რა იქნება, თუ ვაისი წავა? განვიხილოთ შესაძლო ვარიანტები

ორიოდე დღის წინ “ლელომ” ქართული სპორტული მედიის წარმომადგენლები გამოჰკითხა ვლადიმირ ვაისის მომავლის თაობაზე.

აზრები გაიყო. ზოგი მიიჩნევს, რომ სლოვაკმა სპეციალისტმა, სულ მცირე, ერთა ლიგის ბოლომდე უნდა იმუშაოს ეროვნულ გუნდში. ზოგიც ვაისის წასვლის მომხრეა...

მათ გარისკეს...

არავინ იცის, როგორ განვითარდება მოვლენები ერთა ლიგის ნახევარფინალამდე. იქამდე, საქართველოს ნაკრებს კიდევ უწევს შესარჩევი მატჩები და პლუს ორი ამხანაგური თამაში. გასაგებია, რომ ამ ჯგუფში ციდან ვარსკვლავებს ვეღარ მოვწყვეტთ, ამას არც ველოდით და არც ვითხოვდით ვაისის გუნდისგან, მაგრამ ერთია, როცა ერთა ლიგის ხათრით არ ითხოვ შედეგს და მეორე, რომ ნაკრებმა სახე ნებისმიერ შემთხვევაში უნდა შეინარჩუნოს.

თვალწინ არის ბელარუსთა მაგალითი. იგორ კრიუშენკო ამ გუნდის მთავარი მწვრთნელი აღარ არის. მას ევროპის ჩემპიონატის საკვალიფიკაციო ეტაპის სტარტზე ნაჩვენები შედეგი არ აპატიეს. ბელარუსებმა საქართველოს ნაკრებთან უმნიშვნელოვანესი დაპირისპირების წინ (იქამდე ჯერ გვარიანი დროა, მაგრამ ორიენტირი ახლა სწორედ ეს თამაშია) გარისკეს.

ისე ჩანს, რომ ჩვენ გარისკვას არ ვაპირებთ. ვთქვათ და, მოგვიწია. ეს ნამდვილად არავის გვინდა, მაგრამ ვთქვათ და, საქართველოს ნაკრების ამჟამინდელი კონდიციებისა და ტრავმების ეპიდემიის გათვალისწინებით, არ გაუმჯობესდა შედეგი და თამაშის ხარისხი. მაშინ ვაისის მუშაობით უკმაყოფილოთა რიცხვი კიდევ უფრო გაიზრდება.

მოკლედ, ვაისის შეცვლა ერთა ლიგის გადამწყვეტ შეხვედრებამდე მაინცდამაინც სასურველი არაა, მაგრამ რა უნდა ვქნათ იმ შემთხვევაში, თუ ამის აუცილებლობის წინაშე დავდგებით? არ არსებობს სიტუაცია გამოსავლის გარეშე.

ორი აზრი არ არის, თუ საქართველოს ფეხბურთის ფედერაციას მოუწევს სლოვაკ მწვრთნელთან განშორება, ნაკრები უნდა ჩაიბაროს ისეთმა სპეციალისტმა, რომელიც კარგად იცნობს ქართული ფეხბურთის რეალობას და ეროვნულ გუნდს. ჩვენი აზრით, ასეთი კანდიდატი ბევრი არ არის, მაგრამ მაინც არიან.

კახა ცხადაძე

საქართველოს ნაკრების ყოფილი მწვრთნელი, ვინც სკანდალურად გაუშვეს ქვეყნის უპირველსი გუნდიდან. მის ხელში საქართველოს ნაკრებმა გაიხსენა ფეხბურთის თამაში. დაამარცხა შოტლანდია და სტუმრად ლამის ტოლ-სწორად ეთამაშა გერმანიას. კახა ცხადაძეს არ დასცალდა მუშაობა ნაკრებში და ის გუნდიდან სწორედ მაშინ გაუშვეს, როცა მის მუშაობას შედეგი უნდა მოეტანა.

ცხადაძეს არაერთ გუნდში (თბილისის “ლოკომოტივი”, “დინამო”, “სიონი”, ბაქოს “სტანდარდი”, საქართველოს ახალგაზრდული ნაკრები, ბაქოს “ინტერი”, ყაზახური “ქაირათი” და “ორდაბასი”) უმუშავია და მან თავისი კვალი ყველგან დატოვა. თუნდაც “ორდაბასი” ავიღოთ - პროვინციული ყაზახური კლუბი ყველასთვის ანგარიშგასაწევ ძალად აქცია.

ცნობილია, რომ ცხადაძესა და საქართველოს ფეხბურთის ფედერაციის ამჟამინდელ ხელმძვანელობას შორის თბილი ურთიერთობა არ არის, მაგრამ ფეხბურთში, ისევე, როგორც პოლიტიკაში, არ არსებობენ მუდმივი მტრები და მუდმივი მეგობრები.

გია გეგუჩაძე

საქართველოს ერთ-ერთი საუკეთესო მწვრთნელი, რომელსაც ეროვნულ ნაკრებში არასოდეს უმუშავია და ბევრი გულშემატკივარი დღესაც იმ აზრზეა, რომ ქვეყნის პირველი გუნდი სწორედ მან უნდა გაწვრთნას. 

ისტორია დაწერა ჯერ კიდევ თბილისის “დინამოში”, სადაც დიდებულად იმუშავა და 2004 წელს გუნდი უეფას თასის (დღევანდელი ევროპალიგა) ჯგუფურ ეტაპზე გაიყვანა. ასეთი შედეგისთვის აქამდე არცერთ ქართველ მწვრთნელს და ქართულ კლუბს არ მიუღწევია.

გია გეგუჩაძემ გამოძერწა ქართული საკლუბო ფეხბურთის უახლოესი წარსულის საუკეთესო პროდუქტი - “ზესტაფონი”, რომელმაც საქართველოში ლამის ყველა ტიტული მოიგო და ცოტა რომ გამართლებოდა, დიდ ევროპულ ასპარეზზეც გავიდოდა...

ამჟამად ბათუმის “დინამოს” მთავარი მწვრთნელია. უყვარს “პირველ ნომრად” თამაში და შეტევა. მის გუნდს ნებისმიერისგან გამოარჩევთ. წარმატებით ვერ იმუშავა საქართველოს ახალგაზრდულ ნაკრებში, მაგრამ ეს ბევრს ვერაფერს ცვლის.

შოთა არველაძე

ძალიან ანგარიშგასაწევი ფიგურა ქართულ ფეხბურთში. გაწვრთნა თურქული სუპერლიგისა და ებრაული უმაღლესი ლიგის კლუბები. რატომღაც ასე მგონია: ადრე თუ გვიან დადგება დრო, როცა შოთა არველაძე საქართველოს ნაკრებს ჩაიბარებს. ის და ჩვენი ეროვნული გუნდი იმდენად განუყოფელი მცნებებია, ძალიან ძნელი წარმოსადგენია, სხვანაირად მოხდეს.

თავად შესანიშნავ შემტევს უყვარს შემტევი ფეხბურთი. ამჟამად ტაშკენტის “ფახთაქორის” მთავარი მწვრთნელია და გარკვეული შედეგიც აქვს. შოთას კიდევ ერთი უპირატესობა ის არის, რომ ნაკრების ქიციც იცის და ქიცმაცურიც. ძალიან ჭკვიანი, მუდამ ფეხბურთზე მოფიქრალი, ერუდიტი მწვრთნელი ძალიან საინტერესო მიდგომებით.

აი, ამ სამი მწვრთნელიდან ერთ-ერთს ვუწინასწარმეტყველებთ საქართველოს ნაკრებში მოსვლას იმ შემთხვევაში, თუ ვლადიმირ ვაისს მაინც მოუხდა ჩვენს ეროვნულ გუნდთან განშორება...

ყოველდღიური სპორტული გაზეთი "ლელო"
2056
მკითხველის კომენტარები / 5 /
თეიმურაზ რეხვიაშვილი
2
უნდა გაგახსენოთ რომ გვყავს მცოდნე,რისკიანი და პატრიოტი კაცი–საშა ჩივაძე რომელსაც გერმანიის ვარ
სკვლავებით დახუნძულ გუნდთან წაგება ტრაგედიად
ჩაუთვალეს და თავმოყვარე კაცმა ვერ აიტანა მაშინ
არაკაცების გესლი და თვითონ გადადგა და ფარერებთან რომ ვერ მოეგო ალბათ თავს მოიკლავდა
მინდა გაგახსენოთ,როგორ მოუგო მან სტოიჩკვის ბულ
გარეთს და ზედ მიაყოლა უელსიც,მაშინ საშამ გააკეთა
ის რასაც ვაისი სიზმარშიც ვერ გაბედავდა,მარცვენა
მცველად ათამაშა ამპლუით ცენტრალური თავდამსხმელი ზაზა რევიშვილი და მან და კახა გოგი
ჩაიშვილმა შეტევების კორიანტელი მაწყვეს,ხოლო
უელსთან ზაზას ტრამვის გამო ათამაშა ბევრისთვის
უცნობი ღუდუშაური.და მანაც გაუმართლა.
თეიმურაზ რეხვიაშვილი
2
ამ სამიდან განსაკუთრებული შედეგები არცერთს არ ჰქონია,ამიტომ ვაისი უნდა წავიდეს და ნაკრები,ჩივაძე
უნდა ჩაიბაროს,თურაშაულის პატრონი ტყეში მაჟალოს
ეძებდაო.....
მსგავსი ამბები
რუბრიკის სხვა სიახლეები
;