდისის მისდამი დამოკიდებულება და ამიტომაც წავიდა მოსკოვში. ბერძენი სპეციალისტის მიდგომა მისივე ნათქვამიდან გამოჩნდა:

"საუკეთესო გადაწყვეტილება მივიღეთ. მინდა კლუბს მივულოცო თორნიკეს დამატება. რამდენიმე წელი ვცდილობდით შენგელიას გადმოყვანას და მოხარული ვარ, რომ ბოლოსდაბოლოს ეს შევძელით.

იგი უნივერსალური კალათბურთელია, რომელმაც ბრძოლა იცის. გაფურჩქვნის ასაკშია. მჯერა, რომ თორნიკე დანარჩენ მოთამაშეებთან ერთად დაგვეხმარება ევროპის ტოპ-გუნდებს შორის ადგილის შენარჩუნებაში. ამიტომ, ოფიციალურად ვეტყვი: კეთილი იყოს შენი მობრძანება!"

სხვათა შორის, იტუდისი საქართველოშიცაა ნამყოფი და მასთან საუბრისას დავინახეთ, რომ ჩვენს შესახებ ბევრი იცის და ქართველ კალათბურთელებს დიდ პატივს სცემს. საკუთარი ფილოსოფია კი ჟურნალისტ ზურაბ თალაკვაძესთან სამ წინადადებაში გადმოსცა: "ჩვენ ყველანი ვიბრძვით უკეთესი მომავლისთვის, სადაც ჩვენს შვილებს განვითარების მეტი გზა უნდა ჰქონდეთ. ადამიანს არასოდეს არ უნდა აკლდეს სიმამაცე, ნებისყოფა, სიყვარულის სურვილი. თუ ეს აქვს, ის გამარჯვებული ივლის."

სწორედ მამაცი, ნებისყოფიანი, სიყვარულის სურვილით სავსე და მებრძოლი კალათბურთელი სჭირდებოდა მომავალი გამარჯვებებისთვის და ამიტომაც დაიმატა თორნიკე შენგელია.

მოკლედ, ვიცით, ვინ არის მწვრთნელი და უკვე ისიც ვიცით, რა ელის თორნიკე შენგელიას - ლიდერობა!


4. საქართველოს ნაკრები

"ბევრი ნეგატიური კომენტარი წამოვიდა თორნიკეს ვითომდა არაპატრიოტულ ნაბიჯზე. თუმცა ვინც მას კარგად იცნობს, დამეთანხმება, რომ ეს ძალიან შორსაა რეალობისგან. ყველამ ვიცით, როგორი პატრიოტია თორნიკე და საქართველოსთვის ყოველთვის შესაძლებელზე მეტს აკეთებს. ასე იქნება ყოველთვის," - ეს ვიქტორ სანიკიძის სიტყვებია, ვლადიმერ ბოისა განაგრძობს: "დარწმუნებული ვარ, ცსკა-სთან კონტრაქტს რომ აფორმებდა, საქართველოს ნაკრებზე ფიქრობდა, რადგან სწორედ ამ გუნდიდან ექნება ევროლიგის სეზონის მსვლელობისას ნაკრებში ჩამოსვლის შესაძლებლობა."

აქვე საჭიროა დაზუსტება: ევროპის უმთავრესი საკლუბო შეჯიბრება ევროლიგაა, რომლის ხელმძღვანელობა კონფრონტაციაშია ფიბა-სთან (რომელიც სანაკრებო ტურნირებს ატარებს). ევროლიგამ კალენდარი ისე შეადგინა, რომ სანაკრებო მატჩები საკლუბოს ემთხვევა. შესაბამისად, 2017 წლიდან მოყოლებული, დღემდე, ნოემბრისა და თებერვლის ფანჯრებისას (ოთხი მატჩი) ნაკრებებს ევროლიგის კალათბურთელები ვერ ეხმარებიან. ასე იყო საქართველოს შემთხვევაშიც - "ბასკონია" შენგელიას საქართველოში ჩამოსვლის უფლებას არ აძლევდა. ჩვენი გუნდი კი თორნიკესთან ერთად და მის გარეშე სრულიად სხვადასხვაა.

ტელეკომპანია Palitra News-ის ყოველდღიურ გადაცემა "სპორტალში" საუბრისას თორნიკე შენგელიას მამამ, კახამ მეტად საყურაღებო რამ თქვა: შეთანხმება მიღწეულია, რომ ცსკა თორნიკეს ნაკრებში ჩამოსვლაში ხელს არ შეუშლის.

ასე და ამგვარად, 2020 წლის ნოემბერსა და თებერვალში ევრობასკეტის შესარჩევ ოთხ მატჩში შენგელია საქართველოს ეროვნულ გუნდს დაეხმარება.


5. უნდა იცოდნენ!

აქამდე ოთხ ხელშესახებ მიზეზზე დავწერე. მეხუთე ისეთია, ხელით ვერ შეეხები, ვერც შენგელია იტყვის ხმამაღლა, მაგრამ ფაქტია: იგი ცსკა-ში გადავიდა იმიტომაც, რომ უჩვენოს ვინ არიან ქართველები.

გახსენდებათ შემთხვევა, რუსულ პრესაში რუსს დაეწეროს: "რუსეთი ოკუპანტია", "საქართველოს ტერიტორიების 20 პროცენტი აქვს მითვისებული"? შენგელიას ტრანსფერმა ეს დააწერინა, რადგან ჩვენი ჩრდილოელი მეზობლებიც იძულებულები გახდნენ საკუთარ ვებ-გვერდებზე თუ გაზეთებში გადაეტანათ ქართველთა დამოკიდებულება ოკუპაციისადმი. მათ უნდა იცოდნენ, რას ფიქრობს თითოეული ქართველი და, როგორც ზაზა ფაჩულიამ გარნეტთან ჩხუბის შემდეგ თქვა, უკან დახევა ჩვენს ხასიათში არ ზის.

ქართულ ხასიათს კი აუცილებლად დაანახებს თორნიკე შენგელია, რომელიც ამიერიდან ყურადღების ეპიცენტრშია. იგი ჩვეულებრივი, ტემპერამენტიანი ქართველია, რომელსაც ზედმეტს ვერავინ ვერაფერს შეჰბედავს. შეჰბედა და რა ჩიტი დაიჭირა სერბმა ტოდოროვიჩმა, ყველას კარგად გვახსოვს - თორნიკესგან ისეთი დარტყმა მიიღო, თამაში ვეღარ განაგრძო...

კალათბურთი და კრივი სხვადასხვაა, ჩხუბს არ ვამართლებ, მაგრამ ზოგჯერ საჭიროა შენს მოწინააღმდეგეს უჩვენო, რომ გაიძვერულ ხრიკებთან გამკლავების უკეთესი, ვაჟკაცური მეთოდი გაქვს.

თორნიკე შენგელიამ თავისი თამაშითა და ქცევით რუსებს ქართველებისადმი მეტი პატივისცემა, რიდი და შიში უნდა გაუჩინოს.

9193
მკითხველის კომენტარები / 5 /
Joi
0
წარმატებები
ზი!!!
4
ათიანში გაარტყი.....მაგარი კომენტარია...
მსგავსი ამბები
რუბრიკის სხვა სიახლეები
;