რა გუნდია  'შერიფი'? ქართველი ბოსით, ხორვატი მწვრთნელით, ნაცნობი  ბრაზილიელით... 'ორდაბასის' მთავარი ვარსკვლავი კახა ცხადაძეა, მთავარი ხალხი შეტევაშია...

გუშინ გაიმართა ჩემპიონთა და ევროპალიგის საკვალიფიკაციო ეტაპების წილისყრა. საქართველოს ჩემპიონ “საბურთალოს” მეტოქე პირველ სტადიაზე ტირასპოლის “შერიფი” იქნება... 

ისტორია განმეორდა - წინა სეზონში საქართველოს ჩემპიონი ქუთაისის “ტორპედო” სწორედ “შერიფთან” დაპირისპირების შემდეგ დაემშვიდობა ევროპის უმთავრეს საკლუბო ტურნირს. პირველი შეხვედრა ქუთათურებმა შინ 2:1 მოიგეს, ტირასპოლში კი 0:3 დამარცხდნენ.

“შერიფში” მმართველობაში კვლავ საკვანძო პოზიცია უჭირავს ახლო წარსულში ცნობილ ქართველ ფეხბურთელს, ვაჟა თარხნიშვილს, რომელიც დიდი ხანია იქაურებისთვის ლეგენდად იქცა. გუნდის ერთ-ერთი ლიდერი კი გორის “დილას” ყოფილი შემტევი, ბრაზილიელი ფლანგელი ლეანდრო რიბეიროა, ვინც გუნდს ამასწინათ მოლდოვის თასი მოაგებინა. 

მოლდოვურ კლუბს 45 წლის ხორვატი სპეციალისტი ზორან ზეკიჩი წვრთნის. ის ადრეც ხელმძღვანელობდა “შერიფს”, მერე კი ხორვატული “ოსიეკის” სათავეში იდგა. როგორც მწვრთნელმა, მოიგო მოლდოვის ჩემპიონატი და თასი.

მიმდინარე ჩემპიონატში “შერიფი” 13 ტურის შემდეგ 11 გამარჯვებითა და 2 მარცხით დამაჯერებლად ლიდერობს.

პირველი მატჩი 9 ან 10 ივლისს ტირასპოლში შედგება, რაც “საბურთალოსთვის” გარკვეულ უპირატესობად შეიძლება ჩაითვალოს, საპასუხო შეხვედრა კი 16 ან 17 ივლისს თბილისში გაიმართება.

“შერიფში”, ტრადიციულად, მრავლად არიან ლეგიონერები და ჩემპიონთა ლიგის სტარტამდე, ალბათ, კიდევ უფრო გაძლიერდება. მოლდოვური მედიის ცნობით, ამაზე მუშაობა უკვე მიდის.

ტიტულებს თუ გადავხედავთ, ცხადია, შედარებაც კი არ არის - “შერიფი” 17-ჯერ გახდა მოლდოვის ჩემპიონი, 10-ჯერ მოიგო ქვეყნის თასი, 8-ჯერ სუპერთასი და ორჯერ - თანამეგობრობის თასი. გარდა ამისა, გუნდისთვის ჩვეულებრივი ამბავია ევროპალიგის ჯგუფში ასპარეზობა. ამ დროისთვის გუნდის განაცხადში არიან:

მეკარეები - დმიტრუ კალეანდიჩი, ზვონიმირ მიკულიჩი (ხორვატია), სერგეი პაშჩენკო;
მცველები - იაროსლავ იაში (პოლონეთი), ვილფრიდ ბალიმა (ბურკინა ფასო), კრიშტიანო (ბრაზილია), ვლადიმირ კოვაჩევიჩი (სერბეთი), ვიაჩესლავ პოსმაჩი, არტიომ ჰორდიანკო;
ნახევარმცველები - ანდრეი ბლიზნიჩენკო (უკრაინა), მიხაილ გეჩევი, ხოსე ანხელ ხურადო (ესპანეთი), ალექსანდრ ბელოუსოვი, გეორგე ანტონი, ანტონ პალიჩი (ხორვატია), ეუჟენ ოანჩეა, იური კეინდიში (ბელარუსი), მაქსიმ კოჟოკარუ;
თავდამსხმელები - პატრიკ პედერსენი (დანია), რობერტ ტამბე (კამერუნი), ლეანდრო რიბეირო (ბრაზილია).

ევროპალიგა: ტორპედო vs ორდაბასი
ორდაბასის მთავარი  ვარსკვლავი 
კახა ცხადაძეა, მთავარი ხალხი შეტევაშია...

ქუთაისის “ტორპედო” კახა ცხადაძის გაწვრთნილ ყაზახურ “ორდაბასის” დაუპირისპირდება. პირველი მატჩი 11 ივლისს შიმკენტში გაიმართება, ხოლო საპასუხო - 18 ივლისს თბილისში.

საქართველოს ნაკრების ექსმწვრთნელი “ორდაბასის” მთავარი ვარსკვლავია. რომ არა მისი დიდი ძალისხმევა, ეს გუნდი, დიდი ალბათობით, ვერ შეძლებდა ევროტურნირების საგზურის მოპოვებას. გასულ სეზონში “ორდაბასიმ” ყაზახეთის პრემიერლიგაში მე-4 ადგილი დაიკავა და ამავე პოზიციაზეა მიმდინარე ჩემპიონატშიც.

ზოგადად, შიმკენტურმა კლუბმა ოთხჯერ ითამაშა ევროპალიგაზე და მხოლოდ ერთხელ დაძლია პირველი ეტაპი. გუნდის გამწევ ძალას ლეგიონერები წარმოადგენენ, თუმცა ცხადაძის ხელმძღვანელობით ბოლო დროს რამდენიმე საინტერესო ახალგაზრდა ყაზახი მოთამაშეც დაწინაურდა და ასე განსაჯეთ, ნაკრების კარზეც დააკაკუნა...

მოედნის ცენტრში მთავარი კაცია სამხრეთ აფრიკის ნაკრების საყრდენი მეი მალანგუ. ის გუნდს “ლუდოგორეციდან” ჰყავს ნათხოვარი. კარგი ფეხბურთელია სენეგალელი აბდულაე დიაკიტეც. 

“ორდაბასის” მთავარი ხალხი შეტევაშია. იქ არის ბრაზილიელი ფორვარდი ჟოაო პაულო, ვინც ასევე “ლუდოგორეცის” კუთვნილებაა და კარგად შეეწყო გუნდს. აქვეა ზიგი ბადიბანგა - ბელგიაში დაბადებული კონგოელი, რომელიც წლების განმავლობაში მთავარი ფიგურა იყო “შერიფში”.
“ორდაბასის” სადღეისო შემადგენლობა ასეთია:

მეკარეები - ბეხან შაიზადა, დმიტრო ნეპოგოდოვი;
მცველები - დამირ დაუტოვი, ულარ ჟაკსიბაევი, ტამერლან ერლანოვი, მარატ ბისტროვი, სერგეი მალი, ტალგატ ადირბეკოვი, პაბლო ფონტანელო (არგენტინა); 
ნახევარმცველები - მეი მალანგუ (სამხ. აფრიკა), მირსად მეჰანოვიჩი (ბოსნია), კირილო კოვალჩუკი (უკრაინა), სამატ შამში, მარდან ტოლებეკი, აბდულაე დიაკიტე (სენეგალი), ადილხან დობაი, ტემურ დოსმაგამბეტოვი, ერხან დასტანოვი;
თავდამსხმელები - ტოხტარ ჟანგიშბაევი, ჟოაო პაულო (ბრაზილია), ზიგი ბადიბანგა (დრ კონგო), ალეკსანდრ შოტკინი.

ყოველდღიური სპორტული გაზეთი "ლელო"
507
მკითხველის კომენტარები / 0 /
მსგავსი ამბები
რუბრიკის სხვა სიახლეები
;