რა მოხდებოდა, რომ... ლეო მესის ერთგულების საფასური

მისი დებიუტი "ბარსელონაში" ახალი კონტრაქტის გაფორმებამდე 4 788 დღის წინათ შედგა, მან 603-ჯერ მოირგო "ბლაუგრანას" ფორმა და 523 გოლი გაიტანა, გუნდთან ერთად მოპოვებული აქვს 30 დიდი ტიტული და ეს ისტორია გრძელდება...

საოცარია, მაგრამ ლეო მესის ერთგულება კატალონიური გრანდისადმი მასვე შეიძლება ცუდად შემოუტრიალდეს, როცა საქმე ყველა დროის საუკეთესო ფეხბურთელობაზე მიდგება...

გოლი თხრობით
30 წლის ლიონელ მესი ამ და კიდევ, სულ მცირე, სამ სეზონს გაატარებს "ბარსელონაში". იგი 13 წლის ასაკიდან კატალონიურ კლუბშია.

1959 წელს პელემ მისი კარიერის საუკეთესო გოლი გაიტანა. შესაძლოა, ეს იყო ყველა დროის საუკეთესო გოლიც ფეხბურთში, მაგრამ ამ გოლის ვიდეო უბრალოდ არ არსებობს. ბრაზილიელის კარიერის 1 283 გოლიდან "იუვენტუსის" კარში თავით გატანილი გოლი ყველამ შერაცხა ტექნიკურად სრულყოფილად. კომპიუტერული სიმულაცია გოლის შემსწრეთა და თავად პელეს მონაყოლით აეწყო - მაშინ 18 წლის ბრაზილიელმა თავზე გადაუგდო ბურთი სამ მცველს, შემდეგ კი მეკარესაც - ეს ყველაფერი ერთ მოძრაობაში, ბურთის მიწაზე დაუცემლად მოხდა.

ეჭვიც არავის შეეპაროს, რომ პელეს ვირტუალური გოლი ძალიან მაგარია, მაგრამ, როდესაც მიდის კამათი, არის თუ არა ეს გოლი საუკეთესო, სკეპტიკოსებს თავიანთი არგუმენტები აქვთ - გოლი ძირითადად პელეს მონაყოლით "აეწყო", ის კი ცნობილია, რომ არ გამოირჩევა თავმდაბლობით. 2012 წელს ფიფას ოფიციალურ საიტთან ინტერვიუში მან თქვა:

"მე ფეხბურთის თამაშისთვის დავიბადე, ისევე, როგორც ბეთჰოვენი დაიბადა მუსიკოსობისთვის, მიქელანჯელო კი - ხელოვნებისთვის".

მეტოქე ის "იუვენტუსი" არაა, ყველამ რომ გაიფიქრეთ, ეს არის ბრაზილიური კლუბი, რომლის სახელიც "ჟუვენტუსად" გამოითქმის. ეს გუნდი ისეთი სუსტი იყო, რომ "სანტოსმა" 10:1 მოუგო, ხოლო პელემ 5 გოლის გატანა შეძლო.

პელეს უამრავი გოლის დიდი ნაწილი სწორედ ასეთი კლუბების კარშია გატანილი, რადგან მან მხოლოდ კარიერის ბოლოს გაცვალა "სანტოსი" "ნიუ იორკ კოსმოსზე", ევროპაში კი საერთოდ არ უთამაშია.

პელე თუ მარადონა?
როცა მსოფლიოს ყველა დროის საუკეთესო ფეხბურთელზე კამათობენ, "ფეხბურთის მეფეს" პირველს ასახელებენ, მაგრამ მისი კანდიდატურის წინააღმდეგ ყველაზე დიდი არგუმენტი სწორედ ეს არის - პელეს ევროპაში თავი არ გამოუჩენია, განსხვავებით დიეგო არმანდო მარადონასგან, რომელმაც "ნაპოლი" იტალიის ჩემპიონი გახადა, განსხვავებით იოჰან კრუიფისგან, რომელმაც "აიაქსთან" ერთად სამჯერ მოიგო ჩემპიონთა თასი, მერე კი ტიტულები "ბარსელონაშიც" მოიგო და "ფეიენოორდშიც".

მარადონამ და კრუიფმა ბევრგან დაამტკიცეს თავიანთი კლასი.

ერთგულების ფასი
შაბათს ლეო მესიმ ახალი, გაუმჯობესებული კონტრაქტი გააფორმა "ბარსელონასთან", რომლის მიხედვითაც იგი "კამპ ნოუზე" 2021 წლის ივლისამდე დარჩება და ფეხბურთში ყველაზე მაღალანაზღაურებადი მოთამაშე გახდება. კონტრაქტის ბოლოსთვის მესი უკვე 34 წლის იქნება და კლუბში 20 წელი ექნება გატარებული.

ლეომ "ბარსას" აკადემია "ლა მასიას" კარი 13 წლის ასაკში შეაღო და მან ამ კლუბში ყველა ოცნება აისრულა, რაც კი შეიძლება ჰქონოდა ბავშვობაში. დღეისათვის მას ლა ლიგის 8 და ჩემპიონთა ლიგის 4 ტიტული აქვს მოგებული "ბარსას" მაისურით. არგენტინელმა 5-ჯერ მოიგო მსოფლიოს საუკეთესო ფეხბურთელისთვის განკუთვნილი "ოქროს ბურთი".
მესის უყვარს ბარსელონა და ბარსელონას უყვარს მესი. ასე რომ, სულაც არ არის მოულოდნელი, რომ მან კიდევ სამი წლით დაუკავშირა ბედი "ბარსას". სწორედ ამ კლუბმა აქცია ის "ლეო მესიდ".

თუმცა ამით მესიმ მსოფლიოს ყველა დროის საუკეთესო ფეხბურთელზე კამათში მოწინააღმდეგეებს დიდი არგუმენტი მისცა. პელე ხშირად იგერიებს ხოლმე ასეთ შეტევებს საკუთარი არგუმენტების მოშველიებით.

"როცა მესი ჩემსავით ათასზე მეტს გოლს გაიტანს, როცა იგი ჩემსავით სამჯერ მოიგებს მუნდიალს, მაშინ ვილაპარაკოთ ამ თემაზე", - თქვა 2012-ში ბრაზილიური ფეხბურთის ლეგენდამ.

დიახ, მესი დიდად დაეხმარა ახლახან არგენტინის ნაკრებს მუნდიალის საგზურის მოპოვებაში, მაგრამ ბარსელონელი ვერასოდეს გაიმეორებს პელეს მიღწევას. ის კი არა, ამ გადასახედიდან საეჭვოა, რომ მარადონასავით მაინც ერთხელ შეძლოს ლეომ მსოფლიოს ჩემპიონატის მოგება. დიდებული შემადგენლობის მიუხედავად, "ალბისელესტეს" მომავალი წლის მუნდიალის მთავარ ფავორიტად ვერ მივიჩნევთ.

ისევ "ფეხბურთის მეფე":

"მესი მომწონს, ის დიდი ფეხბურთელია. ტექნიკურად ჩვენ ერთი დონის ფეხბურთელები ვართ. ის დიდებულია "ბარსელონაში", მაგრამ ისევე წარმატებული ვერ არის, როცა არგენტინის ნაკრებში თამაშობს. ხალხი ყოველთვის მეკითხება, როდის უნდა დაიბადოს ახალი პელე? არ დაიბადება! ჩემმა მშობლებმა ეს "ქარხანა" დიდი ხანია, დაკეტეს".

"ბარსელონაში" მესის გარს ახვევია თანამედროვეობის რამდენიმე დიდი ფეხბურთელი, ბოლო 11 წელია, იგი ხვდება წლის სიმბოლურ ნაკრებში. მის გვერდით სიმბოლურ ნაკრებში ხშირად ხვდებოდნენ რონალდინიო, ჩავი, ანდრეს ინიესტა, ჟერარდ პიკე და ნეიმარი.

2011 წელს მესიმ თავისი "ოქროს ბურთი" ჩავის მიუძღვნა - "მინდა, მასთან ერთად გავინაწილო ეს ტიტული, რადგან ჩავი ამას იმსახურებს", - თქვა მაშინ არგენტინელმა.

რაიოლას რჩევა
სანამ ახალ კონტრაქტს გააფორმებდა, ბევრს ლაპარაკობდნენ მესის შესაძლო ტრანსფერზე. იყო საუბარი, რომ ის მსოფლიოს რეკორდად (300 მილიონი ევრო) პეპ გვარდიოლას "მანჩესტერ სიტიში" გადავიდოდა.

მინო რაიოლამ, რომელიც მრავალი ცნობილი ვარსკვლავის (პოგბა, იბრაჰიმოვიჩი) აგენტია, საჯაროდ ურჩია მესის კლუბის გამოცვლა:

"მესის დონის ფეხბურთელმა აუცილებლად უნდა სცადოს სხვა კლუბში, სხვა გარემოში თამაში, რომ დაამტკიცოს, რომ ის მართლაც დიადია", - უთხრა რაიოლამ "მარკას".

შეძლებდა კი მესი იგივე ჯადოქრობას მესი, ვთქვათ, სტოკში სველ ამინდში, სამშაბათს საღამოს?

"ბარსაში" მის ირგვილვ ტოპტალანტები არიან შეკრებილები, არგენტინის ნაკრებში იგი ისე ბრწყინვალედ ვერ თამაშობს, ეს ორი არგუმენტი წონიანი იქნება ყველა დროის საუკეთესო ფეხბურთელის საკითხის განხილვისას ლეოს მოწინააღმდეგეთა ხელში.

რა თქმა უნდა, მარტო იმიტომ, რომ მთელ კარიერას ერთ კლუბში გაატარებს, მესი ავტომატურად არ კარგავს ამ "ტიტულს", მაგრამ თუნდაც მისი ახლანდელი კონკურენტი კრიშტიანო რონალდო თავს იმით იწონებს, რომ მან ინგლისშიც მოიგო ყველაფერი და ესპანეთშიც.

ამ კონტრაქტზე ხელმოწერით მესიმ ფეხბურთის მოყვარულთა საყვარელ საკამათო თემაში გააჩინა სიტყვები, "რა მოხდებოდა, რომ..."

ყოველდღიური სპორტული გაზეთი "ლელო"
2168
მკითხველის კომენტარები / 0 /
მსგავსი ამბები
რუბრიკის სხვა სიახლეები