რაჭაში ფეხბურთი გაცოცხლდა: ერთი მოედანი გაკეთდა, მეორე კეთდება

საქართველოს ფეხბურთის ფედერაციის პირველი ვიცე-პრეზიდენტი კახა ჭუმბურიძე რაჭას, კერძოდ, ამბროლაურის მუნიციპალიტეტის სოფელ ჭრებალოს ესტუმრა და რაჭა-ლეჩხუმისა და ქვემო სვანეთის რეგიონული ფეხბურთის ფედერაციის პრეზიდენტ ბექა ოშხერელსა და სოფელ ჭრებალოს გამგებელ შალვა სალუქვაძესთან ერთად, საფეხბურთო მოედნის მშენებლობა მოინახულა, რომელიც საქართველოს ფეხბურთის ფედერაციის დაფინანსებითა და ამბროლაურის მუნიციპალიტეტის მერიის მხარდაჭერით შენდება. ბოლოს, სტუმრები სოფელ ჭრებალოს სკოლას ესტუმრნენ, სადაც ამჟამად ბავშვთა საფეხბურთო გუნდი ვარჯიშობს და საჩუქრად ბურთები გადასცეს.

"ფეხბურთს ფედერაციისთვის ერთ-ერთი ყველაზე საყვარელი პროექტი - "საფეხბურთო მოედანი ყველა სოფელში" - გრძელდება. ამჯერად, სოფელ ჭრებალოში მშენებარე სტადიონი მოვინახულეთ. ვფიქრობთ, ფეხბურთის ფედერაცია სოფლის გამგეობასთან ერთად სექტემბრის ბოლომდე დაასრულებს მოედნის მოწყობას და ბავშვები აქ ვარჯიშს შეძლებენ. ფეხბურთი ამ სოფელში ძალიან უყვართ და 2006-2007-წლიანთა საფეხბურთო გუნდიც ჰყავთ, რომელიც რეგიონულ ტურნირებშიც მონაწილეობს, მაგრამ ვარჯიში ამ პატარა მოედანზე უწევს. სექტემბრის ბოლომდე კი საშუალება მიეცემათ ახალ, ბუნებრივსაფარიან მოედანზე ივარჯიშონ და ითამაშონ", - ამბობს ჭუმბურიძე.

ჭრებალოს შემდეგ მან ოშხერელთან და ადგილობრივი ხელისუფლების წარმომადგენლებთან, ასევე სფფ-ის ვიცე-პრეზიდენტ ალექსანდრე იაშვილთან ერთად ამბროლაურში გადაინაცვლეს, სადაც აგრანო ვაჩაძის სახელობის საფეხბურთო მოედნის ოფიციალური გახსნის ცერემონია გაიმართა.

საფეხბურთო კომპლექსი ორ, საერთაშორისო სტანდარტების შესაბამის მოედანს, 500-მდე მაყურებელზე გათვლილ ტრიბუნას და დამხმარე შენობა-ნაგებობებს მოიცავს. მშენებლობა ამბროლაურის მუნიციპალიტეტისა და რეგიონული განვითარებისა და ინფრასტრუქტურის სამინისტროს დაფინანსებითა და საქართველოს ფეხბურთის ფედერაციის, ასევე ადგილობრივი რეგიონალური ფედერაციის ხელშეწყობით განხორციელდა.

"ამბროლაურისთვის ისტორიული დღეა, რადგან მრავალი წლის ოცნება ახდა. დღეს საერთაშორისო სტანდარტების შესაბამისი საფეხბურთო მოედანი გავხსენით. ამას გარდა, ბოლო ორი წლის განმავლობაში 28 მინისტადიონი მოეწყო და თამამად შეგვიძლია ითქვას, ამბროლაურს აქვს პერსპექტივა, სპორტული ტურიზმის ქალაქი გახდეს", - ამბობს რაჭა-ლეჩხუმისა და ქვემო სვანეთის გუბერნატორი არჩილ ჯაფარიძე.

ზვიად მხეიძე, ამბროლაურის მუნიციპალიტეტის მერი: "ძალიან მნიშვნელოვანია რეგიონებში მსგავსი ინფრასტრუქტურის არსებობა, რათა ჯანსაღი თაობა აღვზარდოთ. იმედი გვაქვს, ისინი მომავალში სასახელო ფეხბურთელები გამოვლენ".

კახა ჭუმბურიძე, სფფ-ის პირველი ვიცე-პრეზიდენტი: "ფეხბურთის ფედერაცია გვერდში დაუდგება მსგავს პროექტებს და სხვადასხვა ასაკობრივ ნაკრებებს შეკრებებზე გამოგზავნის. ამჟამად აქ ჩვენი აკადემიის სამი ასაკობრივი გუნდი იმყოფება. ეს მნიშვნელოვანია მთელი რეგიონისთვის და იმ ბავშვებისთვის, ვინც აქ ცხოვრობს, რადგან მათ მაგალითზე ფეხბურთსა და ზოგადად სპორტში უფრო და უფრო მეტი ადამიანი ჩაერთვება".

გახსნის ცერემონიას ესწრებოდნენ რაჭა ლეჩხუმისა და სვანეთის მაჟორიტატი დეპუტატი გოჩა ენუქიძე, განათლების, მეცნიერების კულტურისა და სპორტის სამინისტროს სპორტის განვითარების დეპარტამენტის უფროსი ირაკლი დოლაბერიძე, ასევე საქართველოს ფეხბურთის ფედერაციის აკადემიის ასაკობრივი გუნდების წევრები.

გახსნის ცერემონიის ოფიციალური ნაწილის დასრულების შემდეგ საქართველოს გამოჩენილმა ვეტერანმა ფეხბურთელებმა ადგილობრივ ვეტერანებთან ამხანაგური მატჩი გამართეს.

3499
მკითხველის კომენტარები / 1 /
გიოგიო
1
და ვის აუშენეს ეს სტადიონები?!ჭრებალო თითქმის დაცლილია-ერთი ორი კაცი თუა შემორჩენილი-ამბროლაურიც ასეთ დღეშია-მარტო-ივნის-აგვისტო-სექტემბრამდე თუ-რჩება-დამსვენებელი ბებია-ბაბუა-სასტუმროების-მეპატრონოები უცხოელების მომსახურეო ბისათვის-რაჭა,რომ იცლება-დაიცალა-არა ახალია,მაგრ ამ ვის ცლია მთისთვის?! პ.ს.ფულის კეთება-პიარი-აი ეს არი სახე დღევანდელი საქარტველოსი-გაუშვით!!!
მსგავსი ამბები
რუბრიკის სხვა სიახლეები
;