...რაც ძალიან გვახარებს, რაც ძალიან გვაღელვებს. ბათუმის სტადიონსა და სპორტულ ტურიმზე. რატომ გვჭირდება ბევრი მოედანი და სტადიონი?

თემა და პრობლემა შეიკრა და განზოგადდა, რაც ბოლოდროინდელმა ამბებმა გვიკარნახა. ჯერ ბათუმის სტადიონით დავიწყოთ, რაც ძალიან გვახარებს, და გავაგრძელოთ ინფრასტრუქტურით, რაც ძალიან გვაღელვებს...

ფინიშის პირზეა

ბათუმის სტადიონის მშენებლობა დასასრულს უახლოვდება. სამუშაოთა დიდი ნაწილი, ფაქტობრივად, შესრულებულია და დარჩენილია დეტალები, რომელთა მოწესრიგების შემდეგაც საქართველო ძალიან ლამაზ საფეხბურთო არენას მიიღებს.

"შპს სტადიონის" (რომელიც სტადიონის მშენებლობისთვის შეიქმნა) ცნობით, სავეგეტაციო ფენის მოწყობის სამუშაოები დასკვნით ფაზაზე გადავიდა, რის შემდეგადაც მინდვრის საფარის დაგება დაიწყება. ამავე დროს, დასრულდა გახმოვანებისა და განათების სისტემების მონტაჟი. პარალელურ რეჟიმში მიმდინარეობს შიდა სარემონტო და ტრიბუნების კოსმეტიკური სამუშაოები. პარალელურად, სპორტული დარბაზების სარემონტო და მოპირკეთებით სამუშაოები აქტიურად მიმდინარეობს.

სულ მცირეა დარჩენილი იქამდე, როცა საქართველოს ევროსარბიელი მხოლოდ თბილისი იყო - ამით ისევ ქართული გუნდები ზარალდებოდნენ, რადგან შეუძლებელია ბათუმის, ქუთაისის, საჩხერის გუნდებმა თბილისში ითამაშონ და ისევე იგრძნონ თავი, როგორც საკუთარ სარბიელზე, საკუთარი გულშემატკივრის წინაშე.

ბოლო პერიოდში ინფრასტრუქტურული პროექტები თვალშისაცემია, ბევრი სტადიონი შენდება. მაგრამ ახლა დროა, სოლიდური ინფრასტრუქტურა აშენდეს. საამისოდ კი აუცილებელია ქუთაისის, რუსთავის, თელავის არენების აშენება (თუ განახლება), ზუგდიდის სტადიონის დასრულება, ფოთის, ქობულეთის, სამტრედიის სტადიონების საბოლოო სახემდე მიყვანა.

მოედნები შეკვეთილში

ბათუმის სტადიონის აშენება საქართველოში სპორტული ტურიზმის განვითარებისთვის გარკვეული წინაპირობა უნდა გახდეს. ამ კუთხით, ზღვისპირეთში საინტერესო კონტურები იკვეთება.

ბათუმის სტადიონის აშენება პირველი ეტაპია, შემდეგ კი იგეგმება სხვა პროექტებიც, რომლებიც საქართველოში სპორტულ ტურიზმს განავითარებს. ამ კუთხით ძალიან საინტერესო პროექტი მთავრობამ აჭარის წარმოადგინა, რომელიც რამდენიმე რაიონში სპორტული ინფრასტრუქტურის მოწყობას ითვალისწინებს.

ამ საკითხებზე ბიძინა ივანიშვილმა (რომელიც საქართველოში სპორტული ტურიზმის აქტიურობის პერიოდის ორი-სამიდან ექვს თვემდე გაზარდაზე ფიქრობს), "სოციალურ ანტრეპრენერთან" ინტერვიუში საინტერესო განცხადება გააკეთა. მან ისეთ თემებზე ილაპარაკა, რაც პოლიტიკურმა სპექტრმა აიტაცა, არადა, სპორტული მხარე ყურადღების მიღმა დარჩა.

"სასტუმრო "პარაგრაფში" დაბანდებულმა ინვესტიციამ დადგენილ კრიტერიუმს ორმაგად გადააჭარბა. ეს სწორედ იმ მიზნით კეთდება, რომ სეზონი გახანგრძლივდეს და სხვაგან არ გავუშვათ პოტენციური ტურისტი. ამ ფარგლებში, ვფიქრობთ, მაღალი ხარისხის სპორტკომპლექსის მშენებლობაზეც "პარაგრაფსა" და "ბლექ სი არენას" შორის ტერიტორიაზე, რათა შევძლოთ უცხო ქვეყნების ეროვნული ნაკრებებისა და კლუბების ზამთრის "შეკრებების" მასპინძლობა", - ამბობს ივანიშვილი.

...მაგრამ მეტია საჭირო

ეს ის თემაა, რომელსაც "ლელო" ყოველთვის განსაკუთრებულ ყურადღებას უთმობდა. ძველი აქცენტები ახლა უფრო აქტუალურია, რადგან ადრე სრული დატვირთვით მუშაობდნენ თურქული და ყირიმის საკურორტო ქალაქების სპორტული ობიექტები. მაგრამ ბოლო წლებში ბევრი რამ შეიცვალა - სხვადასხვა ცნობილი მიზეზით, თურქეთის მოსამზადებელი ცენტრების დატვირთვა შემცირდა, ხოლო ყირიმს რუსეთის ოკუპაციის გამო აღარც უკრაინული გუნდები სტუმრობენ და ბევრმა სხვა ქვეყანამაც ზურგი აქცია, მაგრამ ამით საქართველომ ვერ იხეირა, რადგან შესაბამისი ინფრასტრუქტურა არ გვქონდა.

ვერ ვიტყვით, რომ ამ წლებში არაფერი შეცვლილა და არ გაკეთებულა. ბოლო 3 წელიწადში ჩვენი ზღვისპირა ქალაქების სპორტული ინფრასტრუქტურა ოდნავ მოფერიანდა. ბათუმში, ქობულეთსა და ფოთში სტადიონების მშენებლობა დაიწყო, ანგისაში ბაზა გაკეთდა, პლუს, ბიძინა ივანიშვილის ნახსენები პროექტიც განხორციელდება.

მაგრამ სტუმრების მასობრივად მისაღებად, დასაბინავებლად და სავარჯიშოდ საკმარისი რაოდენობის მოედნები არ არის. არადა, არის მოთხოვნა, რაზეც ბოლო წლებში საქართველოში ჩამოსული აზერბაიჯანული, სომხური, ყაზახური, უკრაინული და რუსული კლუბების სტუმრობა მეტყველებს.

ამ კუთხით მისაბაძია თურქული მოდელი, რომელიც ჯერ კიდევ პრეზიდენტმა თურუთ ოზალმა განახორციელა. 8-წლიანი (1983-1991) მმართველობის პერიოდში, მან მოახერხა და ჩამორჩენილი ქვეყანა ფეხზე დააყენა, ხოლო თურქული ფეხბურთი ევროპულ დონეს მიუახლოვა.

ინფრაქტრუქტურის მოსაწყობად თურქები საინტერესო მიგნებამდე მივიდნენ. მათ სასტუმროებს წყლის გადასახადი მოუხსნეს, სასტუმროების მეპატრონებმა კი ჩათვალეს, რომ მოედნების მოწყობა მომგებიანი იქნებოდა და ტურისტული სეზონი მნიშვნელოვნად გაახანგრძლივეს. ასე რომ, თურქებმა არა უბრალოდ მოედნები ააშენეს, ის ქვეყნის ეკონომიკის მნიშვნელოვანი შემოსავლის, დასაქმებისა და განვითარების წყაროდ აქციეს.

სახელმწიფოებრივი მიდგომა

ჩვენ ვართ ქვეყანა, რომელსაც ტურიზმის განვითარების პრეტენზია აქვს, მაგრამ შავი ზღვის სანაპიროს ვერ იყენებს. არადა, ამ გეგმების განხორციელება საქართველოს შავიზღვისპირეთის მოსახლეობას შემოსავლებს გაუზრდის.

ვინმემ იცის, რა თანხები მიდის ქართველი სპორტსმენების უცხოეთში მომზადებაზე? მარტო საფეხბურთო გუნდები ამაში მინიმუმ 500 ათას დოლარს ხარჯავენ. ამას დაუმატეთ სხვა სახეობის გუნდების მომზადება, პლუს სპორტსმენების მიერ უცხოეთში ინდივიდუალურად დახარჯული თანხები და მინიმუმ 4-5 მილიონი დოლარი საქართველოს გარეთ ამის გამოც გადის.

უცხოელების ჩამოყვანით გაცილებით მეტი სარგებლობა გველის. საქართველო უახლოეს წლებში კვიპროსის, ესპანეთისა და თურქეთის მოსამზადებელ ცენტრებს კონკურენციას ვერ გაუწევს, მაგრამ კარგი ინფრასტრუქტურით კლიენტების და შემოსავლების მცირე ნაწილს მაინც მოვიზიდავთ.

რესურსი კი საკმაოდ დიდია. მაგალითად, აჭარის, გურიის, სამეგრელოს სანაპირო ზოლსა და მთიანეთში 30-მდე ნორმალური საფეხბურთო მოედანი და მასთან დაკავშირებული ინფრასტრუქტურა (დარბაზები, სატრენაჟორო დარბაზები) რომ აშენდეს, რომელსაც ზამთრის თუ ზაფხულის მოსამზადებელ ეტაპზე ქართული თუ უცხოური კლუბები გამოიყენებენ, უცხოელები აუცილებლად დატვირთავენ და ქვეყნისთვის დამატებითი ვალუტის წყარო გაჩნდება. უცხოელთა ხშირი სტუმრობა გუნდების კლასზეც აისახება. ცნობილი ფაქტია, რომ თურქული ფეხბურთის განვითარებაში გარკვეული როლი იქ ჩასულ ევროპულ გუნდებთან ხშირმა სპარინგებაც შეასრულა.

სურვილის შემთხვევაში, სპორტული ტურიზმის ხარჯზე, მხოლოდ ასეა შესაძლებელი ტურისტული სეზონის ორიდან ექვს თვემდე გაზრდა. ამიტომაა საჭირო ერთიანი სახელმწიფოებრივი ხედვა და სპორტულ-საკურორტო ინდუსტრიაც ამოქმედდება.

მარტივი არითმეტიკაა - ჩამოსული უცხოური გუნდი 20-დან 25 ათასამდე დოლარს ტოვებს. ინფრასტრუქტურაზეა დამოკიდებული, უახლოეს მომავალში ამ თანხას რამდენზე გავამრავლებთ.

2223
მკითხველის კომენტარები / 2 /
სოსო
0
თუ ამას ზღვისპირა სასტუმროებთან თუნდაც ზღვიდან გადმოქაჩულ წყალზე მომუშავე ღია და დახურულ,სრულ სეზონურ აუზებსაც ავუშენებთ,ადგილობრივი მოსახლეობის შეღავათიანი დაშვებით და კიდევ თუნდაც ერთ სტანდარტულ სპორტულ აუზს დავუმატებთ,ვფიქრობ ძალიან დიდ ეფექტს მოგვცემს,როგორც ჯანმრთელობის ისე სპორტული და ეკონომიკური კუთხითაც
la masia
0
ძალიან მაგარია, ბათუმი ყალიბდება სპორტულ კერად, ცოტა ხნით წინ ბათუმს ვესტუმრე და ახალი საცურაო კომპლექსი ვნახე სუპერ ეს სტადიონი ხომ არის იქეთ ყინულის მოედანი , მიხარია ძალიან. იქნებ შემდეგი ქუთაისი, გორი, ზუგდიდი, თელავი , ახალციხე იყოს (ფოთშიც შენდება დახურული ტიპის აუზი)
მსგავსი ამბები
რუბრიკის სხვა სიახლეები
;