რა მოხდა ესპანეთის ნაკრებში?-რატომ გაუშვეს ლოპეტეგი?

ესპანეთის ფეხბურთის ფედერაციამ მსოფლიოს ჩემპიონატის დაწყებამდე ერთი დღით ადრე შოკისმომგვრელი გადაწყვეტილება მიიღო - პოსტიდან დაითხოვა ეროვნული ნაკრების მთავარი მწვრთნელი ხულენ ლოპეტეგი და მის ნაცვლად ნაკრები ფერნანდო იეროს ჩააბარა...

რატომ გაუშვეს ლოპეტეგი?

ყველაფერი იმას უკავშირდება, რომ ხულენ ლოპეტეგიმ კონტრაქტი გააფორმა მადრიდის "რეალთან". ფეხბურთის ფედერაციის ხელმძღვანელობა ამან შოკში ჩააგდო, რადგან, ჯერ ერთი, მათ არაფერი იცოდნენ ამის თაობაზე, და მეორეც - ლოპეტეგიმ 20 მაისს ფეხბურთის ფედერაციასთან ხელი მოაწერა ახალ ხელშეკრულებას, რომლის ძალითაც ეროვნულ გუნდში 2020 წლის ბოლომდე უნდა ემუშავა. ასე რომ, "ფურია როხას" აწ უკვე ყოფილმა თავკაცმა ფეხბურთის ფედერაცია პირდაპირ ფაქტის წინაშე დააყენა.

მისმა ამგვარმა გადაწყვეტილებამ დიდი არეულობა გამოიწვია ესპანეთის ნაკრებში. განსაკუთრებით გაბრაზდნენ "ბარსელონას" ფეხბურთელები. მათ არანაირი სურვილი აღარ ჰქონდათ "რეალის" მომავალი დამრიგებლის ხელმძღვანელობით ეთამაშათ.

"ბომბი" მაშინ "აფეთქდა", როცა ლოპეტეგის დათხოვნის შესახებ ესპანეთის ფეხბურთის ფედერაციის პრეზიდენტმა ლუის რუბიალესმა გამოაცხადა.
"ჩვენ იძულებულები ვართ, კონკრეტულ მომენტში თანამშრომლობა შევწყვიტოთ ესპანეთის ნაკრების მთავარ მწვრთნელ ხულენ ლოპეტეგისთან.

ის უმაღლესი კლასის მწვრთნელია, მაგრამ ამ შემთხვევაში ჩვენ აღარ გვრჩებოდა მოქმედების არანაირი სხვა გზა. ყველას კარგად გვესმის, რომ "რეალი" ეძებდა სპეციალისტს ვაკანტურ პოსტზე, მაგრამ ესპანეთის ნაკრების მთავარი მწვრთნელი ასე არ უნდა იქცეოდეს და ეს აქსიომაა.

არ მიმაჩნია, რომ ჩვენ საქმე გვაქვს ღალატთან და ისიც კარგად ვიცი, რომ ლოპეტეგიმ ბევრი იმუშავა, მაგრამ ადამიანები უნდა იქცეოდნენ ადამიანურად და ამით ყველაფერია ნათქვამი! ჩვენ საერთოდ არაფერი ვიცოდით იმის თაობაზე, რომ ლოპეტეგი "რეალთან" მართავდა მოლაპარაკებას.

ეს შევიტყვეთ მხოლოდ 5 წუთით ადრე, სანამ მადრიდული კლუბი ოფიციალურ განცხადებას გააკეთებდა ახალი მწვრთნელის დანიშვნის თაობაზე. ვიმეორებ - ჩვენ მოქმედების ერთადერთი გზა დაგვრჩა და სწორედ ეს გზა ავირჩიეთ. სხვანაირი საქციელი უპასუხისმგებლობა იქნებოდა ესპანური ფეხბურთის წინაშე", - ბრძანა რუბიალესმა.

ლოპეტეგიმ ესპანელ ჟურნალისტებს კომენტარზე უარი უთხრა. მან უკვე დატოვა რუსეთი და ესპანეთში დაბრუნდა.

გამოსავალი

ბევრი იფიქრა თუ ცოტა, ესპანეთის ფეხბურთის ფედერაციამ გამოსავალი მალევე მოძებნა - ეროვნული გუნდი ესპანური ფეხბურთის ლეგენდას, 50 წლის ფერნანდო იეროს ჩააბარა.

იერომ საფეხბურთო კარიერა "ვალიადოლიდში" დაიწყო. 1989-2003 წლებში კი მთელი ეპოქა შექმნა "რეალში", რომლის მაისურით მარტო პრიმერა დივიზიონში 439 შეხვედრა ჩაატარა და ცენტრალური მცველის კვალობაზე ფანტასტიკური შედეგიანობა აჩვენა - 102 გოლი. სხვათა შორის, მას გოლები გაჰქონდა ესპანეთის ნაკრებშიც - 29 გოლი 89 მატჩში.

ბოლოს ის ყატარული "ალ რაიანისა" და ინგლისური "ბოლტონის" ღირსებას იცავდა. 2014/15 წლებში იერო კარლო ანჩელოტის თანაშემწე გახლდათ "რეალში". 2016/17 წლების სეზონში "ოვიედოს" მოძღვრავდა, ბოლოს კი ესპანეთის ფეხბურთის ფედერაციის სპორტული დირექტორი გახლდათ.

ლოპეტეგის გაშვებისთანავე, გავრცელდა ინფორმაცია, თითქოს ფეხბურთის ფედერაცია ნაკრებში ესპანეთის 21-წლამდელთა მწვრთნელის, ალბერტ სელადესის დანიშვნას აპირებდა. ის ლოპეტეგის ყოფილი ასისტენტია. მისი პლუსი ის არის, რომ "რეალშიც" უთამაშია და "ბარსელონაშიც". აქედან გამომდინარე, ის ორივე ესპანური გრანდის ფეხბურთელებისთვის მისაღები უნდა ყოფილიყო, მაგრამ საბოლოოდ არჩევანი მაინც იეროზე შეჩერდა.

რისკი

რა თქმა უნდა, იერო უდიდესი ავტორიტეტით სარგებლობს მთელ ესპანურ ფეხბურთში (და არა მარტო), მაგრამ საკითხავი ის არის, ერთნაირად მისაღები იქნება ის "რეალისა" და "ბარსას" მოთამაშეებისთვის? "რეალთან" დაკავშირებით ყველაფერი გასაგებია.

კითხვის ნიშნები დგას "ბარსას" ფეხბურთელების მიმართ - იქნება კი იერო ერთგვარად გამაერთიანებელი რგოლი ნაკრებში და სასურველი ფიგურა მათთვის, ვისთვისაც ის მაინც "რეალთან" ასოცირდება? სწორედ ეს პრობლემა დადგება ესპანეთის ნაკრების წინაშე და ამ გუნდის სამუნდიალო პერსპექტივაც გარკვეულწილად ამ პრობლემის გადაჭრაზე იქნება დამოკიდებული.

კულუარებში

იმ მოკლე ხანში, სანამ ესპანეთის ფეხბურთის ფედერაცია თავის არჩევანს გვამცნობდა, იქაური ფეხბურთის მამებმა ნაკრების დამრიგებლის თანამდებობაზე რამდენიმე კანდიდატი განიხილეს. ალბათ, ჩვენი მკითხველისთვის საინტერესო უნდა იყოს, რა ხდებოდა კულუარებში.

სერიოზულად განიხილებოდა "სელტას", "რომასა" და "ბარსელონას" ყოფილი მთავარი მწვრთნელის, ლუის ენრიკეს კანდიდატურა. ფიქრობდნენ მიჩელზეც, "მალაგას", "მარსელისა" და "სევილიას" ექსდამრიგებელზეც, ვისაც ფეხბურთელობისას "რეალში" დიდებული კარიერა ჰქონდა.

ასევე, აიტორ კარანკაზე, რომელიც ინგლისურ "მიდლსბროში" მუშაობდა, ახლახან კი "ნოტინგემ ფორესტი" ჩაიბარა.

ყოველდღიური სპორტული გაზეთი "ლელო"
300
მკითხველის კომენტარები / 0 /