რატომ ითამაშებს ბათუმის დინამო ქუთაისში?

ეროვნულ ლიგაში დაქვეითებული ბათუმის "დინამო" 10 მარტს პირველ საშინაო შეხვედრაში "ვიტ ჯორჯიას" უმასპინძლებს. მაგრამ აჭარლები ითამაშებენ არა ახალაშენებულ ანგისას ბაზაზე, არამედ, ქუთაისის რამაზ შენგელიას სახელობის სტადიონზე.

ამასთან დაკავშირებით ბევრი კითხვა დაისვა, რაც სავსებით ლოგიკურია - ანგისას ბაზის მშენებლობა ახლახან დასრულდა, სადაც ხელოვნური და ბუნებრივი საფარი დააგეს და ტრიბუნებიც მოწყობილია. ამ კითხვების გამო, ბათუმელთა პრესსამსახურმა ოფიციალური განცხადება გაავრცელა.

"ბევრ გულშემატკივარს აინტერესებს, რატომ ატარებს ბათუმის "დინამო" საშინაო მატჩებს ქუთაისში? ანგისას ბაზის მშენებლობა დასრულებულია, თუმცა ჯერ ბუნებრივსაფარიანი მოედანი მატჩების სამასპინძლოდ მზად არ არის, ხოლო ხელოვნურსაფარიანს ტრიბუნა არ აქვს.

ბალახი მატჩების მისაღებად მზად იქნება აპრილიდან და, შესაბამისად, ბათუმის "დინამო" ანგისას ბაზაზე მეტოქეებს აპრილიდან უმასპინძლებს. რაგბის ხელოვნურსაფარიან მოედანზე თამაში მწვრთნელმა არ ისურვა", - წერია განცხადებაში.

ამავე დროს, Black Sea Pirates-ის (ბათუმის "დინამოს" ფანკლუბი) გვერდზე დამატებითი განმარტება იყო გაკეთებული:

"გუნდის მთავარმა მწვრთნელმა გია გეგუჩაძემ თამაშის "რაგბი არენაზე" გამართვა არ ისურვა. მას უნდა, რომ მატჩები ბუნებრივ საფარზე გაიმართოს, რადგან ხელოვნურზე ფეხბურთელთა ტრავმის მიღების მეტი საფრთხეა".

ცხადია, ბათუმიდან 150 კილომეტრში მდებარე ქუთაისის სტადიონზე წასვლას გუნდის ყველა გულშემატკივარი ვერ მოახერხებს. მაგრამ ბათუმელი ფანები "დინამოს" თანადგომას მაინც ჰპირდებიან.

აქვე გეტყვით, რომ ბათუმის "დინამომ" ანგისას ბაზაზე ამხანაგური მატჩი გამართა ფოთის "კოლხეთთან" და 3:0 დაამარცხა. მასპინძელთაგან გიორგი ილურიძემ დუბლი შეასრულა, ერთიც გოლიც ბესიკ დეკანოიძემ მიითვალა.

ყოველდღიური სპორტული გაზეთი "ლელო"
1167
მკითხველის კომენტარები / 0 /
მსგავსი ამბები
რუბრიკის სხვა სიახლეები
;