რატომ გადაიდო საქართველო-აზერბაიჯანი?

საქართველოსა და აზერბაიჯანის ეროვნულ ნაკრებთა ამხანაგური მატჩი 2 თებერვლის ნაცვლად მოგვიანებით გაიმართება, ოღონდ, უკვე ამხანაგური მატჩებისთვის ოფიციალურად დადგენილ დღეს. თარიღი უახლოეს მომავალში გაირკვევა...

ალექსანდრე იაშვილი, საქართველოს ფეხბურთის ფედერაციის ვიცე-პრეზიდენტი:

"საქართველოსა და აზერბაიჯანს შორის ამხანაგური მატჩი მოგვიანებით აუცილებლად გაიმართება, შეხვედრის თარიღსა და მასპინძელ სტადიონს უახლოეს პერიოდში დავაზუსტებთ.

ამ ეტაპზე, ეროვნული ნაკრების კანდიდატების ძირითადი ნაწილი კლუბებთან ერთად შეკრებაზეა და საწვრთნელ პროცესს სხვადასხვა ქვეყანაში გადის. ერთა ლიგის წილისყრის შემდეგ, რომელიც 24 იანვარს ლოზანაში გაიმართება, ოფიციალური კალენდარი შედგება და ყველა ამხანაგური მატჩის ჩატარების თარიღიც გაირკვევა".

ასეთი ინფორმაცია გაჩნდა საქართველოს ფეხბურთის ფედერაციის ოფიციალურ საიტზე. რა თქმა უნდა, მოულოდნელი ამბავია. მაინც რა შეიძლებოდა, გამხდარიყო ასეთი გადაწყვეტილების მიზეზი?

ვიდრე ამას გავაანალიზებდეთ, გავეცნოთ, რას წერენ უკვე შემდგარი ფაქტის თაობაზე აზერბაიჯანული საინფორმაციო საშუალებები:

"საქართველოსა და აზერბაიჯანის ნაკრებებს შორის ამხანაგური შეხვედრა, რომელიც 2 თებერვალს უნდა გამართულიყო, გადადებულია. ამის თაობაზე აზერბაიჯანის ფეხბურთის ფედერაციის ოფიციალური საიტი იტყობინება.

საქართველოს ფეხბურთის ფედერაციამ გადადო ანტალიაში დაგეგმილი შეკრება. ორი ქვეყნის ფეხბურთის ფედერაციას შორის მოლაპარაკების თანახმად, საქართველოსა და აზერბაიჯანის ნაკრებებს შეუძლიათ წლეულს ჩაატარონ ამხანაგური მატჩი ფიფას მიერ გამოყოფილ ერთ-ერთ დღეს", - წერს "აზერიფუტბოლი".

"ეს შეხვედრა არ გაიმართება იმ მიზეზის გამო, რომ ქართულმა მხარემ გადადო ანტალიაში დაგეგმილი შეკრება", - "აზერისპორტიც" თამაშის გადადების ინიციატორად ქართულ მხარეს ასახელებს. იმავეს ვკითხულობთ სხვა საინფორმაციო საშუალებებში.

რატომ მოხდა ასე?

გულზე ხელი დავიდოთ და ვთქვათ, რომ ამ შეხვედრის გადადება უფრო ქართულ მხარეს აწყობდა. აზერბაიჯანის ნაკრები ანტალიაში, პრაქტიკულად, უძლიერესი შემადგენლობით ითამაშებდა.ეს მაშინ, როცა ვლადიმირ ვაისის გაწვრთნილ გუნდს ექსპერიმენტული შემადგენლობით უნდა ეთამაშა.

ყველამ კარგად ვიცით, რომ საქართველოს ნაკრების ძირითად ბირთვს ლეგიონერები შეადგენენ. რა თქმა უნდა, გახურებულ მოსამზადებელ პერიოდში უცხოური კლუბები მათ ძნელად ან სულაც ვერ შეელეოდნენ.

არაერთხელ დავწერეთ ისიც, რომ შექმნილ სიტუაციაში საშური საქმე იყო ეროვნული გუნდის უახლოესი რეზერვის შემოწმება, მაგრამ ეს ის შემთხვევაა, როცა ვაისსაც შეიძლება გაუგო.

ერთა ლიგის დაწყებამდე ძალიან ცოტა დროა დარჩენილი და, რა თქმა უნდა, მწვრთნელს სურს, რომ ყველა შეხვედრაში შემადგენლობა ოპტიმალურთან მიახლოებული იყოს.

ვაისმა დაასრულა ექსპერიმენტები და საქართველოს ნაკრების შემადგენლობა ერთა ლიგის დაწყებამდე აღარ შეიცვლება

პირდაპირ თუ ირიბად ის დასკვნაც შეგვიძლია გამოვიტანოთ, რომ ვაისმა დაასრულა ექსპერიმენტები და საქართველოს ნაკრების შემადგენლობა ერთა ლიგის დაწყებამდე აღარ შეიცვლება.

ეს ყველაფერი კარგი, მაგრამ უმჯობესი ხომ არ იქნებოდა, ასჯერ გაგვეზომა და ერთხელ გაგვეჭრა მაშინ, როცა იგეგმებოდა თურქული შეკრება და აზერბაიჯანთან ამხანაგური მატჩი? თითქმის ასპროცენტიანი ალბათობით შეიძლება ითქვას, რომ აზერბაიჯანთან შეხვედრის გადადება მთავარი მწვრთნელის ინიციატივით მოხდა.

ხომ არ იქნებოდა უკეთესი, მისი აზრი ჯერ კიდევ მაშინ გაგვეთვალისწინებინა, როცა ეს მატჩი იგეგმებოდა. მაშინაც კარგად ვიცოდით, რომ ეს არ იყო უეფას მიერ გამოყოფილი "ფანჯარა", ვიცოდით, რომ დაგვაკლდებოდა ფეხბურთელების მთელი ჯგუფი და ისიც ცხადი იყო, რომ ჩვენგან განსხვავებით, მოწინააღმდეგე ოპტიმალურ შემადგენლობას მოუყრიდა თავს.

ასეა თუ ისე, აზერბაიჯანის ნაკრები მეტოქის გარეშე მაინც არ დარჩება თურქეთში. ადრევე ცნობილი იყო, რომ ისინი საქართველოს ნაკრებთან შეხვედრამდე მოლდოვას დაუპირისპირდებოდნენ...

ვფიქრობთ, საქართველოს ფეხბურთის ფედერაციის იმიჯზე მთლად დადებითად არ მოქმედებს ასეთი ამბები. როცა ამხანაგურ შეხვედრებს გეგმავ და მერე ორგანიზებას უწევ, გაცილებით მეტი დაკვირვებაა საჭირო, რათა არ მოხდეს ისე, რომ შენივე სიტყვების უკან წაღება მოგიხდეს.

დაველოდოთ, როდის შედგება კავკასიური დერბი. ნებისმიერ შემთხვევაში, აზერბაიჯანის ნაკრებთან ერთა ლიგის დაწყებამდე ვითამაშებთ. ამ ტურნირამდე კიდევ უნდა ჩავატაროთ ამხანაგური შეხვედრები, რათა დიდ გამოწვევას სრულ მზადყოფნაში შევხვდეთ.

ყოველდღიური სპორტული გაზეთი "ლელო"
1953
მკითხველის კომენტარები / 0 /
მსგავსი ამბები
რუბრიკის სხვა სიახლეები
;