რატომ მიიჩნევს ყაზახების მწვრთნელი სტოილოვი საქართველოს ჯგუფის ფავორიტად?

ყველანი ვთანხმდებით: ერთა ლიგის გათამაშებაში საქართველოს ნაკრებს ჯგუფში მთავარ მეტოქედ ყაზახეთის ეროვნული გუნდი ეყოლება.

ცოტა ხნის წინ ყაზახებმა მწვრთნელი შეცვალეს: რუსი ალექსანდრ ბოროდიუკის ადგილი 51 წლის ბულგარელმა სტანიმირ სტოილოვმა დაიკავა.

ყაზახ ქომაგს სტოილოვის ძალიან ეიმედება. სწორედ მისი ხელმძღვანელობით ითამაშა "ასტანამ" ჩემპიონთა ლიგაში და გრანდებს პრობლემებიც შეუქმნა. სხვა თუ არაფერი, სტოილოვი კარიერაში ორჯერ წვრთნიდა მშობლიურ ბულგარეთის ეროვნულ ნაკრებს...

⇒ვლადიმირ ვაისი: ჩვენი დონის გუნდებისათვის ერთა ლიგა დიდი შანსია

"ლელო" სტოილოვს ინტერვიუზე ორიოდ თვის წინ შეუთანხმდა. ყაზახეთის ნაკრების მთავარ მწვრთნელს დათქმულ დროს დავუკავშირდით. ბულგარელი სიტყვის კაცი აღმოჩნდა - მიუხედავად მოუცლელობისა, ჩვენს კითხვებს მაინც უპასუხა...

- მოგესალმებით საქართველოდან! უძველესი სპორტული გაზეთი "ლელო"...

- კი ბატონო, როგორც ადრე შევთანხმდით, მზად ვარ, ვუპასუხო თქვენს კითხვებს.

- ყაზახეთის ეროვნული გუნდის მეტოქე ერთა ლიგაში საქართველოს ნაკრებია. რას იტყოდით მომავალ დაპირისპირებაზე? რამდენად იცნობთ გუნდს, რომელსაც პირველ ტურში უნდა უმასპინძლოთ?

- ერთა ლიგა შესანიშნავი შანსია ჩვენნაირი ქვეყნებისთვის, რათა საერთაშორისო არენაზე თავიანთი სიტყვა თქვან. არის შანსი, მოვიპოვოთ ევროპის ჩემპიონატის საგზური და ეს უკვე დიდი გამოწვევაა ნებისმიერი ნაკრებისთვის.

რაც შეეხება საქართველოს ეროვნულ ნაკრებს, მინდა გითხრათ, რომ ძალიან კარგი გუნდი გყავთ, რომელიც ყველაფერს გააკეთებს იმისთვის, რომ კარგი, შედეგიანი ფეხბურთი აჩვენოს. მე ვიტყოდი, საქართველოს ნაკრები ჯგუფის ფავორიტია.

- თუ იცნობთ საქართველოს ნაკრების ფეხბურთელებს? ორი მათგანი, ჯაბა კანკავა და ნიკა კვეკვესკირი, ყაზახურ "ტობოლში" არიან და, ალბათ, ყურადღებით ადევნებთ თვალს მათ თამაშს...

- საქართველოს ნაკრების ფეხბურთელებზე ბევრი რამ ვიცი. ასევე ვიცნობ ქართველ მწვრთნელებს. მაგალითად, ყაზახეთში მუშაობდა კახა ცხადაძე და მან აქ ძალიან კარგი შედეგები აჩვენა "ქაირათთან" ერთად.

მასთან მეტოქეობა ძალიან საინტერესო იყო... საქართველოს ნაკრებთან დაძაბული თამაშები გველის. ჯგუფში თითოეულ მატჩს ძალიან დიდი მნიშვნელობა ექნება.

ზემოთაც ვთქვი, ფავორიტად საქართველოს ნაკრებს მივიჩნევ, რადგან რეიტინგში ძალთა თანაფარდობა რაღაცას ნიშნავს. რეიტინგში ჯერ საქართველოა, მერე ლატვია, ყაზახეთი და ბოლოს ანდორა.

- რას იტყვით საქართველოს ნაკრების მწვრთნელ ვლადიმირ ვაისზე?

- ისიც "ქაირათში" მუშაობდა. ყოველგვარი გადაჭარბების გარეშე ვიტყვი, რომ ვლადიმირ ვაისის სახით, საქართველოს ნაკრებს ძალიან კარგი მთავარი მწვრთნელი ჰყავს.

- ყაზახეთის ნაკრებში ახალი მისული ხართ. არადა, გუნდმა თითქოს უკვე გამოასწორა თამაში - ამხანაგურ შეხვედრაში ჯერ უნგრეთი დაამარცხეთ, მერე კი დაძაბული ბრძოლა გაუმართეთ ბულგარეთს, თუმცა კი დამარცხდით. რა გაჩვენათ ამ ორმა თამაშმა?

- ამხანაგურ შეხვედრებში ნაჩვენები თამაში, შეიძლება, ცუდი არ იყო, მაგრამ ეს ჩვენთვის ვერ იქნება მთავარი საზომი და ამით ვერ დავკმაყოფილდებით. ოფიციალური მატჩებისთვის მაქსიმალურად კარგად უნდა მოვემზადოთ.

წინ კიდევ ბევრი სამუშაო გვაქვს. ყველა ფეხბურთელმა ძალიან კარგად იცის, რომ საკუთარ თავს მაქსიმუმი უნდა მოსთხოვოს.

- ყაზახეთის ნაკრების წინაშე ამოცანად მხოლოდ ჯგუფის მოგება დგას?

- მე, როგორც მწვრთნელს, არ შემიძლია, ამოცანად არ დავუსახო საკუთარ თავს ჯგუფის მოგება და მაქსიმალური მიზნები. საქმე ხომ ყაზახეთის ნაკრებს ეხება. დარწმუნებული ვარ, ჩვენი ფეხბურთელებიც ამას უსახავენ მიზნად საკუთარ თავს.

ყოველდღიური სპორტული გაზეთი "ლელო"
4187
მკითხველის კომენტარები / 0 /
მსგავსი ამბები
რუბრიკის სხვა სიახლეები
;