Marca: 'ლივერპულმა' ძეგლი დაიდგა... The Guardian: 'ბარსელონა' ყვითელი, მობოდიალე დამკვირვებელი იყო

ინგლისურ და ესპანურ მედიაში "ლივერპული"-"ბარსელონას" დაპირისპირებაზე დიდი გარჩევები იყო. რა თქმა უნდა, თემა ამით არ არის ამოწურული. "ენფილდის" ჯახზე კიდევ დიდხანს ილაპარაკებენ, რადგან, დიდი ალბაობით, ის გავლენას მოახდენს ცალკეული პერსონების მომავალზე...

BBC Sport: "ცოტას თუ სჯეროდა "ლივერპულის" გამარჯვების იმის მერე, რაც ერთი კვირის წინ ბარსელონაში მოხდა. იურგენ კლოპმა თამაშის წინ თქვა, რომ გუნდი ბოლომდე იბრძოლებდა და მან ეს სიტყვა შეასრულა. შეიძლება, გმირებად გამოვაცხადოთ ორიჯი და ვეინალდუმი, რომელთაც ორ-ორი გოლი გაიტანეს, მაგრამ ამ საღამოს ერთი მთავარი გმირი ჰყავდა და ეს იყო "ლივერპული"!

The Telegraph: "ლივერპული" არასოდეს, არცერთ სიტუაციაში არ ნებდება! მათ უკვე დაწერილი აქვთ დიდი "ქამბექების" ისტორია და პირველად ეს იყო 14 წლის წინ, სტამბოლში (როცა "ლივერპულმა" ჩემპიონთა ლიგის ფინალში "მილანს" პირველი ტაიმის 0:3 გაუბათილა და მერე პენალტების სერიაში გაიმარჯვა - რედ)... აქ შეიძლება კამათი მხოლოდ იმაზე, თუ რომელი იყო უფრო დიდი "ქამბექი"... შეუჩერებელი "ლივერპული" წინსვლას აგრძელებს. ერთ მხარეს არის საფეხბურთო უბედურება, მეორე მხარეს - საფეხბურთო სასწაული. უღიმღამო "ბარსელონამ" ასეთი დამამცირებელი მარცხი ნამდვილად დაიმსახურა. "ენფილდმა" აჩვენა, თუ რა არის "ლივერპული"...

The Guardian: "ეს ნამდვილად მოხდა! "ლივერპულის" საევროთასო ისტორიაში იყო დიდი და ბრწყინვალე გამარჯვებები, მათ შორის - სტამბოლში! მაგრამ ეს რაღაც განსაკუთრებული იყო. დიახ, ეს იყო უტეხი სულის ზეიმი! "ბარსელონა" - თანამედროვეობის ერთ-ერთი ყველაზე ცნობილი და დაფასებული გუნდი - იქცა ყვითელ მაისურებში გადაცმული მობოდიალე დამკვირვებლების ჯგუფად".

Daily Mail: "სტამბოლზე უკეთესი? დიახ, ეს ნამდვილად იყო სტამბოლზე უკეთესი, იმიტომ, რომ ეს "ბარსელონა" "მილანზე" უკეთესია, მესი უკეთესია კაკაზე, ეს "ლივერპულიც" მაშინდელზე უკეთესია. ის უბრალოდ, საოცარია! ისეთი შთაბეჭდილება შეიქმნა, თითქოს კლოპი მხოლოდ ამ დღეზე ოცნებობდა "ლივერპულში" მოსვლის მომენტიდან. ეს არის სული, ეს არის ვნება, ემოცია... მაგრამ წინ მაინც დიდი გზაა. "ლივერპულმა" აჯობა მეტოქეს არამხოლოდ ფიზიკურად, არამედ, ტექნიკურადაც და ინტელექტუალურადაც! ბევრისთვის პლანეტის საუკეთესო გუნდად მიიჩნეული "ბარსელონა" მარტო 20 წლის მერსისაიდელმა ბიჭმა, ტრენტ ალექსანდერ-არნოლდმა გააცურა (იგულისხმება კუთხურის ეპიზოდი, რომელსაც მეოთხე გოლი მოჰყვა - რედ).

Marca: "ამ მარცხს მრავალი ფაქტორის გამო ტკივილით გავიხსენებთ. "ლივერპულს" არ ჰყავდა სალაჰი და ფირმინო, პირველი თამაში წაგებული ჰქონდა 0:3, შეცდომები დაუშვეს ალბამ, დემბელემ, მერე იყო ორიჯის მეოთხე გოლი... "ენფილდი" "ბარსელონას" შავ ისტორიად იქცა. ჩემპიონთა ლიგაში ზედიზედ ორი ასეთი მარცხი სტრუქტურული ცვლილებების გარეშე ვერ ჩაივლის. "ლივერპულმა" საკუთარ თავს საფეხბურთო ძეგლი დაუდგა. კლოპი წლის მწვრთნელია. "ბარსელონას" მხრიდან მთავარი დამნაშავე კი ვალვერდეა, რომელმაც ვერ იპოვნა საწინააღმდეგო არგუმენტები. მესი უბრალოდ გაქრა მოედნიდან. ის, როგორც ლიდერი და კაპიტანი, ვალვერდესთან ერთად პასუხისმგებლობას ვერ გაექცევა".

AS: "ენფილდმა" უბრალოდ გათელა "ბარსელონა", რომელსაც ფეხები უკანკალებდა. ასეთ დროს დანდობა არც "ლივერპულმა" იცის".

Sport: "ბარსელონა" დაინგრა. გუნდი, რომელიც სოლიდურად, ამბიციურად და გაწონასწორებულად გამოიყურებოდა, მოედანზე ისე გავიდა, თითქოს დასცინოდა მეტოქეს. ვერაფერი ისე ზუსტად ვერ აღწერს "ბარსელონას" იმ საღამოს თავგადასავალს, როგორც "ლივერპულის" მეოთხე გოლი. ვალვერდეს მხრებზე უდიდესი პასუხისმგებლობაა, რადგან ჭეშმარიტების მომენტში მან კვლავ ვერ გამონახა სწორი სვლები და იგივე შეცდომები დაუშვა, რაც გასულ წელს".

ყოველდღიური სპორტული გაზეთი "ლელო"
1131
მკითხველის კომენტარები / 0 /
მსგავსი ამბები
რუბრიკის სხვა სიახლეები
;