რა ბედი ელის პაპუნაშვილს? ანუ ისე არ წვიმს, როგორც ქუხს...

როგორც ვწერდით, საქართველოს ნაკრების 23 წლის შემტევმა გიორგი პაპუნაშვილმა ტრავმა მოიშუშა და ესპანური მედიის ცნობით, "კორდობასთან" უახლოეს შეხვედრაში უნდა დაუბრუნდეს გუნდს...

El Periodico de Aragon  ვარაუდობს, რომ "სარაგოსაში" გიორგი პაპუნაშვილის დარჩენის შანსი მცირეა. ეს არაგონული გაზეთი ამტკიცებს, რომ სეზონის დასრულების შემდეგ კლუბი ქართველ შემტევს, დიდი ალბათობით, ტრანსფერზე დააყენებს.

პაპუნაშვილი "სარაგოსაში" თბილისის "დინამოდან" გადავიდა. მისთვის გამორჩეული იყო წინა სეზონი, როცა 25 მატჩი ჩაატარა არაგონული გუნდის შემადგენლობაში და 7 გოლი შეაგდო. გარდა ამისა, მან "სარაგოსასთან" ერთად ითამაშა პრიმერაში გადასასვლელ პლეი ოფში, რამაც კიდევ გაზარდა მის მიმართ ინტერესი.

პაპუნაშვილს ამ სეზონში გამუდმებით თან სდევს ტრავმები. ის "ალბასეტესთან" შეხვედრაში დაშავდა. თავდაპირველად ექიმები ვარაუდობდნენ, რომ ტრავმა მსუბუქი იქნებოდა, მაგრამ ასე არ მოხდა. პაპუნაშვილი მხოლოდ 4 მატჩით დაბრუნდა და შემდეგ ისევ სამკურნალო გახდა.

"სარაგოსას" გადაწყვეტილებით, პაპუნაშვილი ტრანსფერზე დადგება. კლუბი მასთან დაკავშირებულ ყველა შეთავაზებას ძალიან დიდი ყურადღებით განიხილავს. ერთი წლის წინ მან არაგონელებთან კონტრაქტი 2022 წლამდე გაახანგრძლივა, თუმცა მას შემდეგ კოჭის ტრავმა აწუხებს", - წერს ესპანური გაზეთი.

იქ ასევე წერია, რომ კლუბის ხელმძღვანელობა გაცილებით მოგებული დარჩებოდა იმ შემთხვევაში, პაპუნაშვილი გასულ ზაფხულს რუსეთის რომელიმე კლუბში რომ გაეყიდა. დაინტერესება ახლაც არის, მაგრამ კონკრეტული ჯერ არაფერია. რუსეთის გარდა, ინტერესი არის ბელგიიდან და ამერიკული MLS-იდან.

რა ხდება რეალურად პაპუნაშვილთან დაკავშირებით? ჩვენი ინფორმაციით, გადაწყვეტილი სულაც არ არის მისი წასვლა არაგონული კლუბიდან. ზაფხულში თუ რომელიმე გუნდს დიდი ინტერესი ექნება და ეს ინტერესი განაპირობებს გიორგი კარიერულ წინსვლას, "სარაგოსა" სერიოზულად განიხილავს ამ შეთავაზებას. თუ არა და, პაპუნაშვილი ჩვეულებრივად გააგრძელებს კარიერას "სარაგოსაში".

მით უმეტეს, პაპუნაშვილის თამაში ძალიან მოსწონს გუნდის სამწვრთნელო შტაბს და მისი იმედიც აქვს. ეგაა, ბოლო დროს ისინი ვერ შეძლებდნენ ქართველი შემტევის გამოყენებას, რადგან ის დაშავებული იყო.

"სარაგოსასა" და პაპუნაშვილს შორის გაფორმებული კონტრაქტის მიხედვით, თუ გიორგის აყვანა ლა ლიგის რომელიმე გუნდმა მოინდომა, მაშინ მან ქართველის სანაცვლოდ 20 მილიონი ევრო უნდა გადაიხადოს. იმ შემთხვევაში, თუ ინტერესი იქნება ლა ლიგა 2-დან, მაშინ თანხა, რა თქმა უნდა, 20 მილიონთან ახლოსაც ვერ მივა.

1606
მკითხველის კომენტარები / 0 /
მსგავსი ამბები
რუბრიკის სხვა სიახლეები
;