რა მოუთხრო მილოშ გლიგორიევიჩმა სერბებს ქართველებზე

სერბულ გაზეთ "სპორტსკი ჟურნალში" დიდი ყურადღება დაეთმო საქართველოსა და სერბეთის დაპირისპირებას, რომელიც ჩვენი გუნდის გამარჯვებით (94:90) დასრულდა. ამ გამოცემაში ვკითხულობთ მატჩის ვრცელ მიმოხილვას, ანალიზს, იგორ კოკოშკოვის, ილიას ზუროსის, მილოშ გლიგორიევიჩის ინტერვიუებს...

მილოშ გლიგორიევიჩი სერბებისთვის მეტად საპატივსაცემო პიროვნებაა. იგი 2015 წელს საქართველოს ნაკრებში იგორ კოკოშკოვმა ჩამოიყვანა და მას მერე ჩვენი გუნდის სამწვრთნელო შტაბში მუშაობს.

2020 წელს ბატონ მილოშს დიდი პასუხისმგებლობა დაეკისრა - საქართველოს 20-წამდელთა ნაკრების მთავარი მწვრთნელია, გუნდისა, რომელიც B დივიზიონის მატჩებს თბილისში უმასპინძლებს.

ახალგაზრდულ ნაკრებზე მასთან ინტერვიუს მალე შემოგთავაზებთ, ახლა კი სერბულ პრესაში გამოქვეყნებულ პუბლიკაციას გავეცნოთ.

ჯერ სერბეთი-საქართველოზე:

"- სერბეთის ნაკრებთან საქართველოს ამხანაგურადაც უთამაშია და ოფიციალური შეხვედრებიც გვქონია. ასეთ გუნდებთან დაპირისპირება დიდი გამოწვევაა, ქართველ კალათბურთელებს აქვთ ამბიცია ღირსეულად გამოვიდნენ, იბრძოლონ და გაიმარჯვონ. ასე იყო ევრობასკეტი 2021-ის შესარჩევ ეტაპზეც, ბელგრადში. თუმცა საქართველოს ევროპის ჩემპიონატზე გასვლა გარანტირებული აქვს, რადგან მასპინძელია. ვცდილობთ შევკრათ ის გუნდი, რომელიც 2021-ში დაიცავს ქვეყნის ღირსებას. ახალგაზდები უნდა შეეჩვიონ ასეთ ინტენსიურ, მაღალი დონის თამაშებს, იგრძნონ ატმოსფერო. მოზარდი კალათბურთელების ნაწილი საზვარგარეთ ასპარეზობს, თუმცა პრობლემა ის არის, რომ ისინი უცხოეთში არ არიან ისეთ გუნდებში, სადაც მათ პროგრესზე სრულფასოვნად იზრუნებენ. საქართველოში არის ხარისხიანი ვარჯიშები, მაგრამ არ არის ხარისხიანი შეჯიბრება.

საქართველოს ნაკრებს 2008 წლიდან 2015-მდე სერბეთის ამჟამინდელი დამრიგებელი იგორ კოკოშკოვი წვრთნიდა. მილოშ გლიგორიევიჩიც მასთან მუშაობდა.

- იგორმა თამასა ძალიან მაღლა ასწია, მისი წასვლის შემდეგ საქართველო ევროპის საკალათბურთო რუკაზე გამოსაჩენ პუნქტად იქცა. ქართველები კოკოშკოვს დიდად აფასებენ. მიუხედავად იმისა, რომ ოთხი წელია სხვაგან მუშაობს, ახლაც იგრძნობა მისდამი პატივისცემა. ბევრი ქართველი იგორის სლოვენიას ქომაგობდა ევრობასკეტზე, შემდეგ მის NBA-ურ გუნდებს...

ევრობასკეტი 2021-ის ერთი ჯგუფის მატჩები თბილისში გაიმართება. საინტერესოა, რას ნიშნავს ეს ქართველებისთვის.

- ევრობასკეტი ქვეყნის ისტორიაში ერთ-ერთი ყველაზე მნიშვნელოვანი მოვლენაა, რომლის მასპინძლობის უფლებაც აქამდე მიუღიათ. შენდება ახალი საკალათბურთო დარბაზი და იქმნება ახალი გუნდი. ვიცით, რომ შესარჩევ ეტაპზე ვერ გვეყოლება თორნიკე შენგელია და გოგა ბითაძე, თუმცა ევროპის ჩემპიონატამდე სხვებს ექნებათ შანსი დაიმკვიდრონ ადგილი ნაკრებში. ხალხი უკვე ემზადება ევრობასკეტისთვის, შვეიცარიასთან საშინაო მატჩში 7 ათასზე მეტი გულშემატკივარი მოვიდა, ბოლომდე მხარში გვედგა. ეს კალათბურთელებისთვის დადებითი მომენტია. მათ აქვთ ამბიცია და შესაძლებლობა, ევრობასკეტზე გადალახონ ჯგუფური ეტაპი და ითამაშონ პლეი ოფში."

7217
მკითხველის კომენტარები / 0 /
მსგავსი ამბები
რუბრიკის სხვა სიახლეები
;