რა საჭიროა  მერიის  კლუბი?  გაყიდეთ  კოლხეთი! - ფოთში მწვრთნელი  კიდევ ერთხელ  შეიცვალა 

26 აგვისტოს ფოთის „პარკი არენაზე“ „კოლხეთი 1913-მა“ ეროვნული ლიგა 2-ის 23-ე ტურში „თელავს“ უმასპინძლა და 2:5 წააგო.

ეს კოლხების ზედიზედ მეოთხე მარცხი გახლდათ, რასაც შესაბამისი ამბებიც მოჰყვა - საკუთარი განცხადების საფუძველზე „კოლხეთი 1913-ის“ მთავარი მწვრთნელის თანამდებობა დატოვა გიორგი კრასოვსკიმ - ეს ინფორმაცია კლუბის ოფიციალურმა გვერდმა გაავრცელა. 

დროებით, მთავარი მწვრთნელის ფუნქციას შეასრულებს ნუგზარ თვარაძე, რომელიც კრასოვსკის ასისტენტი გახლდათ. მას უახლოესი პერიოდის განმავლობაში ზურაბ თოფურია დაეხმარება. 

გავიხსენოთ ამ სეზონის პირველი ცვლილება - 8 აპრილს, „სამტრედიასთან“ წაგების შემდეგ, გუნდი პაატა მეტრეველმა დატოვა და ის სოსო ფილიამ შეცვალა. ვეტერანი სპეციალისტის ხელმძღვანელობით, გუნდმა მდგომარეობა გამოასწორა, რამდენიმე კარგი თამაშიც ჩაატარა, მაგრამ ივნისში, ფოთის მერიის ხელმძღვანელებთან ურთიერთშეთანხმების საფუძველზე, „კოლხეთი 1913“ დირექტორმა ნიკო ჯაშმა დატოვა და ეს პოსტი დროებით გუნდის უფროსმა მწვრთნელმა ფილიამ შეითავსა. 

მაგრამ მანაც ხანმოკლე პერიოდით იმუშავა და ივლისში კლუბის დირექტორად გუნდის ყოფილი მოთამაშე და მთავარი მწვრთნელი ზაზა ინაშვილი დაინიშნა, რომელიც ბოლო წლებში ბიზნესით იყო დაკავებული და ფეხბურთს ჩამოშორებული გახლდათ. 

შემდეგ სამწვრთნელო შტაბი მესამედ შეიცვალა - 20 ივლისს ცნობილი გახდა, რომ საკუთარი განცხადების საფუძველზე „კოლხეთი 1913“-ის მწვრთნელის პოსტიდან წავიდა ფილია და დროებით მისი ასისტენტი გიორგი კრასოვსკი დანიშნა. ამ უკანასკნელმა ზუსტად თვე-ნახევარი გაძლო . აი, ასეთია კოლხური ცვლილებების ქრონოლოგია, ამ დროს კი კლუბს შარშანდელი დავალიანებები აქვს გასასტუმრებელი.

საერთოდ, რაც ბოლო 20 წელია ამ კლუბში ხდება, ერთ მარტივ დასკვნას გვკარნახობს - ფოთის მერია „კოლხეთს“ ვერ უვლის და დროა, ერთ-ერთი უძველესი ქართული კლუბის გასხვისებისთვის კონკრეტული ნაბიჯი გადაიდგას. 

გასაგებია, რომ ტრადიციული კლუბის საკუთრებაში ასაყვანად ერთმანეთს თავ-პირს არავინ დაამტვრევს, მაგრამ ეს აუცილებელია, რადგან „კოლხეთის“ გადასარჩენად სხვა გზა, უბრალოდ, არ არსებობს. 

ფაქტია, რომ კოლხებს ლიგაში დარჩენა ძალიან გაუჭირდებათ. ამ დროს კი ფოთში გაზრდილი მოთამაშეები ლამის ყველა წამყვან ქართულ კლუბებში თამაშობენ

ყოველდღიური სპორტული გაზეთი "ლელო"
1788
მკითხველის კომენტარები / 0 /
მსგავსი ამბები
რუბრიკის სხვა სიახლეები
;