რატომ დაგვტოვა ესტონეთმა უბურთოდ? [VIDEO]

საქართველოს კალათბურთელთა ნაკრებმა მსოფლიოს თასის მეორე საკვალიფიკაციო ეტაპის ბოლო, მე-6 შეხვედრა ესტონეთთან გამართა და 77:84 დამარცხდა. ესტონელებმა სულ რაღაც სამი დღის წინ სერბეთის ნაკრები დაამარცხეს მინიმალური სხვაობით. თუმცა მწვრთნელმა ტიიტ სოკმა საქართველოში სერბეთის დამმარცხებელი გუნდიდან ხუთი კალათბურთელი მოისაკლისა - ისინი, ვინც კალათბურთელის კვალობაზე საკმაოდ ასაკოვანია, ნაკრებიდან წასვლა და ახალგაზრდებისთვის გზის დათმობა გადაწყვიტა.

საქართველო
77
ესტონეთი
84
24 თებერვალი, თბილისი
სპორტის სასახლე

27:21, 15:27, 20:12, 15:24
საქართველო: ანდრონიკაშვილი (7წთ, 2ქ), ცინცაძე (29წთ, 8ქ, 5პ, 2ჩ), შერმადინი (38წთ, 22ქ, 15მ), სანაძე (34წთ, 21ქ, 4ჩ), მაკფადენი (38წთ, 20ქ, 3პ), ბერიშვილი (23წთ, 4ქ), ბოქოლიშვილი (10წთ), დვალიშვილი (9წთ), ბექაური (7წთ), ლონდარიძე (1წთ).
ესტონეთი: დრელი (14ქ), ტრეირი (3ქ), ლაანე (3ქ), კეედუსი (7ქ), ნურგერი (9ქ, 6მ), კაიუპანკი (4ქ), სუტი (3ქ), კისტინგი (15ქ, 8მ), პაასოია (8ქ), კულმაე (18ქ, 5პ).

სურათი

საქართველოს ნაკრებში საკმარისზე მეტად გამოცდილი კალათბურთელები არიან, ევროლიგის გამოცდილებითაც. რამ გამოიწვია მათი მარცხი ესტონეთთან? მოდით, ჯერ შეხვედრის ზოგადი სურათი წარმოვიდგინოთ, გადავხედოთ სტატისტიკას და წაგების მიზეზებზე შემდეგ ვთქვათ.

სასტარტო ხუთეულში მთავარმა მწვრთნელმა ილიას ზუროსმა დააყენა: გიორგი ცინცაძე, თად მაკფადენი, დუდა სანაძე, აკაკი დვალიშვილი, გიორგი შერმადინი.

თავიდანვე გამოიკვეთა საქართველოს ნაკრების სტრატეგია... თუმცა ისედაც ცხადი იყო, რომ აქცენტი ფარქვეშიდან შეტევაზე გაკეთდებოდა, სადაც უნიკახელი გიორგი შერმადინი გვყავს. მან ხომ 21 თებერვალს საბერძნეთში კიდევ ერთხელ დაგვანახა, რომ მშვენიერ ფორმაშია - კრეტაზე 26 ქულა და 15 მოხსნა ჰქონდა.

ცინცაძის წინამძღოლობით დანარჩენი თანაგუნდელები მშვენივრად ახერხებდნენ ბურთის ფარქვეშ შერმადინამდე მიტანას. შედეგად პირველივე მეოთხედში 21:12 რომ დავწინაურდით, ჯამლეტ ხუხაშვილის აღზრდილი შერმადინის წვლილი 11 ქულა იყო.

თავის მხრივ ესტონელებსაც ჰქონდათ კონტრტაქტიკა: დაცვაში ჯერ ერთი, შემდეგ მეორე ესტონელი ცდილობდა ხელის შეშლას. მწვრთნელისგან მითითებებიც ექნებოდათ - ფარის უსაფრთხოება ყველა ხერხით დაეცვათ, თუნდაც ჯარიმის ფასად. ამიტომაც იყო, ესტონელები მალევე რომ დაიტვირთნენ ფოლებით, თუმცა ეს მათთვის დიდი პრობლემა არც უნდა ყოფილიყო, რადგან ერთნაირი 10 კალათბურთელი ჰყავთ - ერთი მიიღებდა ოთხ ჯარიმას, მეორე შეცვლიდა, მესამე მიიღებდა - მეოთხე შეცვლიდა. ამით არც ხარისხი კლებულობდა და არც სტრატეგია იცვლებოდა.

რაც შეეხება შეტევას, ესტონელი ცენტრი (ხან ვინ თამაშობდა ცენტრის პოზიციაზე, ხან - ვინ), რომელსაც შერმადინი მეურვეობდა, ერთთავად პერიმეტრზე ადიოდა, სამქულიანებსაც სტყორცნიდა და გიორგიც იძულებული იყო აჰყოლოდა, შესაბამისად ფარქვეშ სივრცე რიგ შემთხვევებში დაუცველი რჩებოდა. ასეთი სიტუაციით ჩვენმა მეტოქემ არაერთხელ ისარგებლა და მეორე ტაიმში დაწინაურებაც მოახერხა - 42:38.

პირველი ტაიმი ესტონელთა სასარგებლოდ 41:48 დასრულდა.

მესამე პერიოდში კვლავ აბობოქრდა შერმადინი და მეოთხე პერიოდის წინ ესტონეთს 62:60 გავასწარით. თამაშის სცენარიდან გამომდინარე წინასწარ ცხადი იყო, რომ მატჩის ბედი ბოლო წამებზე უნდა გადაწყვეტილიყო.
ასეც მოხდა: სირენამდე 52 წამით ადრე ტაბლოზე 77:77 ეწერა.

35 წამით ადრე ესტონეთმა კომბინაცია დაატრიალა და ფარქვეშ მარტოდმარტო დარჩა კედუსი, რომელმაც ორქულიანიც ჩააგდო და საჯარიმოც მიაყოლა - 80:77.

ქართველებმა მომდევნო შეტევა გააცუდეს, რასაც ესტონელთა კიდევ ორი ჯარიმა მოჰყვა და - 77:82 საფინალო სირენამდე 16 წამით ადრე. ეს უკვე დამარცხებას ნიშნავდა. საბოლოოდ 77:84 ესტონელთა სასარგებლოდ.



სტატისტიკა

კალათბურთში სტატისტიკაზე არაერთი ადამიანი მუშაობს, რომელთა დამსახურებითაც ვღებულობთ ციფრებს, თამაშის ანალიზში რომ გვეხმარება.

დავიწყოთ ფარქვეშიდან ჩაგდებული ქულებით: საქართველოს ნაკრებმა სამწამიანიდან 28 ქულა მიითვალა, ესტონეთმა - 34. ზემოთ რომ ვთქვით, ესტონელები შერმადინის პერიმეტრზე აყვანას ცდილობდნენ-თქო, სწორედ ამის მიზეზი გახლდათ მეტოქის უკეთესი შედეგი ფარქვეშ.

როდესაც მოედანზე შერმადინი გყავს, ტანდაბალ ესტონელებს მოხსნებშიც უნდა აჯობო. მაგრამ არც ამ კომპონენტში გვიჯობნია - 33:33.

საქართველოს ნაკრებმა 19 შეცდომა დაუშვა (14-ის წინააღმდეგ), ესტონეთმა კი ჩვენი შეცდომების შედეგად 27 ქულა ჩააგდო, რაც ძალიან ბევრია. ამაზე თავად ილიას ზუროსმაც გაამახვილა ყურადღება ნამატჩევს.

მეტოქის ფარზე მოხსნის შემდეგ, მეორე შანსი რომ მოგვეცა, ჩვენ 3 ქულა მოვაგროვეთ, ესტონელებმა - 10. ასეთი სიტუაციიდან 3 ქულა ძალიან, ძალიან ცოტაა!

სწრაფი გარღვევებით საქართველომ 17 ქულა ჩააგდო, ესტონეთმა - 26.

მატჩის შემდეგ ერთ-ერთმა გამოცდილმა ჟურნალისტმა სტატისტიკა გადამიშალა და მიჩვენა სხვაობა ჩვენი და ესტონელი სათადარიგოების ქულებში. 42:6 ესტონეთის სასარგებლოდ...



მიზეზი?

აქ უნდა შევწყვიტოთ სტატისტიკის გაშიფვრა. თუნდაც სათადარიგოების მონაგარის შედარებით შეგვიძლია ვთქვათ, რამ გამოიწვია საქართველოს ნაკრების დამარცხება.

გგონიათ შეცვლაზე შესულებმა ცუდად ითამაშეს? გგონიათ მათ კლასი აკლდათ? თუ 2017 წლის შემოდგომით სერბეთსა და გერმანიასთან ყრიდნენ სამქულიანებს, ახლა რა დაემართათ? ცხადია, თავისუფალ პოზიციაში თუ დარჩებოდა და სტყორცნიდა (რომც ვერ ჩაეგდო), მწვრთნელი არ დაძრახავდა, მაგრამ რატომღაც რჩებოდა შთაბეჭდილება, რომ უფლებები სასტარტოებს მეტი ჰქონდათ, სათადარიგოებს - ნაკლები. იყო შემთხვევა, შეცვლაზე შესული ფარქვეშ ცარიელი იდგა, მაგრამ ბურთი ვერ მიიღო... პერიმეტრზე იდგა, ვერც მაშინ მიიღო...

ესტონეთმა კი სწორედ ამით მოიგო: თავისუფალ პოზიციაში მყოფ კალათბურთელზე ბურთი ყოველგვარი შეყოვნების გარეშე მიდიოდა. რატომღაც 2004 და 2005 წლებში საქართველოსა და ფინეთის დაპირისპირებები გამახსენდა: ფაჩულიას ერთბაშად ორი ფინელი მეურვეობდა, ყველა ღონეს ხმარობდნენ, რომ იგი თამაშიდან გამოეთიშათ.

შეტევაში კი ხუთივე ფინელი (ამ შემთხვევაში ესტონელი) განუწყვეტლივ მოძრაობდა: ოთხი უბურთოდ, ბურთიანი - ფარისკენ შედიოდა, შემდეგ ან უკან ბრუნდებოდა და თავისუფალ პარტნიორს ეძებდა, ან თავად პოულობდა სატყორცნ პოზიციას. ესტონელებს სულაც არ ჰქონდათ მრავალსვლიანი კომბინაციები, მაგრამ როდესაც ხუთი კალათბურთელი ერთად მოძრაობს, როგორც წესი ერთი მაინც რჩება თავისუფალი და ბურთიანის შნოზეა დამოკიდებული, რამდენად სწრაფად მონახავს თავისუფალს. ამის შნო კი ნებისმიერ ესტონელს აქვს. მართალია, არც მათი გამთამაშებლები გამოირჩევიან სიმაღლით და არც - ცენტრები, მაგრამ იციან რას ითხოვს მწვრთნელი და იციან უბურთოდ მოძრაობა.

40 წუთი ასეთ მოძრაობას და ტემპში თამაშს ხომ დიდი ენერგია უნდა? ტიიტ სოკს სწორედ ისეთი კალათბურთელები ჰყავს ნაკრებში, რომლებსაც ეს შეუძლიათ და თუ რომელიმეს დაღლას ოდნავ მაინც შეატყობს, წამიერად სათადარიგოთა სკამზე დასვამს, დაასვენებს, რომ ხუთ წუთში ისევ ენერგიით დატვირთული შევიდეს მოედანზე.

ჰოდა, რაც უნდა გამოცდილი კალათბურთელი გყავდეს, თუ 40 წუთს ათამაშებ, შესაძლოა, მასზე კლასით გაცილებით დაბალმა, მაგრამ ახალგაზრდამ და ჭიანჭველასავით მოძრავმა აჯობოს. ერთი-ერთზე დაჯაბვნას არ ვგულისხმობ - გუნდის შედეგზე ვამბობ, ისე როგორც ეს ესტონეთის შემთხვევაში მოხდა. ჩვენზე გუნდურად ითამაშა და მოიგო.

ასე და ამგვარად, საქართველოს ნაკრებმა მსოფლიოს თასის მეორე საკვალიფიკაციო 5 მოგებითა და 7 წაგებით დაასრულა და ჯგუფში მეოთხე ადგილი დაიკავა. მსოფლიოს თასზე ჩვენი ჯგუფიდან გავიდნენ საბერძნეთი, სერბეთი და გერმანია.

გუნდი               თ   მ  წ   ქ
1. საბერძნეთი* 12  11 1  23
2. გერმანია*      12  9  3  21
3. სერბეთი*      12  7  5  19
4. საქართველო 12  5  7  17
5. ისრაელი       12  5  7  17
6. ესტონეთი     12  4  8  16

ვანო გორგიშვილის ფოტოები

ყოველდღიური სპორტული გაზეთი "ლელო"
2665
მკითხველის კომენტარები / 3 /
კობა
0
სარასწორია, რომ ესტონეთის და საქართველოს სარეზერვოებს ერთმანეთთან აიგივებთ, რადგან თბილისში ჩამოსული ესტონეთის ყველა მოთამაშე თითქმის ძირითადი შემადგენლობისაა, ხოლო საქართველოს ნაკრების რეზერვი გაფართოებული სიიდან არის. ესტონელებს საერთოდ ერთი, მაქსიმუმ ორი ძირითადი მოთამაშე აკლდათ, ჩვენს ნაკრებს კი შენგელია, ბითაძე, ბურჯანაძე, ჯენინგი, მამუკელაშვილი, ანუ 5 მოთამაშე. აქედან გამომდინარე, ესტონელებს დაბალანსებული სკამი ქონდათ და ყველამ აიღო ქულები, ჩვენი ნაკრებიდან კი მხოლოდ ოთხმა. რაც შეეხება პასების არმიცემას, ეს შეცდომა ძირითადად ცინცაძის "დამსახურებაა" და არა მარტო ახალგაზრდებს, ერთი-ორჯერ თავისუფალ მაკფადენსა და სანაძესაც არ მიაწოდა ბურთი. ისე, ძნელია თამაში, როცა მოტივაცია არ არსებობს. მესამე ადგილზე გასვლის შანსი დაკარგული იყო, ხოლო პირველი ნახევრის დამთავრების შემდეგ პარალელურად მიმდინარე თამაშიდან აშკარა იყო, ისრაელი ვერ მოიგებდა, შესაბამისად მე-4 ადგილი(უკეთესი კალათა ევროპისთვის) გარანტირებული გვქონდა. დარბაზიც სანახევროდ ცარიელი იყო და გულშემატკივრობა თითქმის არ ისმოდა. ესტონელების გულშემატკივრები(სხვათაშორის, საკმაოდ ბევრნი იყვნენ) მეტად აქტიურად უჭერდნენ მხარს საკუთარ გუნდს. რაც შეეხება ესტონეთს, მათი მოტივაცია იყო რევანში სახლში დამარცხებისათვის, აგრეთვე სერბეთთან გამარჯვებულის ფსიქოლოგია.
123
0
კარგი სტატიაა. დადებითთან ერთად კრიტიკა აუცილებელია და კიდევ უფრო მეტადაც. რაღაც სექტასავით გახდა ჩვენი ნაკრების "ბირთვი"
მსგავსი ამბები
რუბრიკის სხვა სიახლეები
;