რა მოხდებოდა, გვარდიოლა ტრიბუნაზე რომ არ ყოფილიყო? მანჩესტერ სიტის ინგლისური ანტირეკორდი [პეპის ემოციები, PHOTO]

"მანჩესტერ სიტიმ" ჩემპიონთა ლიგის ჯგუფური ეტაპი "ლიონთან" სენსაციური საშინაო მარცხით დაიწყო და პირველი ინგლისური გუნდი გახდა, ვინც ამ ტურნირზე ზედიზედ 4 მატჩი წააგო - გასულ სეზონში "ბაზელთან" 1:2, პლეი ოფის ორი მატჩი "ლივერპულთან" - 0:3, 1:2 და აგერ, "ლიონთან".

მატჩს ლოჟიდან ადევნა თვალი პეპ გვარდიოლამ, რომელიც დისკვალიფიცირებული გახლდათ უეფას მიერ, ხოლო "ეტიჰადის" ტრიბუნები გვარიანად შეთხელებული იყო თუნდაც ერთი რიგითი პრემიერლიგური მატჩის ფონზე.

გვარდიოლას ნაცვლად კომენტარი გააკეთა მისმა თანაშემწე მიკელ არტეტამ, რომელიც თამაშს ტექნიკური ზონიდან ხელმძღვანელობდა:

"ნაკლები გულშემატკივარი? არა მგონია, ეს ჩვენი მარცხის გამართლებად გამოდგეს, რადგან ადრე ამდენი და უფრო ნაკლები ქომაგის თანდასწრებითაც მოგვიგია. რას ვიზამთ, რეალობა ასეთია - არ იყო პეპი სკამზე და წავაგეთ.

ის რომ ყოფილიყო? არ ვიცი, შეიძლება, 5:0 მოგვეგო, ან შეიძლება უფრო დიდი ანგარიშითაც დავმარცხებულიყავით... ამას ახლა ვერავინ იტყვის...

...ვერ ვითამაშეთ კარგად, დიდი დრო მოვანდომეთ თამაშში "შესვლას", წავაგეთ ბევრი ორთაბრძოლა... ეს ისეთი შეცდომებია, როგორსაც ჩემპიონთა ლიგაში არავინ გაპატიებს. ჩვენი თამაში აშკარად არ შეესაბამებოდა ამ ტურნირის დონესა და მოთხოვნებს", - გულახდილი იყო არტეტა.

363
მკითხველის კომენტარები / 0 /
მსგავსი ამბები
რუბრიკის სხვა სიახლეები