რა გათვალა მოურინიომ... ან ჟოზე მოტეხავს რქებს სხვებს, ან თავად მოტყდება რქები

შეიძლება, ჟოზე მოურინიოს გაწვრთნილი გუნდების მიერ ნაჩვენები ფეხბურთი ბევრს არ მოსწონს, მაგრამ უნდა ვაღიაროთ, რომ პორტუგალიელმა სპეციალისტმა, ისე, როგორც არავინ, იცის დიდი მატჩების მოგება.

ეს ერთხელაც დამტკიცდა შაბათს, როცა"იუნაიტედმა" საშინაო ასპარეზზე დასცა კარგ ფორმაში მყოფი "ლივერპული"...

რა გათვალა ჟოზემ?

თამამად შეიძლება ითქვას, რომ ჟოზე მოურინიომ ერთ ფლანგზე მოუგო შეხვედრა იურგენ კლოპს. პორტუგალიელმა ერთი გასროლით ორი კურდღელი მოკლა.

რაში მდგომარეობდა მოურინიოს გათვლა? მან კარგად იცოდა, რომ მარცხენა ფლანგზე "ლივერპულს" ჰქონდა როგორც ყველაზე ძლიერი (მოჰამედ სალაჰი), ისე ყველაზე სუსტი (ტრენტ ალექსანდერ-არნოლდი) წერტილები.

მოურინიომ მხოლოდ მისთვის ცნობილი რაღაც მანქანებით მოახერხა სალაჰის განეიტრალება. გარდა ამისა, სწორედ ალექსანდერ-არნოლდის ზონაში კეთდებოდა "მანჩესტერის" შეტევებისას გამამწვავებელი გადაცემების უმრავლესობა.

შეტევით ფაზაში 19 წლის ლივერპულელის მოქმედებებს ვერ დავიწუნებთ, სამაგიეროდ, დაცვით ფაზაში მას აშკარა პრობლემები აქვს. უეჭველია, მატჩამდე მოურინიომ ეს ყველაფერი ძალიან კარგად გათვალა.

რაშფორდის როლი

მატჩის მთავარი გმირი მარკუს რაშფორდი გახლდათ. მისმა დუბლმა "იუნაიტედის" წარმატება განაპირობა. რა თქმა უნდა, არ შეიძლება რომელუ ლუკაკუს როლის იგნორირებაც - ბელგიელს რაშფორდის ორივე გოლში ერია ხელი.

"ლივერპულმა" ვერ გაშალა თავისი ტრადიციული შემტევი "მარაო". ამის მთავარი მიზეზი ის იყო, რომ შეტევაში უაღრესად ეფექტურმა რაშფორდმა დაცვაშიც დიდებულად იმუშავა. მთელ რიგ შემთხვევებში, როცა "ლივერპული" უტევდა, ის ფლანგელი მცველის, ეშლი იანგის ადგილას ჩნდებოდა.

რატომ მოიგო მოურინიომ?

გემოვნებაზე არ დავობენ. ზოგს, როგორც მწვრთნელი, მოურინიო უფრო მოსწონს, ზოგს კლოპი უფრო ესიმპათიურება. ამ შეხვედრაში იყო ერთი კონკრეტული მომენტი, რაშიც პორტუგალიელმა აშკარად დაჯაბნა გერმანელი.

კერძოდ, მოურინიო გაცილებით კარგად იცნობს ზოგადად პრემიერლიგას, ვიდრე მისი ოპონენტი. მან წერტილოვანი დარტყმებით გაანადგურა მეტოქე. ასეთი რამ მხოლოდ ზეგამოცდილ სპეციალისტს თუ შეუძლია.

რა უნდა  ისწავლოს კლოპმა?

...რა და, გადამწყვეტი შეხვედრების მოგება. წინააღმდეგ შემთხვევაში, გუნდს ძალიან გაუჭირდება უამრავი ქომაგის გულის წადილის ასრულება. ეს გულის წადილი კი სხვა არაფერია, თუ არა ტიტულების მოგება.

მართლაც მოვიდა დრო, "ლივერპულმა" ეს გააკეთოს. მომავალ სეზონში, როგორც მინიმუმ, სერიოზულად და ბოლომდე უნდა იბრძოლოს პრემიერლიგის მოსაგებად.

"მანჩესტერ სიტი" ახლა ისეთ ფორმაშია, გაისადაც ასე რომ იყოს, ამ "ლივერპულს" მასთან პრაქტიკულად შანსი არ ექნება. მაგრამ ეს არ ნიშნავს იმას, რომ გამოსავალი არ არსებობს და ბრძოლას აზრი არ აქვს.

რატომაც არა?! მაგალითად, "ლივერპულს" სჭირდება უკეთესი მეკარე, უფრო კლასიანი მცველები და მეტი კრეატივი მოედნის ცენტრში. იშვიათ ჩავარდნებს თუ არ ჩავთვლით, წინ ბიჭები (მანე-სალაჰი-ფირმინო) ბრდღვნიან ყველაფერს, მაგრამ ამას აუცილებლად სჭირდება მხარდაჭერა მოედნის სიღრმიდან.

კლუბის ხელმძღვანელობას ზაფხულში დიდი მუშაობა მოუწევს სატრანსფერო ბაზარზე, დიდი და, რაც მთავარია, მიზანმიმართული...

რისკენ ილტვის ჟოზე?

მოურინიო კი თავის "მანჩესტერს" ძერწავს. მას არაფერი აქვს საერთო ამ გუნდის ზოგად სახესთან - შემტევთან და სანახაობრივთან. მას უნდა, იგივე იყოს "იუნაიტედისთვის", რაც თავის დროზე იყო სერ ალექს ფერგიუსონი.

დარწმუნებული ბრძანდებოდეთ, ჟოზეს ძალიან უნდა პოლ პოგბას მოშორება. ის და ფრანგი ბოლოს ხშირად ჩხუბობენ. ეს მოურინიოს დიდი გამარჯვება იქნება. საკითხავი ისაა, ვინ ვის აჯობებს. ფაქტია, "იუნაიტედში" გაზრდილ და მერე ტურინში გაშვებულ პოგბას თავისი წონა აქვს ამ გუნდში.

ფაქტია, მალე "მანჩესტერში" ძალიან საინტერესო პროცესები განვითარდება. ან ჟოზე მოტეხავს რქებს სხვებს, ან თავად მოტყდება რქები. სადაც ჟოზეა, იქ სულ მუდამ ინტრიგაა. მოკლედ, ვერ მოვიწყენთ...

ყოველდღიური სპორტული გაზეთი "ლელო"
1512
მკითხველის კომენტარები / 0 /
მსგავსი ამბები
რუბრიკის სხვა სიახლეები
;